ដោយៈ វុទ្ធី
ភ្នំពេញៈ បើនិយាយពីវិស័យអចលនទ្រព្យ នៅតាមតំបន់ជាយក្រុងរាជធានីភ្នំពេញ អ្នកជំនាញផ្នែកអចលនទ្រព្យបានមើលឃើញថា តំបន់ប៉ែកខាងត្បូង និងខាងលិចរាជធានីភ្នំពេញមានភាពល្អប្រើសើរជាងតំបន់ផ្សេង។
លោក ប៉ូ អ៊ាវគង់ ប្រធានគ្រប់គ្រងទូទៅក្រុមហ៊ុនអចលនទ្រព្យអេស៊ា Advance Real Estate Company បានប្រាប់កាលពីថ្ងៃទី ១៨ ខែវិច្ឆិកា ឆ្នាំ២០២០កន្លងមកថា បើគិតជារួមអចលនទ្រព្យនៅជាយក្រុង តម្រូវការលំនៅដ្ឋាន និងការវិនិយោគដែលធ្វើឱ្យអចលនទ្រព្យនៅតែមានដង្ហើម រយៈពេលជិតមួយឆ្នាំនេះ គឺតំបន់តាមផ្លូវក្រវ៉ាត់ក្រុង ដូចជាផ្លូវក្រវ៉ាត់ក្រុងទី៣ជាដើម។
លោកបន្តថា “តំបន់ប៉ែកខាងត្បូង និងខាងលិចមានខាងទំនប់កប់ស្រួវ ផ្លូវជាតិលេខ៤ លេខ៣ លេខ២ សព្វថ្ងៃនេះ វាមានសន្ទុះជាងតំបន់ជាយក្រុងផ្សេងៗ ដូចជា ប៉ែកខាងកើត និងខាងជើង ដោយសារប៉ែកខាងកើត និងខាងជើងមានភាពល្អប្រសើរស្រាប់ហើយ” ។ លោកបន្តថា “ក៏មានអ្នកអភិវឌ្ឃន៍មួយចំនួន បានចុះទៅមើលទីតាំងដើម្បីអភិវឌ្ឃជាបុរីតម្លៃជាមធ្យម ឬឃ្លាំងជាដើមនៅតាមផ្លូវក្រវ៉ាត់ក្រុង” ។
លោកប៉ូ អ៊ាវគង់បានបន្តទៀតថា នៅតាមបណ្តោយផ្លូវក្រវ៉ាត់ក្រុងទី៣ ហាក់មានសន្ទុះ ដោយសារតែមានតម្រូវការច្រើននោះតំបន់នោះ ដូចជាលំនៅដ្ខាន ការសាងសង់ឃ្លាំងសម្រាប់ផ្ទុកទំនិញ ការរំកិលរោងចក្រចេញពីក្រុងជាដើម។ ចំពោះតម្លៃដីនៅតំបន់ដូចជាខាងកប់ស្រូវ និយាយជារួមសម្រាប់ដីអភិវឌ្ឃធំៗ កន្លែងខ្លះមានតម្លៃចន្លោះពី៣០០ ទៅ៥០០ដុល្លារ ។
លោកស៊ា ឆៃលីន នាយកប្រតិបត្តិក្រុមហ៊ុនអចលនទ្រព្យ CL Realty Co.,Ltd បាននិយាយថា បើនិយាយពីតំបន់ជាយក្រុង ដែលនៅតែមានភាពល្អប្រសើរលើវិស័យអចលនទ្រព្យនោះគឺតំបន់ប៉ែកខាងលិច និងខាងត្បូង។ ចំណែកឯតំបន់ខាងកើតក៏មានខ្លះដែរ ហើយតំបន់ខាងកើតឈៀងត្បូង ក៏មានខ្លះដែរ។
លោកបន្តបានថា មូលហេតុដែលធ្វើឱ្យអចលនទ្រព្យ នៅតំបន់ទាំងនោះ មានការកើនឡើង ដោយសារទី១ ដីទំនេរច្រើន ព្រោះកាលណាដីទំនេរច្រើន តម្លៃដីធូរថ្លៃ និងទី២ គឺដោយសារមានការអភិវឌ្ឃគម្រោងជាច្រើន ដូចជាព្រលានយន្តហោះថ្មី ដែលជាចំណុចរសើបមួយ ហើយខាងកើតមានស្ពានថ្មីមួយ ដែលតភ្ជាប់ពីកោះនរា មកផ្លូវជាតិលេខ១ ។
លោកបានបន្តថា ចំណែកឯខាងលិចវិញ មានការអភិវឌ្ឍបុរី ហើយវាក៏ជាផ្លូវសេដ្ឋកិច្ច សម្រាប់ដឹកជញ្ជូនទំនិញ និងមានរោងចក្រនៅទីនោះច្រើន។ ទាំងអស់នេះជាហេតុផល ដែលធ្វើឱ្យតម្លៃអចលនទ្រព្យមានការកើនឡើង។
លោកបានបន្តទៀតថា “ចំពោះតម្លៃដីនៅតាមបណ្ដោយផ្លូវក្រវ៉ាត់ក្រុង មិនសូវមានការប្រែប្រួលទេ គឺមានសភាពទ្រឹង” ៕
