តម្លៃហាងឆេងមាសបានធ្លាក់ថ្លៃចុះនៅថ្ងៃអង្គារនេះ

ដោយ: គង់ លាងហួរ
អន្តរជាតិ: តម្លៃហាងឆេងមាសបានធ្លាក់ថ្លៃចុះ នៅថ្ងៃអង្គារនេះ ខណៈដែលប្រាក់ដុល្លារ ហក់ឡើងថ្លៃ បន្ទាប់ពីរបាយការណ៍បង្ហាញថា អត្រាអ្នកមានការងារធ្វើនៅសហរដ្ឋអាមេរិកបានកើនឡើង ដែលនាំឱ្យអ្នកវិភាគរំពឹងថា ធនាគារកណ្តាលអាមេរិកនឹងមិនបញ្ចុះអត្រាការប្រាក់ក្នុងពេលឆាប់ៗឡើយ។

តួយ៉ាង តម្លៃមាស Spot Gold បានធ្លាក់ចុះ០,៦%ដល់២០២៧,០៩ដុល្លារ ក្នុងមួយអោន ខណៈតម្លៃហាងឆេងមាសរបស់សហរដ្ឋអាមេរិក U.S. gold futuresបានធ្លាក់ចុះ០,៥%ដល់២០៤២,៩ដុល្លារ ក្នុងមួយអោន។

យោងតាមរបាយការណ៍បង្ហាញថា និយោជកនៅសហរដ្ឋអាមេរិក បានបង្កើតការងារបន្ថែមចំនួន៣៥៣.០០០ នៅក្នុងខែមករា បើធៀបនឹងការព្យាករណ៍ត្រឹមតែ១៨០.០០០។

លោក Jim Wyckoff អ្នកវិភាគជាន់ខ្ពស់នៅក្រុមហ៊ុន Kitco Metals លើកឡើងថា យើងកំពុងមើលឃើញ ឥទ្ធិពលនៃកំណើនអត្រាអ្នកមានការងារធ្វើដ៏រឹងមាំ ដែលជំរុញឱ្យផលប័ត្ររតនាគារ និងសន្ទស្សន៍ប្រាក់ដុល្លារអាមេរិកហក់ឡើងកាន់តែខ្ពស់ ដែលការណ៍នេះនាំឱ្យតម្លៃមាសធ្លាក់ចុះ។

លោកបានបន្ថែមថា “ទោះជាយ៉ាងណាក្តី ហាងឆេងមាសនៅតែអាចមានតម្លៃលើស២.០០០ដុល្លារក្នុងមួយអោន ដោយសារតែភាពមិនច្បាស់លាស់ផ្នែកភូមិសាស្ត្រនយោបាយនៅក្នុងទីផ្សារ ដែលអាចជំរុញឱ្យតម្រូវការមាសកើនឡើងយ៉ាងឆាប់រហ័ស។

នៅពេលនេះ ទីផ្សារមើលឃើញឱកាសត្រឹមតែ១៥ភាគរយប៉ុណ្ណោះ នៃការកាត់បន្ថយអត្រាការប្រាក់ ដោយធនាគារកណ្តាលអាមេរិក(Fed) នៅខែមីនាខាងមុខ។ នេះបើយោងតាមឧបករណ៍ CME FedWatch។

សន្ទស្សន៍ប្រាក់ដុល្លារ ដែលវាស់វែងរូបិយប័ណ្ណដុល្លារអាមេរិក ធៀបនឹងរូបិយប័ណ្ណគូប្រជែងចំនួន៦ ដូចជាប្រាក់យ៉េន និងប្រាក់អឺរ៉ូ បានហក់ឡើងថ្លៃ ដល់កម្រិតខ្ពស់បំផុតក្នុងរយៈពេល៣ខែពោលគឺ១០៤,៤២ពិន្ទុនៅថ្ងៃអង្គារនេះ។

តម្លៃលោហៈធាតុប្រាក់ Spot silver បានធ្លាក់ចុះ១,៣ភាគរយ ដល់២២,៣៨ដុល្លារ ក្នុងមួយអោន ខណៈតម្លៃផ្លាទីនបានស្ថិតនៅទ្រឹងត្រឹម៩៤៦,៩៦ដុល្លារក្នុងមួយអោន ខណៈតម្លៃ palladium បានងើបឡើង០,៨% ដល់៨៩៧,៦៥ដុល្លារក្នុងមួយអោន៕