ដោយៈ និស្ស័យ
ភ្នំពេញៈ ទិន្នន័យបានបង្ហាញថា ការនាំចេញសម្លៀកបំពាក់ និងគ្រឿងបន្ទាប់បន្សំ ដែលមានទឹកប្រាក់សរុបជាង៤,៤ ពាន់លានដុល្លារ ត្រូវបានកម្ពុជា នាំចេញទៅទីផ្សារអន្តរជាតិ នៅក្នុងរយៈពេល ៧ ខែនៃឆ្នាំ ២០២៣។
ទំហំទឹកប្រាក់នាំចេញនេះ បានថយចុះជាង២០ភាគរយបើធៀបនឹងរយៈពេលដូចគ្នាឆ្នាំ ២០២២។ នេះបើតាមអគ្គនាយកដ្ឋានគយ និងរដ្ឋាករកម្ពុជា (GDCE)។
តារាងស្ថិតិពាណិជ្ជកម្មនាំចេញទំនិញរបស់ GDCE បង្ហាញថា ចាប់ពីខែមករា ដល់ខែកក្កដា ឆ្នាំ ២០២៣ ការនាំចេញទំនិញក្នុងជំពូក (HS ២ ខ្ទង់) ដែលមានលេខកូដ៦១ និង៦២ រួមមាន សម្លៀកបំពាក់ និងគ្រឿងបន្ទាប់បន្សំ ដែលធ្វើពីក្រណាត់ ឬមិនធ្វើពីក្រណាត់ (Articles of apparel and clothing accessories, Knitted and not knitted or crocheted) មានទឹកប្រាក់សរុប ៤ ៤៦៩,០៣ លានដុល្លារ ធ្លាក់ចុះ ២០,៦៣ ភាគរយពីចំនួន ៥ ៦១៩,៥៥ លានដុល្លារនារយៈពេលដូចគ្នាឆ្នាំ ២០២២។
ទំហំទឹកប្រាក់នាំចេញទំនិញលេខកូដ៦១ និង៦២ មានចំនួនស្មើនឹង ៣៣,០៤ភាគរយ នៃចំនួនទឹកប្រាក់នាំចេញសរុបរបស់កម្ពុជាក្នុងរយៈពេល៧ខែ ឆ្នាំ២០២៣ ដែលមាន១៣,៥២៥,០៩ លានដុល្លារ។
របាយការណ៍បានឱ្យដឹងទៀតថា សម្រាប់ខែកក្កដា ឆ្នាំ ២០២៣ ការនាំចេញផលិតផលលេខកូដ៦១ និង៦២ មានទំហំទឹកប្រាក់ ៨១៤,៦២ លានដុល្លារ ធ្លាក់ចុះ២៦,៥៧ភាគរយ ធៀបនឹងខែកក្កដា ឆ្នាំ ២០២២។
អ្នកស្រាវជ្រាវសេដ្ឋកិច្ចនៃរាជបណ្ឌិត្យសភាកម្ពុជា លោក ហុង វណ្ណៈ បានមានប្រសាសន៍ថា ការធ្លាក់ចុះសកម្មភាព និងចំនួនទឹកប្រាក់ការផ្លាស់ប្តូរពាណិជ្ជកម្មអន្តរជាតិ បានលេចឡើងនៅស្ទើរគ្រប់ប្រទេសប្រមាណ១ឆ្នាំមកហើយ បើទោះបីក្តីបារម្ភពីវិបត្តិជំងឺកូវីដ ១៩ ត្រូវបានបិទបញ្ចប់ហើយក៏ដោយ។
លោកបន្តថា “បញ្ហាកើតមានខាងលើ គឺភាគច្រើនបណ្តាលមកពីឥទ្ធិពលនៃជម្លោះភូមិសាស្ត្រនយោបាយ ប្រទេសមហាអំណាចធំៗ និងសង្គ្រាមនៅប្រទេសអ៊ុយក្រែន”។ លោកបន្តថា “ចរន្តនៃការធ្លាក់ចុះនេះ គឺកើតឡើងស្ទើរគ្រប់មុខទំនិញ និងគ្រប់ប្រទេសទាំងអស់”។
អគ្គលេខាធិការរងសមាគមរោងចក្រកាត់ដេរនៅកម្ពុជា (GMAC) លោក កាំង ម៉ូនីកាបានមានប្រសាសន៍ឲ្យដឹងកន្លងមកថា ការនាំចេញផលិតផលសម្លៀកបំពាក់កម្ពុជា ទៅទីផ្សារអន្តរជាតិ គឺបានធ្លាក់ចុះចាប់តាំងពីឆមាសទី២ ឆ្នាំ២០២២។ មូលហេតុគឺដោយសារសេដ្ឋកិច្ចប្រទេសធំៗជួបបញ្ហា ដែលបណ្តាលពីសង្គ្រាមរវាងរុស្ស៊ី និងអ៊ុយក្រែន។
ទីផ្សារសំខាន់ៗ សម្រាប់ផលិតផលសម្លៀកបំពាក់កម្ពុជា គឺអាមេរិក សហភាពអឺរ៉ុប ជប៉ុន កាណាដា និងចក្រភពអង់គ្លេស៕
