ដោយ: គង់ លាងហួរ
ភ្នំពេញ: យោងតាមរបាយការណ៍ ពីអគ្គនាយកដ្ឋានកៅស៊ូកាលពីថ្ងៃពុធបានឱ្យដឹងថា ប្រទេសកម្ពុជាបាននាំចេញកៅស៊ូ ស្ងួតចំនួន១០៧.៩៣៨តោន ក្នុងរយៈពេលប្រាំខែដំបូងនៃឆ្នាំនេះ កើនឡើង២,៥ភាគរយធៀបនឹងចំនួន១០៥.២៤៨តោន ដែលបាននាំចេញក្នុងរយៈពេលដូចគ្នាកាលពីឆ្នាំមុន។
របាយការណ៍ខាងលើបានបន្តទៀតថា កម្ពុជារកប្រាក់ចំណូលបាន១៤៥,៨លានដុល្លារអាមេរិក ពីការនាំចេញកៅស៊ូ នៅក្នុងអំឡុងខែមករាដល់ខែឧសភាឆ្នាំនេះ ធ្លាក់ចុះ១៣,៥ភាគរយ បើធៀបនឹង១៦៨,៧លានដុល្លារ ដែលរកបានកាលពីឆ្នាំមុន។
លោក ហ៊ឹម អូន អគ្គនាយកនៃអគ្គនាយកដ្ឋានកៅស៊ូបានបញ្ជាក់នៅក្នុងរបាយការណ៍នោះថា “កៅស៊ូស្ងួតមួយតោនជាមធ្យម មានតម្លៃ១.៣៥១ដុល្លារអាមេរិក ក្នុងរយៈពេល៥ខែដំបូងនៃឆ្នាំនេះ ពោលគឺធ្លាក់ចុះប្រហែល២៥២ដុល្លារ បើធៀបនឹងរយៈពេលដូចគ្នាកាលពីឆ្នាំមុន”។
ជាក់ស្តែង ប្រទេសកម្ពុជាបាននាំចេញទំនិញកៅស៊ូ ជាចម្បងទៅកាន់ប្រទេសម៉ាឡេស៊ី ប្រទេសវៀតណាម ប្រទេសសិង្ហបុរី និងប្រទេសចិនផងដែរ។
របាយការណ៍ដដែលបានឲ្យដឹងទៀតថា គិតរហូតមកដល់ពេលនេះ កម្ពុជាបានដាំដើមកៅស៊ូលើផ្ទៃដី សរុបទំហំ៤០៤.៥៧៨ហិកតា ក្នុងនោះដើមកៅស៊ូ លើផ្ទៃដីទំហំ៣១៥.៣៣២ហិកតា មានអាយុគ្រប់គ្រាន់អាចប្រមូលផលបាន៕
