ដោយគង់ ម៉ាលីនណា
ភ្នំពេញៈ សម្តេចតេជោហ៊ុន សែននាយករដ្ឋមន្ត្រីនៃកម្ពុជាបាននិងកំពុងអញ្ជើញជាអធិបតី ដើម្បីសម្ភោធបើកការដ្ឋានសាងសង់ស្ពានចំនួនពីរព្រមគ្នា ដែលស្ពានទាំងពីរនេះនឹងតភ្ជាប់រវាងទីក្រុងកោះពេជ្រ និងកោះនរា និងស្ពានតភ្ជាប់រវាងទីក្រុងកោះនរានិងផ្លូវជាតិលេខ១ ។
យោងតាមបណ្តាញទំនាក់ទំនងសង្គម របស់មន្ទីរសាធារណៈការ និងដឹកជញ្ជូនដែលបានបង្ហាញកាលពីរសៀលថ្ងៃទី២៥ តុលាកន្លងមកបានឲ្យដឹងថា គម្រោងសាងសង់ស្ពានបេតុងខ្សែកាប តភ្ជាប់ពីទីក្រុងរណបកោះពេជ្រ ឆ្លងកាត់គម្រោងអភិវឌ្ឍន៍កោះនរា ទៅកាន់ផ្លូវជាតិលេខ១ មានបែងចែងលើចំណុចសំខាន់ៗមួយចំនួន រួមមាន ទី១-អំពីគម្រោងសាងសង់ស្ពានខ្សែកាប តភ្ជាប់ពីទីក្រុងរណបកោះពេជ្រ ទៅកាន់គម្រោងអភិវឌ្ឍន៍កោះនរា មានប្រវែងសរុប ៨២៤ម៉ែត្រ ទទឹង ២៤.៥ម៉ែត្រ។
ស្ពាននេះបណ្តោយស្ពានបេតុងអារមេ ប្រវែង៤៨៣ម៉ែត្រ។ សសរស្ពានមានគម្លាត ២០ម៉ែត្រ+២១ម៉ែត្រ+១០៨ម៉ែត្រ+១៨០ម៉ែត្រ+១០៨ម៉ែត្រ+២៣ម៉ែត្រ+២៣ម៉ែត្រ ។ផ្លូវតភ្ជាប់ក្បាលស្ពាន ត្រើយខាងកោះពេជ្រប្រវែង២៤៩ម៉ែត្រ។ ផ្លូវតភ្ជាប់ក្បាលស្ពានកោះនរា ប្រវែង៩២ម៉ែត្រ ។ ជាស្ពានចរាចរទ្វេរទិស មានគន្លងសម្រាប់រថយន្តចំនួន ២ទៅ និងគន្លងចំនួន២មក ដែល១គន្លងមានទទឹង៣.២៥ម៉ែត្រ និងមានគន្លងសម្រាប់ទោចក្រយានយន្តចំនួន១ទៅ និងគន្លងចំនួន១មក ដែលមានទទឹង១.២៥ម៉ែត្រសងខាង។
អំពីល្បឿនចរាចរណ៍
ល្បឿនសុវត្ថិភាព ៤០គីឡូម៉ែត្រ/ម៉ោង ជម្រាលទទឹងស្ពាន ២% ។ សសរសម្រាប់ព្យួរខ្សែកាបមានកំពស់ ៦០ម៉ែត្រ គិតពីផ្ទៃតួស្ពានទៅលើអាកាស។ សសរស្ពានសម្រាប់ព្យួរខ្សែកាបមានចំនួន ២ ដែលសសរស្ពាននីមួយៗប្រើប្រាស់គ្រឹះខួងខំនួន ១៨ដើម មានទំហំអង្កត់ផ្ចិត ២ម៉ែត្រ គ្រឹះខួងសសរទី១មានជម្រៅ ៥៩.៤០ម៉ែត្រ និងសសរទី២មានជម្រៅ៧៣.៤០ម៉ែត្រ។ ផ្នែកខាងកោះពេជ្រមានសសរចំនួន ៣ និងផ្នែកខាងកោះនរាមានសសរចំនួន ។ ជើងតាងស្ពានមានទំហំ២៤.៣ម៉ែត្រx១៧.៧ម៉ែត្រx៤.៥ម៉ែត្រ។
កំពស់អតិបរមានាវាឆ្លងកាត់ក្រោមស្ពាន ៨ម៉ែត្រនៅរដូវវស្សានីវ៉ូទឹកខ្ពស់បំផុត កំពស់អតិបរមានាវាឆ្លងកាត់ក្រោមស្ពាន ១៨ម៉ែត្រ នៅរដូវប្រាំងនីវ៉ូទឹកទាបបំផុត។ គម្លាតពីសរសរស្ពានខ្សែកាប មានប្រវែង១៨០ម៉ែត្រ។ សសរស្ពានខ្សែកាបនីមួយៗមានខ្សែកាបចំនួន១ជួរ១៦ដើមសងខាង ក្នុង១ដើមមានភ្ជាប់ខ្សែកាបតូចៗពី២៧ដើម ទៅ៣១ដើម ដែលមានអង្កត់ផ្ចឹត ១៥.២មីលីម៉ែត្រ។
សសរស្ពានខ្សែកាបទាំង២ មានឆ្លាក់ចម្លាក់រចនាបទខ្មែរ។ មានបំពាក់បង្គោលភ្លើងបំភ្លឺស្ព្ពាន រៀបចំបណ្តាញលូអមសងខាងផ្លូវក្បាលស្ពាន ដាក់ស្លាកសញ្ញាចរាចរ និងលាបគំនូសចរាចរ។
គម្រោងចំណាយសាងសង់៣៨.០០០.០០០ដុល្លាអាមេរិក។ រយៈពេលសាងសង់ ៣៥ខែ។ សាងសង់ដោយក្រុមហ៊ុនវិនិយោគទុនអណិកជនកម្ពុជា OCIC។
ស្ពានតភ្ជាប់ផ្លូវជាតិលេខ១
២-អំពីគម្រោងសាងសង់ស្ពានបេតុងអាមេ តភ្ជាប់ពីកោះនរា ទៅផ្លូវជាតិលេខ១ បណ្តោយស្ពានសរុបប្រវែង៦០ម៉ែត្រ ទទឹងស្ពាន២១ម៉ែត្រ បណ្តោយស្ពានបេតុង៤៥ម៉ែត្រ ផ្លូវគល់ស្ពានសងខាង១៥ម៉ែត្រ និងចំណាយរយៈពេលសាងសង់១២ខែ៕
