ដោយ: គង់ លាងហួរ
អន្តរជាតិ: លោក Jerome Powell ប្រធានធនាគារកណ្តាលអាមេរិក(Fed) ប្រកាសថា លោកគ្រោងនឹងបើកទ្វារចំហ សម្រាប់ការដំឡើងអត្រាការប្រាក់បន្ថែមទៀត នាពេលខាងមុខ ដើម្បីប្រយុទ្ធប្រឆាំងនឹងអតិផរណា។
លោក Jerome Powell បានថ្លែងនៅក្នុងសន្និសីទមួយ ដែលរៀបចំ ដោយមូលនិធិរូបិយវត្ថុអន្តរជាតិ(IMF) នៅទីក្រុងវ៉ាស៊ីនតោនឌីស៊ី ថា “យើងដឹងថា វឌ្ឍនភាពដែលកំពុងបន្តឆ្ពោះ ទៅរកគោលដៅអតិផរណាក្នុងរង្វង់២% របស់យើងមិនទាន់ត្រូវបានធានានោះទេ”។
លោក Powell បានគូសបញ្ជាក់ថា “ប្រសិនបើវាសមស្របក្នុងការរឹតបន្តឹងគោលនយោបាយបន្ថែមទៀត នោះយើងនឹងមិនស្ទាក់ ស្ទើរចិត្តឡើយក្នុងការធ្វើដូច្នេះទៀត”។
យោងតាមសារពត៌មានអាមេរិកCNN បានចុះផ្សាយថា “ប្រសិ នបើធនាគារកណ្តាលអាមេរិក (Federal Reserve) ដំឡើងអត្រាការប្រាក់ម្តងទៀត នោះការដំឡើងម្តងទៀតនេះ អាចនឹងសម្រេចឡើង ក្នុងអំឡុងពេលនៃកិច្ចប្រជុំ គោលនយោបាយរបស់ធនាគារកណ្តាលអាមេរិកនៅក្នុងខែធ្នូខាងមុខ”។
ប៉ុន្តែផ្ទុយទៅវិញ ក្រុមអ្នកវិនិយោគ បានបង្ហាញសុទិដ្ឋិនិយមអំពីការផ្អាក ការដំឡើងអត្រាការប្រាក់ម្តងទៀត នៅក្នុងកិច្ចប្រជុំគោលនយោបាយរបស់ធនាគារកណ្តាលអាមេរិក នៅខែធ្នូខាងមុខនេះ។
លោក Powell បានបន្ថែមថា “តម្រូវការរបស់អ្នកប្រើប្រាស់ត្រូវតែធ្លាក់ចុះ ដើម្បីធ្វើឱ្យធនាគារកណ្តាលអាមេរិក អាចធានាបានថា អតិផរណា កំពុងស្ថិតនៅលើផ្លូវឆ្ពោះ ទៅដល់គោលដៅ២%របស់យើង”។
ជាក់ស្តែង យន្តការរបស់ធនាគារកណ្តាលអាមេរិក (Fed) ក្នុងការដោះស្រាយបញ្ហាអតិផរណា គឺជាមធ្យោបាយ ក្នុងការធ្វើឱ្យតម្រូវការរបស់អ្នកប្រើប្រាស់ធ្លាក់ចុះដោយចេតនា តាមរយៈការដំឡើងអត្រាការប្រាក់ឱ្យកាន់តែខ្ពស់៕
