ដោយ: គង់ លាងហួរ
ប៉េកាំង: ក្រុមហ៊ុនរថភ្លើងឥណ្ឌូនេស៊ី (KCI) បានចុះកិច្ចព្រមព្រៀងជាមួយក្រុមហ៊ុនរដ្ឋចិនCRRC Sifang ដើម្បីទិញរថភ្លើងអគ្គិសនីចំនួន៣គ្រឿង ដែលមានតម្លៃ៧៨៣ពាន់លានរូពៀ (ប្រហែល៤៩,៧លានដុល្លារ)។
ក្រុមហ៊ុនរថភ្លើងឥណ្ឌូនេស៊ី គ្រោងនឹងដាក់ឱ្យដំណើរការរថភ្លើងអគ្គិសនីថ្មីរបស់ប្រទេសចិន ដើម្បីជំនួសរថភ្លើងចាស់ៗ នៅលើផ្លូវដែកទីក្រុងហ្សាការតា ដើម្បីបំពេញតម្រូវការដឹកជញ្ជូន អ្នកដំណើរដែលកំពុងមានការកើនឡើង។
តួយ៉ាង កាលពីឆ្នាំ២០២៣កន្លងទៅ ខ្សែផ្លូវដែកGreater Jakarta Railway បានដឹកអ្នកដំណើរប្រហែល២៩០លាននាក់ ដោយកើនឡើង២៨ភាគរយ បើធៀបនឹងឆ្នាំ២០២២។
ក្រុមហ៊ុន KCI បានរាយការណ៍ថា រថភ្លើងចាស់ៗចំនួន១០គ្រឿង ត្រូវបានដាក់ឱ្យចូលនិវត្តន៍នៅឆ្នាំ ២០២៣ ហើយរថភ្លើងចំនួន១៩ផ្សេងទៀត នឹងត្រូវបញ្ឈប់ដំណើរការនៅឆ្នាំ២០២៤នេះ។
លើសពីនេះ ក្រុមហ៊ុន KCI ក៏បានចុះកិច្ចព្រមព្រៀងទិញរថភ្លើងថ្មីចំនួន១៦គ្រឿង ដែលមានតម្លៃជាង៣,៨ពាន់លានរូពៀ (ប្រហែល២,៤៣លានដុល្លារ) ពីក្រុមហ៊ុនរដ្ឋឥណ្ឌូនេស៊ី INKA ផងដែរ។
ក្នុងរយៈពេលប៉ុន្មានឆ្នាំកន្លងមកនេះ ប្រទេសឥណ្ឌូនេស៊ី បានបង្កើនកិច្ចសហប្រតិបត្តិការ ជាមួយទីក្រុងប៉េកាំង លើវិស័យដឹកជញ្ជូ ន ជាពិសេសគឺគម្រោងសាងសង់ ផ្លូវរថភ្លើងល្បឿនលឿន តភ្ជាប់ពីរដ្ឋធានីហ្សាការតា ទៅកាន់ទីក្រុងបានឌុង។
គម្រោងនេះ គឺជាផ្លូវរថភ្លើងល្បឿនលឿនដំបូងគេ នៅតំបន់អាស៊ាន ដែលត្រូវបានបើកដាក់ឱ្យដំណើរការ កាលពីខែតុលា ឆ្នាំ២០២៣ ហើយបណ្តាញនេះ បានជួយដល់ឥណ្ឌូនេស៊ី លើការពង្រឹងហេដ្ឋារចនាសម្ព័ន្ធនៅក្នុងតំបន់៕ប្រភព៖ Jakarta Post៕