ដោយ: គង់ លាងហួរ
ភ្នំពេញ: កម្ពុជាស្ថិតនៅក្នុងចំណោមបណ្តាប្រទេស ទទួលផលប្រយោ ជន៍ចំនួន៦៥ ខណៈផែនការពាណិជ្ជកម្ម បណ្ដាប្រទេសកំពុងអភិវឌ្ឍន៍ (DCTS) របស់ចក្រភពអង់គ្លេស នឹងចូលជាធរមាននៅខែមេសា ដែលប្រព័ន្ធនេះ នឹងជំនួសឱ្យប្រព័ន្ធអនុគ្រោះពន្ធទូទៅ (GSP) របស់អាមេរិក។
ប្រព័ន្ធថ្មីនេះ នឹងផ្តល់សម្បទានពន្ធបន្ថែមដល់ផលិតផល ដែលនាំចូលដោយចក្រភពអង់គ្លេសពីបណ្តាប្រទេសកំពុងអភិវឌ្ឍន៍។
លើសពីនេះទៀត ទំហំពាណិជ្ជកម្មរវាងកម្ពុជា និងចក្រភពអង់គ្លេសត្រូវបានគេរំពឹងថា នឹងមានការកើនឡើងបន្ថែមទៀត ស្ថិតក្រោមគម្រោងថ្មីនេះ។
យោងតាមទិន្នន័យរបស់អគ្គនាយកដ្ឋានគយ និងរដ្ឋាករ (GDCE) បានឱ្យដឹងថា ទំហំពាណិជ្ជកម្មកម្ពុជា ជាមួយចក្រភពអង់គ្លេសបានចុះបញ្ជីកំណើន២៣,៩ភាគរយ ក្នុងឆ្នាំ២០២២ ធៀបនឹងឆ្នាំ២០២១ និងបានកើនដល់៩៧៧លានដុល្លារ។
ការនាំចេញពីកម្ពុជាទៅកាន់ចក្រភពអង់គ្លេស បានកើនឡើង២១,១ភាគរយដល់៨៨៦លានដុល្លារ ខណៈការនាំចូលបានកើនឡើង៦០,២ភាគរយរហូតដល់ទៅ៩១លានដុល្លារ។
ទំហំពាណិជ្ជកម្មរវាងប្រទេសទាំងពីរ កាលពីឆ្នាំមុនក៏បាននាំមកនូវអតិរេកចំនួន៧៩៥លានដុល្លារអាមេរិក សម្រាប់ប្រទេសកម្ពុជាផងដែរ។
ទោះជាយ៉ាងនេះក្តី ទំហំពាណិជ្ជកម្មរវាងប្រទេសទាំងពីរ ក៏បានបង្ហាញពីការធ្លាក់ចុះ៩,៨ភាគរយ នៅខែមករា ឆ្នាំ២០២៣នេះ បើធៀបនឹងរយៈពេលដូចគ្នាក្នុងឆ្នាំ២០២២។
កាលពីខែមករា ការនាំចេញពីកម្ពុជាទៅចក្រភពអង់គ្លេស បានធ្លាក់ចុះ១៦,៥ភាគរយ ខណៈការនាំចូលបានកើនឡើង៩៥,២ភាគរយ ពីមួយឆ្នាំទៅមួយឆ្នាំ។
ការកាត់បន្ថយពន្ធក្រោមប្រព័ន្ធ DCTS ថ្មីនេះនឹងអនុញ្ញាតឱ្យ៩៩ភាគរយនៃទំនិញ ដែលនាំចូលពីបណ្តាប្រទេសអភិវឌ្ឍន៍តិចតួច (LDCs) ទៅកាន់ចក្រភពអង់គ្លេសដោយគ្មានការពន្ធណាមួយឡើយ។
ទំនិញទាំងនោះភាគច្រើនជាសម្លៀកបំពាក់ ស្បែកជើង និងគ្រឿងឧបភោគបរិភោគ ដែលមិនត្រូវបានផលិតយ៉ាងទូលំទូលាយ នៅក្នុងចក្រភពអង់គ្លេស ហើយវានឹងទទួលបានអត្ថប្រយោជន៍ពីពន្ធទាប ឬសូន្យក្រោមផែនការ DCTS ថ្មីនេះ៕