ដោយ: គង់ លាងហួរ
ភ្នំពេញ: យោងតាមការចុះផ្សាយ ដោយសារពត៌មានអន្តរជាតិ Asean Briefing បានឱ្យដឹងថា កម្ពុជាបានអនុម័តច្បាប់ស្តីពី វិធានដើមកំណើតទំនិញ (ROO) ថ្មី ដែលស្របតាមស្តង់ដារ កំណត់ដោយអង្គការពាណិជ្ជកម្មពិភពលោក (WTO)។
គោលបំណងនៃច្បាប់នេះ គឺដើម្បីកំណត់អំពីគោលការណ៍ និងវិធាន ស្ដីពីដើមកំណើតនៃទំនិញនាំចេញ-ទំនិញនាំចូល ជំរុញ និងសម្រួលពាណិជ្ជកម្ម ដែលទទួលបានប្រយោជន៍ ពីការអនុគ្រោះពាណិជ្ជកម្ម និងការអនុវត្តក្រៅប្រព័ន្ធអនុគ្រោះពាណិជ្ជកម្ម ព្រមទាំងចូលរួមទប់ស្កាត់ការក្លែងបន្លំដើមកំណើតទំនិញ។
កាលថ្ងៃទី៥ ខែកក្កដា ឆ្នាំ២០២៣ រដ្ឋាភិបាលកម្ពុជាបានអនុម័តច្បាប់ស្តីពីវិធានដើមកំណើតទំនិញ (ROO) ថ្មីមួយដើម្បីសម្របតាមស្តង់ដាររបស់អង្គការ WTO។
ច្បាប់ថ្មីនេះ នឹងផ្តល់ឱ្យអាជីវកម្មនូវលក្ខណៈវិនិច្ឆ័យ ច្បាស់លាស់ និងមានឯកសណ្ឋានសម្រាប់កំណត់ប្រភពនៃផលិតផល។
ច្បាប់ ROO ថ្មីនេះត្រូវបានបង្កើតឡើង ដោយមានជំនួយពីអង្គការ WTO និងសន្និសីទអង្គការសហប្រជាជាតិស្តីពីពាណិជ្ជកម្ម និងការអភិវឌ្ឍន៍ (UNCTAD) ដោយធានាបាននូវភាពស៊ីសង្វាក់គ្នា ជាមួយនឹងកិច្ចព្រមព្រៀងពាណិជ្ជកម្មសេរី ដែលមានស្រាប់ (FTAs) និងកិច្ចព្រមព្រៀង ជាមួយបណ្តាប្រទេសសមាជិកអង្គការ WTO ផ្សេងៗទៀត។
បន្ថែមពីលើការសម្របសម្រួលដល់ពាណិជ្ជកម្ម វិញ្ញាបនបត្រនៃប្រភពដើមកំណើត (COO) ក៏អាចជួយកែលម្អការទទួលស្គាល់ផលិតផល បង្កើនតម្លៃយីហោ និងការពារការក្លែងបន្លំ ដោយផ្តល់ឱ្យអ្នកទិញនូវភស្តុតាងនៃប្រភពដើម និងគុណភាពនៃផលិតផលផងដែរ។
ច្បាប់ROOថ្មីនេះរបស់កម្ពុជា ត្រូវបានគេរំពឹងយ៉ាងទូលំទូលាយថា នឹងពង្រឹងភាពជាដៃគូពាណិជ្ជកម្មបរទេសរបស់ខ្លួន។ ច្បាប់ ROO នឹងផ្តល់នូវភាពច្បាស់លាស់ និងការព្យាករសម្រាប់ពាណិជ្ជករបរទេស ជាពិសេសសម្រាប់ពាណិជ្ជករ មកពីបណ្តាប្រទេស ដែលមិនមែនជាផ្នែកមួយនៃកិច្ចព្រមព្រៀង FTA ដែលមានស្រាប់ជាមួយកម្ពុជា។
ច្បាប់ROO ថ្មីនេះនឹងធានាថា អ្នកនាំចេញរបស់កម្ពុជាអាចទទួលបានអត្ថប្រយោជន៍ ពីការអនុគ្រោះពន្ធដល់ផលិតផល ដែលត្រូវបានផលិតទាំងស្រុង ឬផលិតក្នុងស្រុក ពីព្រោះថា ពួកគេនឹងអាចបញ្ជាក់បានកាន់តែច្បាស់ពីប្រភពដើម នៅក្នុងប្រទេសកម្ពុជា ដែលកត្តានេះ ក៏អាចជួយបង្កើនការនាំចេញសរុប និងជំរុញកំណើនសេដ្ឋកិច្ចរបស់កម្ពុជាផងដែរ៕
