ដោយៈលក្ខិណា
ភ្នំពេញៈ ក្រុមអ្នកជំនួញវិស័យសម្ភារៈសំណង់ នៅក្នុងប្រទេសកម្ពុជាបានអះអាងថា តម្រូវការគ្រឿងសំណង់នាពេលបច្ចុប្បន្ននេះ នៅតែមានកំណើនខ្ពស់ ជាងវិស័យដទៃ បើទោះបីបណ្តាខេត្តមួយចំនួន បានជួបប្រទះគ្រោះទឹកជំនន់យ៉ាងធ្ងន់ធ្ងរ និងបញ្ហាជាសាកលនៃវិបត្តិកូវីដ១៩ បន្តអូសបន្លាយនៅលើពិភពលោក ក៏ដូចជាក្នុប្រទេសកម្ពុជាយ៉ាងណាក៏ដោយ។
លោក ឡុង ពិសិដ្ធ តំណាងក្រុមហ៊ុននាំចូល និងចែកចាយគ្រឿងសំណង់ និងជានាយកប្រតិបត្តិក្រុមហ៊ុនហ៊ួតជាបានលើកឡើងថា ដោយផ្អែកលើស្ថានភាពជីវភាពរបស់ប្រជាពលរដ្ឋមានភាពល្អប្រសើរ សំណង់អគារ លំនៅដ្ឋានតូច ធំ កំពុងមានសកម្មភាពការសាងសង់យ៉ាងផុសផុល មិនថាទីក្រុង ទីប្រជុំជន ឬជនបទនោះទេ ហើយបច្ចុប្បន្ននេះគ្រឿងសំណង់នៅតែមានតម្រូវការខ្ពស់គួរឱ្យកត់សម្គាល់។
លោកបន្តថា “ក្រុមហ៊ុននាំចូលនិងចែកចាយគ្រឿងសំណង់ ដែលមានម៉ាកយីហោត្រឹមត្រូវ និងមានការទទួលខុសត្រូវខ្ពស់ លើគុណភាព នៅតែមានការគាំទ្រពីសំណាក់អ្នកប្រើប្រាស់ក្នុងប្រទេសនោះបាន និងកំពុងដើរឈានមុខគេ នៅក្នុងទីផ្សារវិស័យមួយនេះ ជាងក្រុមហ៊ុនដែលនាំចូល មិនមានម៉ាកយីហោត្រឹមត្រូវ ដែលអាចប្រឈមនឹងការដួលរលំអាជីវកម្មរបស់ខ្លួនទៅវិញ” ។
លោកបន្តថា នៅក្នុងពេលកម្ពុជាជួបវិបត្តិ ដោយសារតែជំងឺរាតត្បាតសាកល និងគ្រោះទឹកជំនន់ក្ដី សម្រាប់ក្រុមហ៊ុន លោកបាននិងកំពុងលេចធ្លោខ្លាំងជាងគេ នៅចុងឆ្នាំ២០២០នេះ ហើយក៏កំពុងបន្តសហការចាប់ដៃគូ ពង្រីកសាខាថ្មីរបស់ខ្លួន នៅតាមប ណ្តារាជធានី ខេត្តជាបន្តបន្ទាប់ទៀត ដើម្បីឆ្លើយតបនឹងសេចក្តីត្រូវការចាំបាច់របស់អតិថិជន ដែលកំពុងមានតម្រូវការលើវិស័យគ្រឿងសំណង់ ទូទាំងប្រទេសកម្ពុជា។
លោក ហួត សារិទ្ធ ជាម្ចាស់ដេប៉ូគ្រឿងសំណង់ប្រចាំក្រុងបាវិត ក៏បានបញ្ជាក់ថា ដោយមើលឃើញ ពីតម្រូវការគ្រឿងសំណង់នៅក្នុងតំបន់នេះ មានតម្រូវការច្រើន លោកក៏បានសម្រេច បើកសាខាថ្មីនៅក្រុងបាវិត ដើម្បីចែកចាយបន្ត នូវគ្រឿងសំណង់ ដែលមានគុណភាព ជូនអតិថិជន កុំឱ្យពួកគាត់ពិបាក ក្នុងការស្វែងរកគ្រឿងសំណង់ នៅតំបន់ឆ្ងាយ។
យ៉ាងណាក្ដី សម្រាប់អ្នកវាយតម្លៃអចលនវត្ថុកម្ពុជា ជាច្រើនបានលើកឡើងថា គម្រោងមួយចំនួន ដែលបានគ្រោងមុនកូវីដ១៩ គឺនៅតែបន្តដាក់ទុនវិនិយោគ និងសាងសង់ជាបន្តបន្ទាប់ តែសម្រាប់គម្រោងខ្លះ ដែលជួបវិបត្តិដោយសារតែហិរញ្ញវត្ថុ ឬដោយសារតែកង្វះកំលាំងពលកម្ម ក៏បានផ្អាកសកម្មភាពសាងសង់មួយរយៈ។
យ៉ាងណាសម្រាប់គម្រោងធំៗ មិនទាន់មានគម្រោងណាមួយ ត្រូវជាប់គាំងនៅឡើយទេ ហើយសម្រាប់វិស័យសំណង់លំនៅឋាន បុរី ទាំងនៅភ្នំពេញ និងតាមបណ្ដាខេត្ត ក៏ឃើញថានៅតែបន្តអភិវឌ្ឍន៍ ដើម្បីផ្គត់ផ្គង់តាមតម្រូវការនៅឡើយ៕
