ដោយ: គង់ លាងហួរ
អន្តរជាតិ: ផ្សារហ៊ុននៅតំបន់អាស៊ីបានហក់ឡើងដល់កម្រិតខ្ពស់រយៈពេល២សប្តាហ៍នៅថ្ងៃអង្គារនេះ ដោយសារវឌ្ឍនភាពឆ្ពោះទៅរកការជៀសវាងពីការខកខានសងបំណុលរបស់សហរដ្ឋអាមេរិក និងដោយសារភាពធន់នៅក្នុងសេដ្ឋកិច្ចរបស់ប្រទេសជប៉ុន។
សន្ទស្សន៍ផ្សារហ៊ុនអាស៊ីប៉ាស៊ីហ្វិកនៅក្រៅប្រទេសជប៉ុន MSCI បានហក់ឡើងថ្លៃខ្ពស់បំផុតចាប់តាំងពីថ្ងៃទី៩ ខែឧសភា និងបានហក់ឡើងប្រហែល០,៣ភាគរយនៅពាក់កណ្តាលព្រឹកនេះ។ ផ្សារហ៊ុន Nikkei របស់ជប៉ុនបានបន្តការឈ្នះរបស់ខ្លួនចូលទៅក្នុងវគ្គទី៩ ហើយបានហក់ឡើងថ្លៃ០,៦ភាគរយ។
ផ្សារហ៊ុន S&P 500 futures បានហក់ឡើងថ្លៃ០,២ភាគរយ ហើយផ្សារហ៊ុនអឺរ៉ុប European futures បានហក់ឡើងថ្លៃ០,១៦ភាគរយ។
លោកប្រធានាធិបតី Joe Biden និងប្រធានសភាអាមេរិក លោក Kevin McCarthy មិនអាចឈានដល់កិច្ចព្រមព្រៀងមួយកាលពីថ្ងៃច័ន្ទម្សិលមិញទេ ស្តីពីការដំឡើងពិដានបំណុល៣១,៤ពាន់ពាន់លានដុល្លាររបស់រដ្ឋាភិបាលសហរដ្ឋអាមេរិក ប៉ុន្តែភាគីទាំង២បានប្តេជ្ញាបន្តកិច្ចពិភាក្សាជាមួយគ្នាបន្តទៀត។
លោក Vishnu Varathan សេដ្ឋវិទូប្រចាំក្រុមហ៊ុន Mizuho បានអះអាងថា “ការបន្តការចរចាលើពិដានបំណុលបានជំរុញឱ្យមានក្តីសង្ឃឹមមួយចំនួន ទោះបីជាមានហានិភ័យផ្សេងគ្នានៃភាពយឺតយ៉ាវ និងរុញដាក់ការស្តីបន្ទោសលើគ្នាទៅវិញទៅមកដែលអាចបន្តកើតឡើងយ៉ាងណាក្តី”។
ប្រាក់ដុល្លារអាមេរិកបានតាមដានការផ្លាស់ប្តូរ និងបានហក់ឡើងដល់កម្រិតខ្ពស់រយៈពេល៦ខែ គឺ១ដុល្លារអាមេរិកស្មើនឹង១៣៨,៨៨យ៉េននៅក្នុងវគ្គជួញដូរនៅតំបន់អាស៊ី។
ប្រាក់ដុល្លារអាមេរិកមានភាពរឹងមាំធៀបនឹងរូបិយប័ណ្ណផ្សេងទៀតភាគច្រើន ហើយត្រូវបានជួញដូរក្នុងតម្លៃ១,០៨០៥ដុល្លារក្នុងមួយអឺរ៉ូ និង០,៦៦៥ដុល្លារក្នុងមួយដុល្លារអូស្ត្រាលី៕