ដោយ: គង់ លាងហួរ
សិង្ហបុរី: ផ្សារហ៊ុននៅតំបន់អាស៊ីហក់ឡើងថ្លៃនៅថ្ងៃសុក្រនេះ ខណៈមានវឌ្ឍនភាពលើច្បាប់ដំឡើងពិដានបំណុលរបស់សហរដ្ឋអាមេរិក និងបង្កើនក្តីសង្ឃឹមថា ធនាគារកណ្តាលអាចនឹងរក្សាអត្រាការប្រាក់នៅដដែលក្នុងកិច្ចប្រជុំបន្ទាប់ ដែលបានជួយបង្កើនចំណង់របស់វិនិយោគិនសម្រាប់ទ្រព្យសកម្មដែលមានហានិភ័យ។
លោក Chuck Schumer មេដឹកនាំសំឡេងភាគច្រើននៃគណបក្សប្រជាធិបតេយ្យបានឱ្យដឹង បន្ទាប់ពីសភាតំណាងរាស្រ្តបានអនុម័តសេចក្តីព្រាងច្បាប់នេះកាលពីថ្ងៃពុធថា ព្រឹទ្ធសភាសហរដ្ឋអាមេរិកកំពុងស្ថិតនៅលើផ្លូវដើម្បីអនុម័តសេចក្តីព្រាងច្បាប់មួយដើម្បីបង្កើនពិដានបំណុលកាលពីល្ងាចថ្ងៃព្រហស្បតិ៍នៅទីក្រុងវ៉ាស៊ីនតោន។
ក្រសួងរតនាគារអាមេរិកបានព្រមានថា ខ្លួននឹងមិនអាចទូទាត់វិក្កយបត្ររបស់ខ្លួនទាំងអស់នៅថ្ងៃទី៥ ខែមិថុនា ប្រសិនបើសភាបរាជ័យក្នុងការធ្វើសកម្មភាព។
សន្ទស្សន៍ផ្សារហ៊ុនអាស៊ីប៉ាស៊ីហ្វិកដ៏ធំបំផុតរបស់MSCI នៅក្រៅប្រទេសជប៉ុនបានហក់ឡើង១,១៣ភាគរយ។ សន្ទស្សន៍ S&P/ASX 200 របស់អូស្ត្រាលីបានហក់ឡើង០,៥៧ភាគរយ ខណៈ Nikkei របស់ជប៉ុនហក់ឡើង០,៧១ភាគរយ។
ផ្សារហ៊ុនរបស់ប្រទេសចិនត្រូវបានរំខានដោយការព្រួយបារម្ភអំពីការស្តារឡើងវិញនៃសេដ្ឋកិច្ចក្រោយជំងឺកូវីដ។ សន្ទស្សន៍ Shanghai Composite ត្រូវបានកំណត់ឱ្យបើកខ្ពស់ជាងមុន០,២% ខណៈដែលសន្ទស្សន៍ Hang Seng របស់ហុងកុងត្រូវបានកំណត់ឱ្យបើកខ្ពស់ជាងមុន២% ។
ទិន្នន័យពេញមួយយប់បានបង្ហាញពីចំនួនជនជាតិអាមេរិកដែលដាក់ពាក្យបណ្តឹងថ្មីសម្រាប់អត្ថប្រយោជន៍អត់ការងារធ្វើបានកើនឡើងតិចតួចកាលពីសប្តាហ៍មុន ហើយនិយោជកឯកជនបានជួលកម្មករច្រើនជាងការរំពឹងទុកនៅក្នុងខែឧសភា ដោយចង្អុលទៅការបន្តភាពតឹងតែងនៃទីផ្សារការងារ។
នៅក្នុងទីផ្សាររូបិយប័ណ្ណ សន្ទស្សន៍ប្រាក់ដុល្លារដែលវាស់វែងរូបិយប័ណ្ណអាមេរិកធៀបនឹងដៃគូរសំខាន់ៗចំនួនប្រាំមួយបាននៅទ្រឹង បន្ទាប់ពីបានដាំក្បាលចុះ០,៦ភាគរយពេញមួយយប់ ដោយប្រាក់អឺរ៉ូហក់ឡើងថ្លៃ០,០១ភាគរយដល់១,០៧៦២ដុល្លារក្នុង១អឺរ៉ូ៕
