ដោយ: គង់ លាងហួរ
ភ្នំពេញ: មន្ត្រីជាន់ខ្ពស់មួយរូបបានលើកឡើងថា ចំនួនគណនីជួញដូរនៅផ្សារមូលបត្រកម្ពុជា (CSX) កំពុងតែកើនឡើង ដែលការជួញដូរភាគច្រើនមានទំហំតូច ដែលឆ្លុះបញ្ចាំងពីការកើនឡើងនៃចំណាប់អារម្មណ៍របស់សាធារណជន និងអ្នកវិនិយោគថ្មីនៅក្នុងទីផ្សារភាគហ៊ុនក្នុងស្រុក។
លោក ហុង សុហួរ នាយកប្រតិបត្តិនៃផ្សារមូលបត្រកម្ពុជា បានមានប្រសាសន៍ថា ទោះបីជាមានការថយចុះនៃទំហំពាណិជ្ជកម្មមកត្រឹម៣០០.០០០ដុល្លារក្នុងមួយថ្ងៃយ៉ាងណាក្តី ប៉ុន្តែចំនួនគណនីជួញដូរនៅលើផ្សារហ៊ុន CSX បានកើនឡើងដល់ជាមធ្យម៤០.០០០គណនី នៅក្នុងរយៈពេលបួនខែដំបូងនៃឆ្នាំនេះ។
លោកបានបន្តថា “ទោះបីជាមានភាពមិនប្រាកដប្រជានៃសេដ្ឋកិច្ចពិភពលោកយ៉ាងណាក្តី ប៉ុន្តែ CSX នៅតែស្ថិតនៅលើផ្លូវសម្រាប់កំណើនវិជ្ជមាន។ ចំនួនគណនីជួញដូរបានកើនឡើងយ៉ាងខ្លាំងដល់៤០.០០០គណនី ក្នុងរយៈពេលបួនខែដំបូង”។
នាយកប្រតិបត្តិផ្សារមូលបត្រកម្ពុជារូបនេះបានឱ្យដឹងទៀតថា ចំនួនគណនីជួញដូរជាមធ្យមត្រូវបានគេរំពឹងថា នឹងកើនឡើងដល់៥០.០០០គណនីនៅចុងឆ្នាំ២០២៣នេះ។
លោក ហុង សុហួរ បានបញ្ជាក់ថា “ការកើនឡើងចំនួនគណនីជួញដូរ ទោះបីជាមានទំហំវិនិយោគតូចក្តី ប៉ុន្តែវាឆ្លុះបញ្ចាំងពីចំណាប់អារម្មណ៍របស់សាធារណៈដែលកំពុងកើនឡើងនៅក្នុងទីផ្សារភាគហ៊ុន។
យោងតាមផ្សារហ៊ុន CSX បានឱ្យដឹងថា មានការបើកគណនីថ្មីជាមធ្យមចំនួ១.០០០គណនីក្នុងមួយថ្ងៃក្នុងរយៈពេល៤ខែដំបូង ឆ្នាំ២០២៣នេះ ដែលកើនឡើងពីការបើកគណនីថ្មីជាមធ្យមចំនួន២០០គណនីក្នុងមួយថ្ងៃក្នុងរយៈពេលដូចគ្នាកាលពីឆ្នាំមុន។
ទន្ទឹមនឹងនេះ CSX បានកំណត់ទិសដៅទំហំពាណិជ្ជកម្មប្រចាំថ្ងៃចំនួន១០០លានដុល្លារនៅឆ្នាំ២០៣០ នៅពេលដែលកម្ពុជាក្លាយជាប្រទេសដែលមានប្រាក់ចំណូលមធ្យមកម្រិតខ្ពស់។
CSX ត្រូវបានបង្កើតឡើងក្នុងឆ្នាំ 2012 ជាសហគ្រាសសាធារណៈដែលមានភាគហ៊ុន៥៥ភាគរយកាន់កាប់ដោយរដ្ឋាភិបាលកម្ពុជា និងភាគហ៊ុនដែលនៅសល់កាន់កាប់ដោយក្រុមហ៊ុន Korea Exchange ៕