ដោយៈ គង់ ម៉ាលីនណា
ភ្នំពេញៈ គណៈប្រតិភូជាន់ខ្ពស់ពីរដ្ឋបាលជលផល ក្រសួងកសិកម្ម រុក្ខាប្រមាញ់ និងនេសាទ សហភាពអឺរ៉ុបប្រចាំនៅកម្ពុជា និងគណកម្មការតម្រង់ទិស កម្មវិធីជំរុញកំណើនវិស័យជលផល ប្រកបដោយចីរភាព និងបរិយាបន្ន បានធ្វើទស្សនកិច្ចនៅតំបន់បឹងទន្លេរសាបកាលពីថ្ងៃទី ២០-២២ ខែកញ្ញា។
ទស្សនកិច្ចនេះ បានបង្ហាញអំពីការរីកចម្រើន របស់គម្រោងនាពេលថ្មីៗទាក់ទិននឹងផ្នែកអប់រំ ការអភិរក្ស និងការលើកកម្ពស់ជីវភាពរស់នៅរបស់សហគមន៍តាមដងទន្លសាប តាមរយៈកម្មវិធីCAPFISHដែលគាំទ្រថវិកាដោយសហភាពអឺរ៉ុប និងអនុវត្តដោយអង្គការអុកស្វាម អង្គការ Save the Children និងអង្គការសមាគមអភិរក្សសត្វព្រៃ (WCS)។
ក្នុងពេលទស្សនកិច្ចនោះ គណៈប្រតិភូ បានជួបពិភាក្សាជាមួយសហគមន៍ សិស្សានុសិស្សថ្នាក់មត្តេយ្យ បឋម និងមធ្យមសិក្សានិងរដ្ឋបាលថ្នាក់តំបន់នៅភូមិថ្នល់ឈើទាល និងតំបន់រ៉ាមសារព្រែកទាល់ ដែលជារមណីយដ្ឋាន ដ៏ មានសារៈសំខាន់នៅតំបន់ឋបនីយជីវមណ្ឌ លបឹងទន្លេសាប ដើម្បីស្វែងយល់អំពីកម្មវិធី និងអត្ថប្រយោជន៍របស់កម្មវិធីដល់សហគមន៍មូលដ្ឋាន។ គណៈប្រតិភូបានឃើញពីផលជាវិជ្ជមាននៃកម្មវិធីទៅលើ ការអភិរក្សធនធានធម្មជាតិ និងការចិញ្ចឹមជីវិតរបស់សហគមន៍ និងបានកោតសរសើរចំពោះកិច្ចសហការរួមគ្នានៃអង្គការពាក់ព័ន្ធ។
កម្មវិធី CAPFISH បានជួយពង្រឹងសហគមន៍នេសាទ ក្នុងខេត្តចំនួន ១០ ក្នុងនោះខេត្តចំនួន៦ ស្ថិតនៅតាមដងទន្លេសាប និងចំនួន ៤ ទៀតស្ថិតនៅបណ្តោយឆ្នេរ ដោយកម្មវិធីនេះផ្តោតលើការនេសាទប្រកបដោយចីរភាព ការអប់រំ ការទទួលបានទឹកស្អាត និងអនាម័យ។ កម្មវិធី CAPFISH ផ្តោតលើការអភិវឌ្ឍប្រកបដោយភាពធន និងបរិយាបន្នក្នុងវិស័យជលផលនៅកម្ពុជា។
លោកឃុន សាវឿន រដ្ឋលេខាធិការ នៃក្រសួងកសិកម្ម រុក្ខាប្រមាញ់ និងនេសាទបានមានប្រសាសន៍ថា “យើងមានសេចក្តីសោមនស្សរីករាយ ដែលបានឃើញពីលទ្ធផលវិជ្ជមាន របស់គម្រោងផ្តល់មូលនិធិដោយសហភាពអឺរ៉ុប នៅបឹងទន្លេសាប ដែលអនុវត្តន៍ដោយ អង្គការOxfam អង្គការ Save the Children និង អង្គការ WCS។ វាគឺជាដំណើរទស្សនកិច្ចដ៏ល្អមួយ ដើម្បីបានមើលឃើញពីភាពរីកចម្រើននៃគម្រោងទាំងនេះ ដល់សហគមន៍មូលដ្ឋាន និងការគ្រប់គ្រងធនធានធម្មជាតិ។
លោកបញ្ជាក់ថា “យើងសូមកោតសរសើរ ដល់កិច្ចខិតខំប្រឹងប្រែងរួមគ្នារបស់អ្នកពាក់ព័ន្ធ ហើយសូមរំលឹកឡើងវិញនូវការប្តេជ្ញាចិត្តរបស់យើង ក្នុងការធ្វើការរួមគ្នា ដើម្បីដោះស្រាយបញ្ហានៅតំបន់បឹងទន្លេរសាប”។
ជាមួយគ្នានេះ លោក Koen EVERAERT អនុប្រធានកិច្ចសហប្រតិបត្តិការនៅសហភាពអឺរ៉ុបប្រចាំកម្ពុជា បានមានប្រសាសន៍ថា “កម្មវិធី EU CAPFISH នៅតែប្តេជ្ញាធ្វើការ ជាមួយក្រសួងកសិកម្ម រុក្ខាប្រមាញ់ និងនេសាទ និងដៃគូអង្គការសង្គមស៊ីវិល ដើម្បីគាំទ្រដល់ការអភិវឌ្ឍន៍ប្រកបដោយចីរភាព ក្នុងវិស័យជលផល និងការអភិរក្សបរិស្ថាននៅកម្ពុជា។
គម្រោងដែលផ្តល់មូលនិធិដោយសហភាពអឺរ៉ុប នៅបឹងទន្លេសាប ធ្វើជាគំរូដល់ចក្ខុវិស័យរួមរបស់យើង ក្នុងការលើកកម្ពស់ការអនុវត្តល្អក្នុងការការពារប្រព័ន្ធអេកូឡូស៊ី និងការកែលម្អជីវភាពរស់នៅរបស់សហគមន៍មូលដ្ឋាន”។
ជាមួយគ្នានេះ លោកស្រី ភាណ សោភ័ណ នាយិកាអង្គការអុកស្វាម មានប្រសាសន៍ថា “តាមយៈគម្រោង “សហគមន៍នេសាទបង្កើតការងារជាសេដ្ឋកិច្ចវិលជុំ នៅបឹងទន្លេសាបខាងលិចក្នុងតំបន់១” ដែលគាំទ្រដោយសហភាពអឺរ៉ុប យើងបានជួយដល់កុមារ ៥៨៣៣ នាក់ បង្កើតក្រុមសេដ្ឋកិច្ចបៃតងចំនួន១៤ ដែលបានជាប្រយោជន៍ដល់គ្រួសារចំនួន១៧៣៩ និងបង្កើតបណ្តាញអេកូទេសចរណ៍ធម្មជាតិ បឹងទន្លេរសាប ដើម្បីជួយសហគមន៍នេសាទបង្កើន ប្រាក់ចំណូលបន្ថែមផងដែរ។
លោក អាលីស្ទែរ ម៉ូល នាយកអង្គការសមាគមអភិរក្សសត្វព្រៃប្រចាំប្រទេសកម្ពុជាបានមានប្រសាសន៍ថា “គម្រោង “ទន្លេសាបយើង” បានកាត់បន្ថយការនេសាទខុសច្បាប់ និងចូលរួមអនុវត្តដំណោះស្រាយល្បាត ដោយប្រើប្រាស់បច្ចេកវិទ្យាអភិរក្ស ដូចជាកម្មវិធី SMART សម្រាប់ល្បាត និងការរាយការណ៍ ការចូលរួមក្នុងសកម្មភាពបន្សាំអាកាសធាតុដូចជា វេទិកាស្រូវប្រកបដោយនិរន្តរភាព ការគ្រប់គ្រងភ្លើងព្រៃ និងការដាំដើមឈើឡើងវិញ សម្រាប់ការអភិរក្សផ្នែកជលផល ជាដើម ដែលទាំងនេះបានចូលរួមកាត់បន្ថយការនសាទខុសច្បាប់នៅក្នុងខេ្តចំនួន៥ ជុំវិញបឹងទន្លេសាប” ។
ចំណែកលោក ហុង រស្មី នាយកប្រចាំប្រទេសនៃអង្គការ Save the Children ប្រចាំកម្ពុជា បានមានប្រសាសន៍ថា “គម្រោង “បង្កើតបរិស្ថានដែលមានភាពស៊ាំ និងលើកកម្ពស់ការអភិវឌ្ឍសេដ្ឋកិច្ចសង្គមនៅតំបន់ភាគខាងកើត បឹងទន្លេរសាប (GREEN)” បានបង្កើនលទ្ធភាពសហគមន៍ចំនួន៦៤៧ គ្រួសារ ក្នុងការទទួលបានទឹកស្អាត និងអនាម័យ និងសម្ភារៈសិក្សាសម្រាប់សិស្សប្រមាណ៤៥០០នាក់៕
