ដោយ: គង់ លាងហួរ
វៀងច័ន្ទ: រោងចក្រវារីអគ្គិសនី ដែលកំពុងស្ថិតក្រោមការសាងសង់នៅលើដងទន្លេមេគង្គ ស្ថិតក្នុងខេត្តហ្លួងប្រាបាង ភាគខាងជើងនៃប្រទេសឡាវ ត្រូវបានគេរំពឹងថា នឹងបញ្ចប់ការសាងសង់ និងអាចផលិតអគ្គិសនីបាននៅឆ្នាំ២០៣០។
យោងតាមទូរទស្សន៍ជាតិឡាវ បានរាយការណ៍ឱ្យដឹងកាលពីថ្ងៃពុធម្សិលមិញនេះថា ជញ្ជាំងទំនប់មានកម្ពស់៧៩ម៉ែត្រ ហើយទឹកនឹងធ្លាក់ចុះដល់២៩,៦ម៉ែត្រ។
រោងចក្រថាមពលនេះ ត្រូវបានបំពាក់ដោយយូនីតKaplan បញ្ឈរចំនួន៧ ដែលមានសមត្ថភាពដំឡើងសរុប១.៤០០មេហ្គាវ៉ាត់ ជាមួយនឹងយូនីតជំនួយចំនួន៣ ដែលផ្តល់ថាមពលបន្ថែម៦០មេហ្គាវ៉ាត់ ហើយរោងចក្រនេះអាចផលិតថាមពល សរុបបានប្រហែល៦.៨៥៤GWh ជារៀងរាល់ឆ្នាំ។
ឧស្សាហកម្មផលិតអគ្គិសនី និងរ៉ែក្នុងប្រទេសឡាវកំពុងរីកចម្រើនយ៉ាងឆាប់រហ័ស និងផ្តល់ការជំរុញខ្លាំង ដល់ការអភិវឌ្ឍសេដ្ឋកិច្ចរបស់ប្រទេ សនេះ។
រោងចក្រវារីអគ្គីសនីជាច្រើន ត្រូវបានសាងសង់នៅក្នុងប្រទេសឡាវ ដែលជាផ្នែកមួយ នៃយុទ្ធសាស្ត្ររបស់រដ្ឋាភិបាល ក្នុងការប្រែក្លាយប្រទេសនេះទៅជា “ថ្មសាករបស់តំបន់អាស៊ីអាគ្នេយ៍”។
បច្ចុប្បន្ន ប្រទេសឡាវមានរោងចក្រផលិត ថាមពលចំនួន៩៤ ដែលមានសមត្ថភាព ដំឡើងសរុប១១.៦៦១មេហ្គាវ៉ាត់ ដែលអាចផលិតថាម ពលបាន៥៨.៨១៣GWh ក្នុងមួយឆ្នាំ៕