ដោយ: គង់ លាងហួរ
ភ្នំពេញ: កម្មវិធីស្បៀងអាហារពិភពលោករបស់អង្គការសហប្រជាជាតិ (WFP) សហការជាមួយសាជីវកម្មសហគមន៍កសិកម្មកម្ពុជា (CACC) កំពុងចាប់ផ្តើមគម្រោងថ្មីមួយ ដែលសំដៅផ្តោតលើកសិករខ្នាតតូចជាង១.២០០នាក់ និងក្រុមគ្រួសាររបស់ពួកគាត់ នៅក្នុងស្រុកកោះញែក ខេត្តមណ្ឌលគិរី។
យោងតាមសេចក្តីប្រកាសព័ត៌មានរបស់ WFP និង CACC ដែលបានចេញផ្សាយកាលពីថ្ងៃទី៨ ខែឧសភា ឆ្នាំ២០២៣ បានឱ្យដឹងថា គម្រោងនេះទទួលបានមូលនិធិ ពីកម្មវិធីកសិកម្ម និងសន្តិសុខស្បៀងសកលចំនួន១,៧៩លានដុល្លារ និងពី CACC ចំនួន១,១លានដុល្លារ ក្នុងគោលបំណងលើកកម្ពស់ភាពធន់ និងជីវភាពរបស់កសិករខ្នាតតូច តាមរយៈកសិកម្មសរីរាង្គ និងលទ្ធភាពចូលទៅកាន់ទីផ្សារ។
គម្រោងនេះក៏មានបំណងលើកកម្ពស់អាហារូបត្ថម្ភ និងសមភាពយេនឌ័រផងដែរ តាមរយៈវិធីសាស្រ្តផ្លាស់ប្តូរឥរិយាបថសង្គម ដែលត្រូវបានរៀបចំឡើងដើម្បីជំរុញឱ្យមានតម្រូវការរបបអាហារសុខភាព និងទប់ទល់ជាមួយទម្លាប់សង្គមដែលបង្កគ្រោះថ្នាក់។
លោកស្រី គ្លែរ កូណាន់ អ្នកតំណាងកម្មវិធីស្បៀងអាហារពិភពលោក (WFP)ប្រចាំនៅកម្ពុជា បានលើកឡើងតាមរយៈសេចក្តីប្រកាសព័ត៌មាននេះថា គម្រោងនេះត្រូវបានគ្រោងរៀបចំឡើងក្នុងបរិបទកូវីដ-១៩ ដោយប្រើប្រាស់នូវវិធីសាស្រ្តច្នៃប្រឌិត ដែលកសាងភាពជាដៃគូរវាងវិស័យសាធារណៈ វិស័យឯកជន និងអ្នកផលិត ដោយផ្ដោតជាសំខាន់លើភាពចាំបាច់ ក្នុងការទាញយកប្រយោជន៍ពីការបណ្ដាក់ទុនលើវិស័យឯកជន ពង្រឹងកិច្ចសន្ទនាផ្នែកគោលនយោបាយ ធានានូវចំណេះដឹងចាំបាច់ និងគាំទ្រដល់ការអភិវឌ្ឍដែលគិតគូរដល់បរិស្ថាន សមធម៌សង្គម និងសេដ្ឋកិច្ច។
លោកស្រី គ្លែរ កូណាន់ បានបន្តថា កំណើនប្រាក់ចំណូលនឹងដើរតួយ៉ាងសំខាន់ក្នុងការសម្រួលឱ្យមានអាហារូបត្ថម្ភកាន់តែប្រសើរ នៅពេលដែលក្រុមគ្រួសារពួកគាត់ អាចទទួលបានអាហារសុខភាពចម្រុះ អាចទប់ទល់នឹងផលអវិជ្ជមានផ្នែកអាហារូបត្ថម្ភ ដែលកើតមានលើក្រុមគ្រួសារពួកគាត់ ហើយលោកស្រី ក៏សម្គាល់ផងដែរថា ជីវភាព និងអាហារូបត្ថម្ភមានសារៈសំខាន់ណាស់ ដោយសារតំបន់គោលដៅនេះមានកម្រិតនៃភាពក្រីក្រ និងកង្វះអាហារូបត្ថម្ភខ្ពស់។
លោកស្រី បានលើកឡើងថា “ការចូលរួមរបស់ស្ត្រីនៅក្នុងគម្រោង គឺជាគន្លឹះដ៏សំខាន់ ពីព្រោះនៅកម្ពុជា ស្ត្រីដើរតួនាទីនាំមុខក្នុងការចាត់ចែងស្បៀងអាហារគ្រួសារ និងមានចំណែកជាងពាក់កណ្តាលនៃកម្លាំងពលកម្មផ្នែកកសិកម្មនៅទូទាំងប្រទេស ថ្វីត្បិតតែពួកគាត់ប្រឈមមុខនឹងការលំបាកជាច្រើនពាក់ព័ន្ធនឹងការទទួលបានដីធ្លី សេវាកសិកម្ម សេវាហិរញ្ញវត្ថុ ទីផ្សារ និងបច្ចេកវិទ្យាយ៉ាងណាក្តី”។
លោកកស្រី គ្លែរ កូណាន់ បន្ថែមថា “ដើម្បីដោះស្រាយបញ្ហាទាំងនេះ គម្រោងនេះនឹងប្រើប្រាស់ការប្រាស្រ័យទាក់ទងដើម្បីផ្លាស់ប្តូរឥរិយាបថសង្គម ដើម្បីកែប្រែទម្លាប់ពាក់ព័ន្ធនឹងឥរិយាបថអាហារ និងសមភាពយេនឌ័រនៅក្នុងគ្រួសារ”។លោក កាន់ គន្ធី នាយកប្រតិបត្តិ CACC បានកត់សម្គាល់ថា តម្លៃអាហារសរីរាង្គមានតម្លៃល្អ និងមានស្ថិរភាពជាងតម្លៃទំនិញដែលផលិតទៅតាមទម្លាប់។
លោកបានអះអាងថា វាមានឱកាសចំណេញខ្ពស់ និងមានស្ថិរភាពចំណូលដោយសារកសិករខ្នាតតូចក្នុងខេត្តមណ្ឌលគិរីភាគច្រើនដាំដុះតែស្រូវ ហើយភាគច្រើនធ្វើកសិកម្មវិលជុំបែបប្រពៃណី ដែលងាយរងគ្រោះដោយសារអាកាសធាតុ និងវិបត្តិផ្សេងៗ។លោកបានបន្ថែមថា “គោលដៅរបស់យើងគឺដើម្បីបង្កើនប្រាក់ចំណូលរបស់កសិករដែលចូលរួម ឱ្យបានរហូតដល់២០ភាគរយ ធៀបនឹងប្រាក់ចំណេញរបស់កសិកម្មធម្មតា ហើយលោកក៏បញ្ជាក់ថា CACC នឹងជួយសម្របសម្រួលទំនាក់ទំនងទីផ្សារ ហើយកសិករនឹងអាចប្រើប្រាស់ចំណូលរបស់ខ្លួនក្នុងការទប់ទល់ជាមួយនឹងវិបត្តិផ្សេងៗដែលអាចកើតមាននាពេលអនាគតផងដែរ”៕
