ដោយគង់ ម៉ាលីន
ភ្នំពេញៈ និយាយពីចំណេះដឹងផ្នែកហិរញ្ញវត្ថុឬចំណដឹងពីលុយ ពិតជាមានការចាប់អារម្មណ៍ ព្រោះអ្នកណាៗក៏ធ្វើការជាមួយនឹងលុយ ដើម្បីលុយនិងភាគមានបានរបស់ខ្លួនផងដែរ។
ហេតុនេះតើចំណេះដឹងហិរញ្ញវត្ថុមានផ្នែកសំខាន់ៗអ្វីខ្លះ? គេហទំព័រCambodiabanknews.com សូមលើកយកចំណុចសំខាន់ៗទាក់ទងនឹងផ្នែកនេះមកពន្យល់ ដើម្បីជម្រាបជូនសាធារណៈជនឲ្យបានជ្រាប។
១ គណនេយ្យ (Accounting)
ចំណេះដឹងផ្នែកគណនេយ្យ ជាចំណេះដឹងផ្នែកហិរញ្ញវត្ថុ ដោយវាជាមូលដ្ធានគ្រឹះ ក្នុងការយល់ផ្នែកហិរញ្ញវត្ថុរបស់អ្នក។ គណនេយ្យ វាមិនត្រឹមតែជាផ្នែកដំបូង ដែលត្រូវយល់ដឹងទាក់ទងនឹងហិរញ្ញវត្ថុនោះទេ ប៉ុន្តែវាក៏ជាចំណុចសំខាន់ផងដែរ ព្រោះបើមិនចេះគណនេយ្យទេ នោះអ្នកនឹងជួបការពិបាកខ្លាំង។
២) ការវិនិយោគ (Investing)
ការវិនិយោគគឺជាវិធីសាស្ត្រនៃការយកលុយ ទៅបង្កើតលុយ។ នៅពេលដែលអ្នកយល់ដឹង ឬក៏ទទួលបានបទសោធច្រើនលើផ្នែកនេះហើយ នោះអ្នកនឹងរកឃើញវិធីសាស្ត្រ ក្នុងការយកលុយទៅបង្កើតជាលុយ បានដោយងាយស្រួល បើទោះបីជាជំហានដំបូងទទួលបានប្រាក់កម្រៃតិចក្ដី ប៉ុន្តែវាក៏ជាការចាប់ផ្ដើមដ៏ល្អផងដែរ។
៣) ការយល់ដឹងអំពីទីផ្សារ (Understanding markets)
ការយល់ដឹងអំពីទីផ្សារ ជាវិធីសាស្ត្រក្នុងការផ្គត់ផ្គង និងតម្រូវការ។ អ្នកត្រូវការដឹងទិដ្ធភាពនៃការឡើងចុះរបស់ទីផ្សារ ដើម្បីជួយអ្នកក្នុងការវិនិយោគឱ្យទទួលបានជោគជ័យ និងកាត់បន្ថយបាននូវហានិភ័យ។
៤) ច្បាប់ (Law)
តើច្បាប់ពិតជាទាក់ទងនឹងលុយឬហិរញ្ញវត្ថុឬ? គឺជាការពិត ព្រោះះមនុស្សដែលយល់ដឹងអំពីគុណប្រយោជន៍របស់ពន្ធ និងការការពារ ដែលត្រូវបានផ្ដល់ឱ្យដោយច្បាប់សាជីវកម្ម អាចមានបានលឿនជាងនរណាម្នាក់ ដែលគ្រាន់តែជាបុគ្គលិកគេ ឬក៏ជាម្ចាស់សហគ្រាសខ្នាត់តូច។
វាដូចជាការខុសប្លែកគ្នារវាងមនុស្សដែលដើរ និងមនុស្សដែលហោះចឹងដែរ។ ភាពខុសគ្នាយ៉ាងខ្លាំង នៅពេលដែលឈានឆ្ពោះទៅកាន់ទ្រព្យសម្បត្តិដ៏មហសាល៕
