ដោយៈ គង់ សូរិយា
ភ្នំពេញៈ រដ្ឋាភិបាលកម្ពុជាក្នុងឆ្នាំ២០២៣ នេះ បានឧបត្ថម្ភធនជំនួសលើវិស័យអគ្គិសនី ចំនួន ១៥០ លានដុល្លារអាមេរិក ស្របពេលថ្លៃ ដើមផលិតបានហក់ឡើងខ្ពស់ ដើម្បីគាំទ្រដល់ការស្តារសេដ្ឋកិច្ចឡើងវិញ សម្រាប់ស្ថិរភាពសេដ្ឋកិច្ច-សង្គម និងជីវភាពរស់នៅរបស់ប្រជាជន។
លោក កែវ រតនៈ រដ្ឋមន្រ្តីប្រតិភូអមនាយករដ្ឋមន្រ្តី និងជាប្រតិភូរាជរដ្ឋាភិបាល ទទួលបន្ទុកជាអគ្គនាយកអគ្គិសនីកម្ពុជាបានមានប្រសាសន៍ឲ្យដឹងកាលពីពេលថ្មីៗនេះថា ការអភិវឌ្ឍវិស័យអគ្គិសនីនៅកម្ពុជា មកដល់បច្ចុប្បន្នមានភាពគ្រប់គ្រាន់ មិនមានការខ្វះខាតនោះឡើយ ចំណែកសម្រាប់ការជួបប្រទះ លើបញ្ហាដាច់ភ្លើងមួយចំនួន គឺមិនមែនកើតឡើង ដោយសារបញ្ហាកង្វះភ្លើងនោះឡើយ គឺការកើតឡើងនៃការរំខានដូចជាការជីក គាស់ បណ្តាលឲ្យប៉ះខ្សែភ្លើងជាដើម។
លោកបញ្ជាក់ថា “ការផ្គត់ផ្គង់អគ្គិសនីបច្ចុប្បន្ន គឺគ្រប់គ្រាន់ដើម្បីបំពេញតម្រូវការ នៃការអភិវឌ្ឍរួមទាំងឧស្សាហកម្ម រោងចក្រ សហគ្រាស និងគ្រួសារ”។លោកបន្តថា “ដូច្នេះចំពោះ អ្នកធ្វើធុកិរច្ច និងវិនិយោគិន ដែលមានបំណងមកបណ្តាក់ទុនរកស៊ីទទួលនៅកម្ពុជា ក៏ដូចអ្នកកំពុងធ្វើការវិនិយោគនៅក្នុងស្រុក និងប្រជាពលរដ្ឋផងដែរ ប្រសិនមានតម្រូវការលើវិស័យថាមពល សូមកុំមានការព្រួយបារម្ភណ៍នៅលើតម្រូវការថាមពល ដោយកម្ពុជាបច្ចុប្បន្ន មានអគ្គិសនីគ្រប់គ្រាន់ អាចទាក់ទងបានគ្រប់ពេលវេលា ក្នុងការភ្ជាប់បណ្តាញទៅកាន់គម្រោងអភិវឌ្ឍន៍នានា”។
ជម្លោះរុស្ស៊ី-អ៊ុយក្រែន និងទណ្ឌកម្មដែលដាក់ដោយប្រទេសលោកខាងលិចមកលើរុស្ស៊ី បានបណ្តាលឱ្យមានការកើនឡើងយ៉ាងខ្លាំងនៃតម្លៃថាមពលពិភពលោក។មានប្រទេសមួយចំនួនបានតម្លើង ថ្លៃអគ្គិសនី ប៉ុន្តែកម្ពុជាមិនទាន់ដំឡើងថ្លៃអគ្គិសនីនៅឡើយទេ។កាលពីឆ្នាំ២០២២ ថវិកាប្រមាណ១០០លានដុល្លារត្រូវបានឧបត្ថម្ភធនដោយ EDC ដើម្បីរក្សាស្ថិរភាពតម្លៃអគ្គិសនី។
កម្ពុជាបច្ចុប្បន្នមានសមត្ថភាព ផលិតថាមពលអគ្គិសនីក្នុងស្រុកបានចំនួន ៣,៤៦៤ មេហ្គាវ៉ាត់ ពីថាមពលពន្លឺព្រះអាទិត្យ ថាមពលវារីអគ្គិសនី ជីវម៉ាស ធ្យូងថ្ម និងប្រេង ហើយតម្រូវការអគ្គិសនីខ្ពស់បំផុតនាពេលបច្ចុប្បន្ន គឺមានតែប្រហែល ២,៤០០ មេហ្គាវ៉ាត់ប៉ុណ្ណោះ នេះបើយោងតាមរបាយការណ៍របស់អាជ្ញាធរអគ្គិសនីកម្ពុជា។
របាយការណ៍នេះបានចង្អុលបង្ហាញថា កម្ពុជាមានសមត្ថភាពផលិតថាមពលច្រើនជាងតម្រូវការ ហើយប្រទេសនេះមិនមានការខ្វះខាតអគ្គិសនីនោះទេ។ត្រឹមឆ្នាំ ២០២២ កម្ពុជាផលិតអគ្គិសនីខ្លួនឯងចំនួន៨០ភាគរយ ខណៈត្រឹម២០ភាគរយ ទិញពីប្រទេសជិតខាង រួមទាំងឡាវ វៀតណាម និងថៃ។
កាលពីថ្មីៗនេះ កម្ពុជាបានដាក់ចេញនូវគោលនយោបាយជាតិប្រសិទ្ធភាពថាមពលឆ្នាំ ២០២២-២០៣០ ក្នុងគោលបំណងកាត់បន្ថយការប្រើប្រាស់ថាមពល តាមរយៈការជំរុញប្រសិទ្ធភាពថាមពល និងជំរុញការអភិវឌ្ឍប្រកបដោយចីរភាព។
សម្តេចតេជោហ៊ុន សែននាយករដ្ឋមន្រ្តីនៃកម្ពុជាបានប្រសាសន៍កាលពីខែឧសភាថា ថាមពលដ៏មានប្រសិទ្ឋភាពគាំទ្រខ្លាំង លើមហិច្ឆតារបស់យើង ដើម្បីកាត់បន្ថយការពឹងផ្អែករបស់កម្ពុជា លើការនាំចូលថាមពល និងកាត់បន្ថយតម្រូវការសម្រាប់ការវិនិយោគ លើហេដ្ឋរចនាសម្ព័ន្ឋថាមពលថ្មី ដែលនឹងនាំឱ្យមានការកាត់បន្ថយតម្លៃថាមពលអ្នកប្រើប្រាស់ចុងក្រោយផងដែរ៕
