ដោយៈសាវុធ
ភ្នំពេញៈ ចក្ខុវិស័យកម្ពុជាឆ្នាំ២០៥០ ត្រូវបានរៀបចំឡើង ក្នុងគោលបំណងឆ្លុះបញ្ចាំងពីបំណងប្រាថ្នារបស់រាជរដ្ឋាភិបាលម្ពុជា ក៏ដូចជាប្រជាជនកម្ពុជាទាំងមូលក្នុងការប្រែក្លាយកម្ពុជាជាប្រទេសមានចំណូលខ្ពស់។
មហិច្ឆិតារបស់រដ្ឋាភិបាល ដើម្បីសម្រេចបានតាមចក្ខុវិស័យកម្ពុជាឆ្នាំ២០៥០ បានកំណត់ថា នៅដំណាច់ឆ្នាំ២០៥០ កម្ពុជានឹងក្តាប់យកមកវិញនូវ” មោទនភាពជាតិ” ដែលធ្លាប់រុងរឿងពីអតីតកាល ជាមួយនឹងការកសាងជាតិទំនើបមួយដ៏រស់រវើក ជារដ្ឋរឹងមាំ ប្រជាធិបតេយ្យ និងបូរណភាពទឹកដីពេញលេញ ហើយមានកិត្យានុភាពខ្ពស់ត្រដែត ស្មើភាពនិងស្មើសិទ្ធិលើឆាកអន្តរជាតិ។
ជាប្រទេសមានចំណូលខ្ពស់ មានសេដ្ឋកិច្ចធន់មាំ ប្រកបដោយចីរភាព និងបរិយាប័ន្ន ជាប្រទេសដែលប្រជាជនរស់នៅក្នុងសុខសន្តិភាព សេចក្តីថ្លៃថ្នូរ និងសុភមង្គល មានកម្រិតជីវភាពខ្ពស់សមរម្យ និងមានចំណេះដឹងខ្ពស់ប្រកប ដោយនវានុវត្តន៍ និងសីលធម៌ប្រពៃ ទទួលបានយុត្តិធម៌សង្គម ស្មើសិទ្ធិនិងស្មើឱកាសក្នុងសង្គមជាតិ ព្រមទាំងមានអត្តសញ្ញាណជាតិដ៏បវរ និងភាពរីកចម្រើនលូតលាស់ក្នុងសង្គម រូបវ័ន្ត និងធម្មជាតិ ប្រកបដោយសុខដុមរម្យនា វប្បធម៌សម្បូរបែប និងសង្គមបរិយាប័ន្ន។
សម្តេចតេជោហ៊ុន សែន នាយករដ្ឋមន្ត្រីនៃកម្ពុជាបានមើលឃើញថា ដើម្បីឲ្យកម្ពុជាសម្រេចបាននូវចក្ខុវិស័យ ប្រែក្លាយជាប្រទេសមានចំណូលមធ្យម កម្រិតខ្ពស់នៅឆ្នាំ២០៣០ និងប្រទេសមានចំណូលខ្ពស់នៅឆ្នាំ២០៥០ ត្រូវរួមគ្នាខិតខំអនុវត្តគោលនយោបាយអភិវឌ្ឍន៍ឧស្សាហកម្មឆ្នាំ២០១៥-២០២៥ ដែលរាជរដ្ឋាភិបាលបានដាក់ចេញ និងត្រូវចាត់ទុកថាជា «យុទ្ធសាស្ត្រកំណើនថ្មី» ដែលជាមគ្គុទ្ទេសន៍ជំរុញការអភិវឌ្ឍវិស័យឧស្សាហកម្មនៅកម្ពុជា ការធ្វើពិពិធកម្មសេដ្ឋកិច្ច ការពង្រឹងសមត្ថភាពប្រកួតប្រជែង និង ការលើកកម្ពស់ផលិតភាព ដើម្បីឈានឡើងទៅកាន់ទួលថ្មីមួយទៀត ក្នុងខ្សែចង្វាក់នៃតម្លៃបន្ថែមក្នុងតំបន់ និងសកលលោក។
សម្តេចតេជោបញ្ជាក់ទៀតថា “កម្ពុជាត្រូវធ្វើទំនើបកម្ម នៃវិស័យឧស្សាហកម្ម ដែលជាកិច្ចការដ៏ចាំបាច់មួយ ដោយសារវិស័យនេះ នឹងដើរតួនាទីសំខាន់ក្នុងយុទ្ធសាស្ត្រកំនើនថ្មីជាកម្លាំងចលករក្នុងការជួយទ្រទ្រង់ ដល់កំណើនរយៈពេលមធ្យម និងរយៈពេលវែង” ។
វាជាវិស័យដែលមានសក្តានុពល សម្រាប់បង្កើតការងារដល់យុវជន និងជាជន្ទល់កំណើនសេដ្ឋកិច្ចថ្មី ដែលអាចឆក់ស្រូបយកការវិនិយោគបន្ថែម ក្រៅពីវិស័យកសិកម្ម និងទេសចរណ៍៕