ដោយ: គង់ លាងហួរ
ភ្នំពេញ: កំពង់ផែស្វយ័តភ្នំពេញ(PPAP) រកប្រាក់ចំណូលបាន៨,២៣លានដុល្លារនៅត្រីមាសទី១ ឆ្នាំ២០២៣នេះ ពោលគឺធ្លាក់ចុះ១៣ភាគរយ បើប្រៀបធៀបកាលពីឆ្នាំ២០២២កន្លងទៅ។
ខណៈពេលដែលប្រាក់ចំណូល ពីប្រតិបត្តិការកំពង់ផែមានចំនួន៥,៩១លានដុល្លារ សម្រាប់ត្រីមាសឆ្នាំនេះ កំពង់ផែស្វយ័តរកប្រាក់ចំណូលបាន៧,៨៨លានដុល្លារ នៅក្នុងឆមាសទី១ កាលពីឆ្នាំមុន។
សម្រាប់ខែមីនា ឆ្នាំ២០២៣ សេវាសាធារណៈកំពង់ផែ បានរកប្រាក់ចំណូលបាន២,០៩លានដុល្លារ ពីប្រតិបត្តិផែរបស់ខ្លួន បើប្រៀបធៀបនឹងចំណូលខែមីនាឆ្នាំ ២០២២ ដែលទទួលបាន២,៦៩លានដុល្លារ។
យោងតាមឯកសារដាច់ដោយឡែក នៃកំពង់ផែស្វយ័តភ្នំពេញ (PPAP) បានរាយការណ៍ពីការធ្លាក់ចុះ២៤,៧១ភាគរយ នៃការដឹកជញ្ជូនកុងតឺន័រ នៅកំពង់ផែសម្រាប់ត្រីមាសទី១ ក្នុងឆ្នាំនេះ បើធៀបនឹងខែដូចគ្នាកាលពីឆ្នាំមុន។
សម្រាប់ខែមីនា ឆ្នាំ២០២៣ កំពង់ផែបានរាយការណ៍ពីការធ្លាក់ចុះ១៨,២៧ភាគរយ នៃការដឹកជញ្ជូនកុងតឺន័រ ធៀបនឹងខែមីនាឆ្នាំ២០២២ ពីចំនួន៣៤,៨៣៧កុងតឺន័រ ដល់ចំនួន២៨,៤៧១កុងតឺន័រក្នុងខែមីនាឆ្នាំនេះ។
ក្នុងរយៈពេលពេញ១ឆ្នាំ នៅឆ្នាំ២០២២កន្លងមកនេះ កំពង់ផែស្វយ័តក្រុងព្រះសីហនុ និងកំពង់ផែស្វយ័តភ្នំពេញ រកចំណូលបានសរុបប្រមាណជិត១៣០ លានដុល្លារ។
យោងតាមក្រសួងសាធារណការ និងដឹកជញ្ជូនបានបង្ហាញថា ការដឹកជញ្ជូនទំនិញ តាមរយៈកំពង់ផែបានកើនឡើង២,៤៥ភាគរយ ដល់៨៦លានដុល្លារក្នុងឆ្នាំ២០២២។
លោកទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួងដឹកជញ្ជូន និងសាធារណការ បានមានប្រសាសន៍ថា ការកើនឡើងដឹកជញ្ជូនគឺបណ្តាលមកពីការនាំចេញផ្នែកកសិកម្ម ក៏ដូចជាផលិតផល សម្លៀកបំពាក់ និងទំនិញធ្វើដំណើរផងដែរ។
ក្រសួងបាន និងកំពុងសិក្សា សមិទ្ធលទ្ធភាពសាងសង់ផែកុងតឺន័រជំហានទី២ និងជំហានទី៣ ក្នុងនោះជំហានទី២ ប្រវែង៤០០ម៉ែត្រ ជម្រៅទឹក១៦ម៉ែត្រ (២០២៥-២០២៨) និងជំហានទី៣ ប្រវែង៤៣០ម៉ែត្រ ជម្រៅទឹក១៧,៥ម៉ែត្រ(២០២៦-២០៣០)ផងដែរ។
ក្រសួងសាធារណការនិងដឹកជញ្ជូន ក៏បានដាក់ឱ្យដំណើរការនូវប្រព័ន្ធផ្លាស់ប្តូរទិន្នន័យអេឡិចត្រូនិកកំពង់ផែ Port Electronic Data Interchange(Port EDI) ដែលផ្តល់ហិរញ្ញប្បទាន ដោយប្រទេសជប៉ុនផងដែរ នៅកំពង់ផែស្វយ័តក្រុងព្រះសីហនុ និងកំពង់ផែស្វយ័តភ្នំពេញ ក្នុងគោលបំណង ដើម្បីអភិវឌ្ឍប្រសិទ្ធភាព តម្លាភាព និង កាត់បន្ថយតម្លៃ៕