ដោយ: គង់ លាងហួរ
អន្តរជាតិ: លោកស្រី ជា សិរី ទេសាភិបាលធនាគារជាតិនៃកម្ពុជា បានថ្លែងប្រាប់សារពត៌មានជប៉ុនNikkei Asia នៅក្នុងបទសម្ភាសន៍មួយថា ការទូទាត់ប្រាក់តាមកូដ QR ឆ្លងដែនតាមរយៈប្រព័ន្ធបាគង នឹងជំរុញការប្រើប្រាស់រូបិយប័ណ្ណរៀលរបស់កម្ពុជា។
លោកស្រីថ្លែងបន្តថា “បច្ចុប្បន្នចំនួនជាង៨០% នៃសេដ្ឋកិច្ចរបស់កម្ពុជា នៅតែដំណើរការជាមួយប្រាក់ដុល្លារអាមេរិក ដែលជាផ្នែកមួយ នៃប្រព័ន្ធប្រើប្រាស់រូបិយប័ណ្ណចំនួន២ ខណៈអាជ្ញាធរកំពុងជំរុញឱ្យប្រាក់រៀលដើរតួនាទីកាន់តែធំជាងមុន”។
គិតត្រឹមឆ្នាំ២០២៣ ការទូទាត់តាមប្រព័ន្ធឌីជីថលសរុប ដែលធ្វើឡើងតាមរយៈប្រព័ន្ធបាគង បានកើនឡើងដល់ទំហំទឹកប្រាក់៧០ពាន់លានដុល្លារ បន្ទាប់ពីបើកដាក់ឱ្យដំណើរការ នៅឆ្នាំ២០២០ (ប្រមាណ២ដង នៃផលទុនជាតិសរុប(GDP)របស់ប្រទេសកម្ពុជា)។
ចំណែកឯ ទំហំប្រតិបត្តិការទូទាត់ជារូបិយប័ណ្ណ ប្រាក់រៀលរបស់កម្ពុជា មានចំនួន២០ពាន់លានដុល្លារ នៃចំនួនសរុបកាលពីឆ្នាំមុន ដែលកើនឡើងជាង២ដងបើធៀបនឹងកម្រិតឆ្នាំ២០២២។
បើតាមលោកស្រី ជា សិរី បានឱ្យដឹងទៀតថា “ប្រតិបត្តិការឆ្លងដែនគឺជាគន្លឹះ ក្នុងការពង្រីកការប្រើប្រាស់ប្រាក់រៀល។ ប្រព័ន្ធបាគងត្រូវបានដាក់ឱ្យប្រើប្រាស់រួចមកហើយ សម្រាប់ការទូទាត់តាមកូដ QR រវាងកម្ពុជា ថៃ ឡាវ និងវៀតណាម ព្រមទាំងសេវា UnionPay របស់ប្រទេសចិន។ លោកស្រីបន្ថែមថា “ការទូទាត់ប្រាក់ឆ្លងដែនទាំងនេះ អាចអនុវត្តន៍បានតែជាប្រាក់រៀលប៉ុណ្ណោះ”៕
