ដោយៈ គង់ ម៉ាលីនណា
ភ្នំពេញៈ រដ្ឋមន្ត្រីក្រសួងសង្គមកិច្ច អតីតយុទ្ធជន និងយុវនីតិសម្បទា លោកជា សុមេធីបានគូសរំលេចថា រាជរដ្ឋាភិបាលកម្ពុជាបានបញ្ចេញកញ្ចប់ជាតិ ជាង១៤០០លានដុល្លារអាមេរិក ដើម្បីឧបត្ថម្ភដល់ប្រជាពលរដ្ឋ ក្នុងអំឡុងពេលពួកគាត់ជួបវិបត្តិផ្សេងៗ។
ក្នុងពិធីបើកសន្និបាតបូកសរុបលទ្ធផល ការងារឆ្នាំ២០២៣ និងលើកទិសដៅការងារឆ្នាំ២០២៤ កាលពីព្រឹកថ្ងៃចន្ទ ទី៥ ខែកុម្ភៈ ឆ្នាំ២០២៤ លោក ជា សុមេធី បានលើកឡើងថា រាជរដ្ឋាភិបាលកម្ពុជានៅក្នុងនីតិកាលចាស់ ដឹកនាំដោយសម្តេចតេជោ ហ៊ុន សែន និងក្នុងនីតិកាលថ្មី ដឹកនាំដោយសម្តេចមហាបវរធិបតី ហ៊ុន ម៉ាណែត បានផ្តល់ការយកចិត្តទុកដាក់ខ្ពស់ទៅលើជីវភាព និងផលលំបាកនានារបស់ប្រជាពលរដ្ឋ។
លោកបញ្ជាក់ថា “ដើម្បីដោះស្រាយការលំបាក ទាំងឡាយរបស់ប្រជាពលរដ្ឋ ជាពិសេសនៅពេលសង្គមជួបការរាតត្បាតជំងឺកូវីដ-១៩ វិបត្តិអតិផរណា ក៏ដូចជាគ្រោះមហន្តរាយនានា រាជរដ្ឋាភិបាលបានបញ្ចេញកញ្ចប់ថវិកាជាតិ ជាបន្តបន្ទាប់ជួយអន្តរាគមន៍ ដល់ផលប៉ះពាល់របស់ពួកគាត់”។
លោករដ្ឋមន្ត្រី បានឱ្យដឹងថា កំលុងពេលកម្ពុជា ជួបនូវវិបត្តិនានានេះ រាជរដ្ឋាភិបាលបានបញ្ចេញកញ្ចប់ ថវិកាសរុបជាង១៤០០លានដុល្លារលើកម្មវិធីជំនួយសង្គមចំនួន៥។
កម្មវិធីជួយសង្គមទាំង៥នោះរួមមាន ទី១ កម្មវីធីឧបត្ថម្ភសាច់ប្រាក់ជូនស្ត្រីមានផ្ទៃពោះ និងកុមារអាយុក្រោម២ឆ្នាំ ដោយបានផ្តល់សេវាជូនអ្នក ទទួលផលសរុបចំនួនជាង៣៦ម៉ឺននាក់ ចំណាយថវិកា ៣២លានដុល្លារ។ កម្មវិធីនេះ ជាកម្មវិធីអចិន្ត្រៃយ៍។
ទី២ កម្មវីធីឧបត្ថម្ភសាច់ប្រាក់ជូនដល់គ្រួសារក្រីក្រ និងងាយរងគ្រោះ ក្នុងអំឡុងពេលប្រយុទ្ធនឹងជំងឺកូវីដ-១៩ ដោយអនុវត្តបាន ចំនួន៤២លើក គិតត្រឹមថ្ងៃទី២៤ ខែមករា ឆ្នាំ២០២៤ និងបានបើកផ្ដល់ដល់គ្រួសារក្រីក្រ ក្នុងវង្វង់៧១ម៉ឺនគ្រួសារ ដោយចំណាយថវិកាអស់ប្រមាណ១,៣០៦លានដុល្លារ។
ទី៣ ជំនួយសង្គមជាសាច់ប្រាក់ក្រោយពេលបិទខ្ទប់ សម្រាប់ប្រជាពលរដ្ឋ មានការលំបាកផ្នែកជីវភាព, ប្រជាពលរដ្ឋ និងគ្រួសារដែលមានអ្នកឆ្លងជំងឺកូវីដ-១៩ និងមានការលំបាកផ្នែកជីវភាព និងគ្រួសារ ប្រជាពលរដ្ឋដែលមានអ្នកស្លាប់ ដោយសារជំងឺកូវីដ-១៩ ក្នុងព្រឹត្តិការណ៍ “២០ កុម្ភៈ ២០២១” ដែល បានអនុវត្តពីថ្ងៃទី១០ ខែកក្កដា ឆ្នាំ២០២១ និងបានបិទបញ្ចប់ក្នុងខែតុលា ឆ្នាំ២០២១ និងបានបើកផ្ដល់ដល់ អ្នកទទួលផលចំនួន១២៩,៦៦៦គ្រួសារ ដោយចំណាយថវិកាចំនួន៦.៦៨លានដុល្លារ។
ទី៤ កម្មវិធីជំនួយសង្គមជាសាច់ប្រាក់ ជូនគ្រួសាររងហានិភ័យ ដែលរងផលប៉ះពាល់ ធ្ងន់ធ្ងរពីគ្រោះទឹកជំនន់ ដែលបានអនុវត្តនៅថ្ងៃទី១០ ខែធ្នូ ឆ្នាំ២០២២ ហើយបិទបញ្ចប់នៅថ្ងៃទី១០ ខែមីនា ឆ្នាំ២០២៣ ដែលបើកផ្ដល់ដល់អ្នកទទួលផល សរុបចំនួន៩៩,១៦៩គ្រួសារ ដោយចំណាយថវិកាសរុប ១១.៧០លានដុល្លារ។
ទី៥ កម្មវិធីឧបត្ថម្ភសាច់ប្រាក់ជូនគ្រួសារ ងាយរងហានិភ័យក្នុងអំឡុងពេលមានសម្ពាធអតិផរណាដែល បានចាប់ផ្តើមអនុវត្តនៅខែធ្នូ ឆ្នាំ២០២២ និងបញ្ចប់នៅខែកក្កដា ឆ្នាំ២០២៣ មានអ្នកទទួលផលសរុប ចំនួន៤៩៥,៣០៧គ្រួសារ ដោយចំណាយថវិកាចំនួន៤៤លានដុល្លារ។
លោករដ្ឋមន្ត្រី ជា សុមេធី បានគូសរំលេចផងដែរពីតួនាទីក្រសួងសង្គមកិច្ច អតីតយុទ្ធជន និងយុវនីតិសម្បទា ក្នុងការចូលរួមចំណែកយ៉ាងក្នុងការអនុវត្ត គោលនយោបាយអាទិភាព របស់រាជរដ្ឋាភិបាល ពិសេសទាក់ទង គោលនយោបាយអាទិភាពទី២ គឺការបណ្តុះបណ្តាលជំនាញវិជ្ជាជីវៈ និងបច្ចេកទេសជូនដល់យុវជន មកពីគ្រួសារក្រីក្រ និងគ្រួសារងាយរងហានិភ័យ នៅទូទាំងប្រទេស និងគោលនយោបាយទី៣ គឺការធ្វើស្ថាបនូបនីយកម្មកម្មវិធីជាតិ ជំនួយសង្គមសម្រាប់គ្រួសារក្រីក្រ ក្រុមជនងាយរងគ្រោះ នៅក្នុងគ្រួសារក្រីក្រ និងគ្រួសារងាយរងហានិភ័យក្នុងគ្រាមានវិបត្តិសេដ្ឋកិច្ច និងគ្រាមានគ្រោះអាសន្ន ដែលមានមូលនិធិជាតិជំនួយសង្កម គឺជាប្រតិបត្តិករអនុវត្តកម្មវិធីជាតិជំនួយសង្គមរបស់រាជរដ្ឋាភិបាល។
លោករដ្ឋមន្ត្រីបន្តថា បច្ចុប្បន្នក្រសួងសង្គមកិច្ច អតីតយុទ្ធជន និងយុវនីតិសម្បទា កំពុងដើរតួនាទីដ៏សំខាន់អនុវត្តន៍” កម្មវិធីជាតិជំនួយសង្គមក្នុងកញ្ចប់គ្រួសារ” និង “កម្មវិធីកិច្ចគាំពារសង្គមឆ្លើយតបនឹងគ្រោះអាសន្ន» ដែលប្រកាសដាក់ឱ្យអនុវត្តន៍ កាលពីថ្ងៃទី៥ ខែធ្នូ ឆ្នាំ២០២៣កន្លងទៅ ដោយសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជា។
កម្មវិធីជាតិជំនួយសង្គមក្នុងកញ្ចប់គ្រួសារនេះ នឹងផ្តល់ប្រយោជន៍ដល់គ្រួសារ មានបណ្ណសមធម៌ប្រមាណ៧០ម៉ឺនគ្រួសារ ស្មើនឹង ២,៨លាននាក់ ដោយគ្រោងនឹងចំណាយថវិកា ប្រមាណ៦៧៤,៥ប៊ីលានរៀល ស្មើនឹង១៦៥លានដុល្លារក្នុងឆ្នាំ២០២៤។
កម្មវិធីជាតិជំនួយសង្គមក្នុងកញ្ចប់គ្រួសារ គឺជាបណ្តុំនៃកម្មវិធីជាតិជំនួយសង្គម ដោយសំយោគកម្មវិធីដែលមានស្រាប់ រួមផ្សំនឹងកម្មវិធីថ្មីបន្ថែម ដើម្បីទ្រទ្រង់ជីវភាពប្រជាពលរដ្ឋ ដោយប្រកាន់ភ្ជាប់នូវគោលការណ៍បរិយាបន្ន និងសមធម៌ ព្រមទាំងការចៀសវាងបានការធ្លាក់ចុះយ៉ាងគំហុក នៃប្រាក់ចំណូលសម្រាប់គ្រួសារ ដែលមានបណ្ណសមធម៌ទាំងអស់ ក៏ដូចជាគិតគូរដល់សមាជិកគ្រួសារ ដែលរស់នៅជាមួយមេរោគ និងជំងឺអេដស៍៕
