ដោយ: គង់ លាងហួរ
អន្តរជាតិ: អ្នកជំនាញជាច្រើនបានផ្តល់ដំបូន្មាន ដល់វិនិយោគិនឱ្យបង្វែរការយកចិត្តទុកដាក់របស់ពួកគេ ទៅលើភាគហ៊ុនរបស់ប្រទេ សចិន ដើម្បីឲ្យស្របតាមនិន្នាការនៃកំណើនសេដ្ឋកិច្ច។
លោក Robert Penaloza នាយកប្រតិបត្តិនៃក្រុមហ៊ុនគ្រប់គ្រងទ្រព្យសកម្ម Abrdn Thailand បានលើកឡើងថា ប្រទេសចិនកំពុងទាក់ទាញការផ្តោតអារម្មណ៍ របស់អ្នកវិនិយោគសកល ក្នុងពិភពលោកមួយ ដែលសេដ្ឋកិច្ចប្រទេសជាច្រើនកំពុងវិវត្តន៍ ក្នុងល្បឿនមិនធ្លាប់មាន។
លោកបានបន្តថា “ប្រទេសចិនមានប្រជាជន១,៤ពាន់លាននាក់ និងមាននិស្សិត៤,៧លាននាក់ ដែលបានបញ្ចប់ការសិក្សាពីសកលវិទ្យាល័យជារៀងរាល់ឆ្នាំ”។ លោកបានបន្ថែមថា “សេដ្ឋកិច្ចរបស់ប្រទេសចិនឥឡូវនេះ នាំមុខគេលើពិភពលោក ក្នុងវិស័យកសិកម្ម និងថាមពលកកើតឡើងវិញ”។
លោកបានបន្តឱ្យដឹងទៀតថា ប្រទេសចិនកំពុងបោះទុនវិនិយោគជាង១,៤ពាន់ពាន់លានដុល្លារ ទៅក្នុងបច្ចេកវិទ្យាថ្មីៗជាពិសេសក្នុងវិស័យបញ្ញាសិប្បនិម្មិត។ ជាលទ្ធផល ទីផ្សារភាគហ៊ុនចិន A-share គឺជារលកនៃឱកាស ដែលអាចបង្កឱ្យមានការផ្លាស់ប្តូរ ការវិនិយោគពេញមួយជីវិត។
ទីផ្សារភាគហ៊ុនចិន A-share មានក្រុមហ៊ុនជាច្រើនចុះបញ្ជីនៅផ្សារហ៊ុនសៀងហៃ និងផ្សារហ៊ុន Shenzhen ហើយ៩០ភាគរយនៃអ្នកវិនិយោគសរុប គឺជាអ្នកវិនិយោគលក់រាយ ខណៈដែលមានតែ១០ភាគរយប៉ុណ្ណោះជាជនបរទេស។
ទីផ្សារភាគហ៊ុនចិនA-share ជួញដូរជាប្រាក់យ័នចិន ហើយខុសពីទីផ្សារភាគហ៊ុន B-share ដែលប្រើរូបិយប័ណ្ណបរទេស និងផ្តល់ភាគហ៊ុន ដែលអាចរកបានយ៉ាងទូលំទូលាយ សម្រាប់អ្នកវិនិយោគបរទេស។
សេដ្ឋកិច្ចចិនកំពុងងើបឡើងវិញ
លោកស្រីសាស្ត្រាចារ្យ Aksornsri Phanishsarn អ្នកជំនាញសេដ្ឋកិច្ចចិន នៅមហាវិទ្យាល័យសេដ្ឋកិច្ច នៃសកលវិទ្យាល័យ Thammasat បានមានប្រសាសន៍ថា សេដ្ឋកិច្ចរបស់ប្រទេសចិនបានងើបចេញពីវិបត្តិ ប៉ុន្តែនៅតែស្ថិតក្នុងរបៀប នៃការងើបឡើងវិញ ហើយអាចត្រូវការពេលវេលា ដើម្បីវិលត្រឡប់ទៅរក១០០%ឡើងវិញ។
លោកស្រីក៏បានលើកឡើង ពីហេតុផលដើម្បីឱ្យវិនិយោគិនមានទំនុកចិត្ត លើការគ្រប់គ្រងសេដ្ឋកិច្ច របស់រដ្ឋាភិបាលចិនផងដែរ។ ក្នុងចំណោមនោះ សេដ្ឋកិច្ចរបស់ប្រទេសចិន នឹងត្រូវបានជំរុញដោយមនុស្សជំនាន់ថ្មី ដែលមានការរីកចម្រើន និងជាតិនិយមដែលគេស្គាល់ថាជា“ជំនាន់Xi”។
លោកស្រីបានបន្តថា “រដ្ឋាភិបាលចិនពេលនេះ កំពុងព្យាយាមគ្រប់យ៉ាង ក្នុងគោលនយោបាយរូបិយវត្ថុរបស់ខ្លួន ដើម្បីលើកទឹកចិត្តប្រជាជនចិនឱ្យចំណាយប្រាក់ និងរក្សាសេដ្ឋកិច្ចឱ្យដើរទៅមុខ”។
លោកស្រីបានបន្ថែមថា “ប្រទេសចិន ក៏កំពុងផ្តោតលើសេដ្ឋកិច្ចដែលជំរុញដោយទិន្នន័យ និងការផលិតនៅក្នុងស្រុក ជាជាងការនាំចូល ដើម្បីបន្ធូរបន្ថយការពឹងផ្អែកលើបរទេសផងដែរ”។
ទោះជាយ៉ាងណាក្តី លោកស្រីក៏បានក្រើនរំលឹកផងដែរថា បញ្ហាភូមិសាស្ត្រានយោបាយ អាចបង្កបញ្ហាប្រឈមសម្រាប់សេដ្ឋកិច្ចរបស់ប្រទេសចិន ដោយលើកឡើងពីសង្គ្រាមពាណិជ្ជកម្ម រវាងសហរដ្ឋអាមេរិក និងចិន និងភាពតានតឹងជុំវិញឯករាជ្យភាពរបស់តៃវ៉ាន់។
លោកស្រីបានបញ្ជាក់ទៀតថា ការយកកោះតៃវ៉ាន់មកធ្វើជាទឹកដីរបស់ប្រទេសចិនវិញ គឺជាគោលដៅសំខាន់របស់រដ្ឋាភិបាលលោកប្រធានាធិបតី ស៊ី ជីនពីង៕
