ដោយ: គង់ លាងហួរ
បាងកក: ប្រទេសចិនបានឈរនៅលើកំពូលតារាង នៃលំហូរវិនិយោគផ្ទាល់ពីបរទេស (FDI) ចូលក្នុងវិស័យអចលនទ្រព្យបែបឧស្សាហកម្មថៃកាលពីខែកុម្ភៈ ដែលស្មើនឹង២៣,៦៨ភាគរយ នៃលំហូរវិនិយោគផ្ទាល់ពីបរទេស សរុបចំនួន១៤,៧៦ពាន់លានបាត។
យោងតាមអាជ្ញាធរឧស្សាហកម្មនៃប្រទេសថៃ (IEAT) បានឱ្យដឹងថា វិនិយោគិនសិង្ហបុរី ស្ថិតនៅលំដាប់ទីពីរចំនួន១២,៤១ភាគរយ បន្ទាប់មក គឺជប៉ុនចំនួន១១,៦៥ភាគរយ ឥណ្ឌាចំនួន៦,៣៩ភាគរយ និងតៃវ៉ាន់ចំនួន៦,០២ភាគរយ។
លោក Veeris Ammarapala អភិបាល IEAT បានមានប្រសាសន៍ថា “និន្នាការនៃអាជីវកម្មចិន ដែលផ្លាស់ប្តូរមូលដ្ឋានផលិតកម្មរបស់ពួកគេ ទៅកាន់តំបន់អាស៊ីអាគ្នេយ៍ បានចាប់ផ្តើមឡើងកាលពីឆ្នាំមុន ដោយប្រទេសថៃ និងវៀតណាម ជាជម្រើសដ៏ពេញនិយមបំផុត សម្រាប់ក្រុមហ៊ុនផលិតគ្រឿងអេឡិចត្រូនិកលំដាប់កំពូលៗ”។
លោក Veeris បានបន្តថា “កត្តាមួយទៀតដែលជំរុញដល់ការវិនិយោគរបស់ចិនផងដែរនោះ គឺកិច្ចព្រមព្រៀងដែលបានចុះហត្ថលេខារវាងប្រទេសទាំងពីរ នៅឯកិច្ចប្រជុំកំពូលApec កាលពីឆ្នាំមុន ដើម្បីជំរុញការវិនិយោគរួមគ្នា ក្រោមគំនិតផ្តួចផ្តើមខ្សែក្រវ៉ាត់ និងផ្លូវរបស់ចិន និងគោលនយោបាយ៤.០របស់ប្រទេសថៃ”។
លោកបានបញ្ជាក់ថា “ប្រទេសចិនក៏បានឈរ នៅលើកំពូលតារាងសម្រាប់លំហូរ FDI ក្នុងឆ្នាំ២០២២ផងដែរ ជាមួយនឹងលំហូរទុនវិនិយោគចូល៧៧,៣ពាន់លានបាត នៃចំនួនសរុប៤៣៣ពាន់លានបាត”។
បន្ទាប់ពីលំហូរពីប្រទេសចិនដ៏ច្រើនរួចមក គឺលំហូរ FDI ពីប្រទេសជប៉ុនចំនួន៥០,៧ពាន់លានបាត តាមពីក្រោយដោយសហរដ្ឋអាមេរិកចំនួន៥០,៣ ពាន់លានបាត តៃវ៉ាន់ចំនួន៤៥,២ពាន់លានបាត និងសិង្ហបុរីចំនួន៤៤,២ ពាន់លានបាត។
លោក Veeris Ammarapala បានបន្ថែមថា “យើងរំពឹងមើលឃើញអ្នកវិនិយោគចិនកាន់តែច្រើន ចូលមកបង្កើតមូលដ្ឋានផលិតកម្មរបស់ពួកគេ នៅក្នុងប្រទេសថៃនៅឆ្នាំនេះ បន្ទាប់ពីប្រទេសចិនបានលុបចោលការរឹតបន្តឹង លើការធ្វើដំណើរសម្រាប់ប្រជាជនរបស់ខ្លួន”៕
