ដោយ: គង់ លាងហួរ
ស៊ីដនី: ផ្សារហ៊ុននៅតំបន់អាស៊ីហក់ឡើងថ្លៃ នៅថ្ងៃចន្ទនេះ ខណៈវិនិយោគិនបានត្រៀមខ្លួនមួយសប្តាហ៍ ខណៈទិន្នន័យអតិផរណារបស់សហរដ្ឋអាមេរិក នឹងសាកល្បងការភ្នាល់លើការផ្លាស់ប្តូរបន្ទាប់នៃអត្រាការប្រាក់ ខណៈពេលដែលមានការព្រួយបារម្ភអំពីវិបត្តិឥណទាន ដែលអាចមានទម្ងន់លើប្រាក់ដុល្លារអាមេរិក។
របាយការណ៍ប្រាក់បៀវត្សរ៍ដ៏រឹងមាំ របស់សហរដ្ឋអាមេរិកបានផ្តល់នូវភាពលំបាក ដើម្បីបន្ធូរបន្ថយក្តីសង្ឃឹម និងការភ្ញាក់ផ្អើលវិជ្ជមានណាមួយលើតម្លៃអ្នកប្រើប្រាស់ ដែលនឹងធ្វើឱ្យការភ្នាល់សម្រាប់ការកាត់បន្ថយអត្រាការប្រាក់ភ្លាមៗនៅខែកញ្ញាជួបឧបសគ្គ។
ការស្ទង់មតិនៃក្រុមមន្ត្រីប្រាក់កម្ចី របស់ធនាគារកណ្តាលអាមេរិក នឹងទាក់ទាញការយកចិត្តទុកដាក់មិនធម្មតាមួយ ខណៈដែលទីផ្សារកំពុងព្យាយាមវាស់វែង ពីផលប៉ះពាល់នៃភាពតានតឹងផ្នែកធនាគារក្នុងតំបន់លើការផ្តល់ប្រាក់កម្ចី។
លោក Bruce Kasman ប្រធានផ្នែកស្រាវជ្រាវសេដ្ឋកិច្ចនៅក្រុមហ៊ុន JPMorgan បានមានប្រសាសន៍ថា “ការស្ទង់មតិគួរតែចង្អុលទៅកាន់ ការរឹតបន្តឹងកាន់តែខ្លាំងបន្ថែមទៀត នៅក្នុងស្តង់ដារប្រាក់កម្ចីរបស់ធនាគារ”។
លោកបានបន្ថែមថា “ភាពតានតឹងជាបន្ត ក្នុងប្រព័ន្ធធនាគារពិតណាស់បង្កើនការព្រួយបារម្ភថា ព្រឹត្តិការណ៍ទីផ្សារហិរញ្ញវត្ថុដែលបង្កបញ្ហាកំពុងឈានជិតមកដល់”។
សន្ទស្សន៍ភាគហ៊ុនអាស៊ីប៉ាស៊ីហ្វិក ដ៏ទូលំទូលាយរបស់ MSCI នៅខាងក្រៅប្រទេសជប៉ុន បានហក់ឡើង០,៣ភាគរយ ខណៈដែលផ្សារហ៊ុន Nikkei របស់ជប៉ុនបានដាំក្បាលចុះ០,៣ភាគរយ។
ផ្សារហ៊ុន S&P 500 futures និង Nasdaq futures បានដាំក្បាលចុះ០,១ភាគរយ បន្ទាប់ពីបានហក់ឡើងថ្លៃ កាលពីថ្ងៃសុក្រសប្តាហ៍មុន ដែលបណ្តាលមកពីលទ្ធផលដ៏ល្អរបស់ក្រុមហ៊ុន Apple៕