កម្ពុជា និងចិន បានដាក់ដំណើរការផ្លូវហោះហើរដឹកជញ្ជូនទំនិញថ្មី

ដោយ៖ សាវុធ

ភ្នំពេញ៖ ទីក្រុងភ្នំពេញជាមួយនឹងទីក្រុង Lanzhou (ភាគពាយព្យរបស់ប្រទេសចិន) និងទីក្រុង Lahore របស់ប្រទេសប៉ាគីស្ថាន បានដាក់ឱ្យដំណើរការដំបូងបំផុតនូវផ្លូវហោះហើរដឹកជញ្ជូនទំនិញ តាមផ្លូវអាកាសដោយផ្ទាល់ ដែលជាការត្រួសត្រាយសម្រាប់ប្រទេសកម្ពុជាក្នុងការជំរុញពាណិជ្ជកម្ម។

សារព័ត៌មាន ស៊ីនហួ ដែលចេញផ្សាយសប្តាហ៍មុន បានឱ្យដឹងថា ជើងហោះហើរដំបូង កាលពីថ្ងៃទី ៣០ ខែតុលា បានដឹកផ្លែស្វាយស្ងួតចំនួន ១៨ តោនទៅទីក្រុង Lanzhou។ បន្ទាប់មកជើងហោះហើរនេះបានចាកចេញពីទីក្រុង Lanzhou នៅថ្ងៃដដែលឆ្ពោះទៅទីក្រុង Lahore ដោយដឹកជញ្ជូនផលិតផលប្រើប្រាស់ក្នុងលំនៅឋានរបស់ប្រទេសចិន។ នេះបើយោងតាមកំពង់ផែគោក Gansu (ទីក្រុង Lanzhou)។ 

សម្រាប់ជើងហោះហើរនេះគឺនឹងមានពី ២-៤ ជើងក្នុង ១ សប្ដាហ៍។

ជើងហោះហើរពីទីក្រុងភ្នំពេញទៅទីក្រុង Lanzhou នឹងដឹកជញ្ជូនទំនិញ ដែលរួមមានគ្រាប់ធញ្ញជាតិ អាហារសមុទ្រស្រស់ និងក្លាស្សេទៅទីក្រុង Lanzhou ខេត្ត Gansu ប្រទេសចិន។

បន្ទាប់ពីការដាក់ទំនិញចុះ យន្តហោះមួយនេះនឹងផ្ទុកទំនិញ ដែលជាផលិតផលប្រើប្រាស់ក្នុងផ្ទះរបស់ប្រទេសចិន និងផលិតផលកសិកម្ម ចេញដំណើរឆ្ពោះទៅប្រទេសប៉ាគីស្ថាន។ នេះបើយោងតាមកំពង់ផែគោក Gansu ក្នុងដំណើរការដឹកជញ្ជូនទំនិញលើកដំបូងនេះ ក្រុមហ៊ុនអាកាសចរណ៍ Lanmei Airlines (Cambodia) ត្រូវបានជួលដឹកស្វាយក្រៀមចំនួន ១៨ តោនពីកម្ពុជា។

របាយការណ៍របស់រដ្ឋលេខាធិការអាកាសចរស៊ីវិល បានឱ្យដឹងថា ក្នុងរយៈពេល ៦ ខែដំបូង ឆ្នាំ ២០២០ នេះ ការដឹកជញ្ជូនទំនិញតាមផ្លូវអាកាសមានចំនួន ២៥ ០០០ តោនដែលធ្លាក់ចុះ ៣០ ភាគរយ បើធៀបនឹងរយៈពេលដូចគ្នាកាលពីឆ្នាំមុន៕