ទំនុកចិត្ត និងសុទិដ្ឋិនិយមរបស់អ្នកប្រើប្រាស់នៅសហរដ្ឋអាមេរិកធ្លាក់ចុះជាលើកដំបូងនៅក្នុងខែសីហា

ដោយ: គង់ លាងហួរ

អន្តរជាតិ: យោងតាមការចុះផ្សាយ ដោយសារពត៌មាន CNN បានឱ្យដឹងថា ពលរដ្ឋអាមេរិកមានសុទិដ្ឋិនិយមតិចជាងមុន អំពីសេដ្ឋកិច្ចនៅខែសីហានេះ បន្ទាប់ពីទំនុកចិត្តអ្នកប្រើប្រាស់ បានកើនឡើង២ខែជាប់ៗគ្នា។

អារម្មណ៍អ្នកប្រើប្រាស់ (Consumer sentiment) ដែលត្រូវបានសង្កេតតាមដាន ដោយសាកលវិទ្យាល័យ Michigan បានធ្លាក់ចុះដល់៧១,២ពិន្ទុ នៅក្នុងខែសីហា ពោលគឺធ្លាក់ចុះពី៧១,៦ពិន្ទុ ក្នុងខែកក្កដា។ នេះបើយោងតាមការប៉ាន់ស្មានបឋម។

លោក Joanne Hsu នាយកផ្នែកអង្កេតនៃសាកលវិទ្យាល័យ Michigan បានមានប្រសាសន៍ថា ជាទូទៅ អ្នកប្រើប្រាស់បានយល់ឃើញពីភាពខុសគ្នាសំខាន់ៗមួយចំនួន នៅក្នុងបរិយាកាសសេដ្ឋកិច្ចចាប់ពីខែមុន ប៉ុន្តែពួកគេបានមើលឃើញ ភាពប្រសើរឡើងយ៉ាងច្រើនដែលទាក់ទងទៅនឹងកាលពី៣ខែមុន”។ចំណែកឯ ការរំពឹងទុកសម្រាប់អត្រាអតិផរណា នៅឆ្នាំខាងមុខបានធ្លាក់ចុះដល់៣,៣% ពី៣,៤% នៅក្នុងការព្យាករពីមុន។

តម្លៃឧស្ម័ន ដែលជាសូចនាករនៃអតិផរណា សម្រាប់អ្នកប្រើប្រាស់ បានកើនឡើងក្នុងរយៈពេលប៉ុន្មានសប្តាហ៍ថ្មីៗនេះ ដែលអាចធ្វើឱ្យអារម្មណ៍អ្នកប្រើប្រាស់ធ្លាក់ចុះនាពេលអនាគត។

លើសពីនេះ សន្ទស្សន៍តម្លៃទំនិញប្រើប្រាស់ (CPI) បានកើនឡើង៣,២% នៅក្នុងខែកក្កដា ធៀបនឹងឆ្នាំមុន ពោលគឺកើនឡើងពីកំណើនប្រចាំឆ្នាំ៣% ក្នុងខែមិថុនា ទោះបីជាសម្ពាធតម្លៃមូលដ្ឋានបានបន្តធ្លាក់ចុះយ៉ាងណាក្តី។

លោក Ryan Sweet ប្រធានសេដ្ឋវិទូអាមេរិក នៅក្រុមហ៊ុន Oxford Economics បានសរសេរថា “រង្វាស់ទំនុកចិត្តអ្នកប្រើប្រាស់របស់សាកលវិទ្យាល័យ Michigan បានធ្លាក់ចុះក្នុងខែសីហា ប៉ុន្តែវាទំនងជានឹងធ្លាក់ចុះបន្ថែមទៀត ដោយសារតែការកើនឡើងនៃតម្លៃប្រេងសាំងលក់រាយនាពេលថ្មីៗនេះ”៕