ដោយ៖ សាវុធ
ភ្នំពេញៈ មានការទទួលស្គាល់ជាទូទៅនៅលើពិភពលោកថា ការវិនិយោគលើភាគហ៊ុនមានភាពងាយស្រួល និងអាចទទួលបានប្រាក់ចំណេញច្រើនជាងគេ លើរយៈពេលវែង។
ប៉ុន្តែការវិនិយោគភាគហ៊ុន ក៏មិនខុសពីការវិនិយោគដទៃដែរ គឺតែងទាមទារឱ្យមានចំណេះដឹងមួយចំនួនជាអប្បបរមា ដើម្បីអាចទាញប្រយោជន៍ពីទីផ្សារនេះ។
លោក អ្នកគួរសិក្សាលើចំណេះដឺងជាអប្បបរមា សំដៅដល់ការយល់ដឹងមួយចំនួនដូចជា៖
– រចនាសម្ព័ន្ធនិងដំណើរការទីផ្សារមូលបត្រនៅកម្ពុជា៖ សំដៅដល់តួអង្គនានានៅក្នុងវិស័យមូលបត្រ ដែលមានតួនាទីខុសៗគ្នា និងមានទំនាក់ទំនងជាមួយគ្នា។ តួអង្គសំខាន់ៗមួយចំនួនមានដូចខាងក្រោម ទី១ គណៈកម្មការមូលបត្រកម្ពុជា (គ.ម.ក.)៖ ស្ថាប័នរដ្ឋដែលមានតួនាទីចំបងគ្រប់គ្រងវិស័យមូលបត្រទាំងមូល។ ទី២ ក្រុមហ៊ុនផ្សារមូលបត្រកម្ពុជា(ផ.ម.ក.)៖ ក្រុមហ៊ុនចំរុះរដ្ឋដែលមានតួនាទីផ្តល់សេវាចុះបញ្ជីក្រុមហ៊ុន សេវាជួញដូរមូលបត្រ ផាត់ទាត់និងទូទាត់ ព្រមទាំងរក្សាទុកមូលបត្រ។
ទី៣ ក្រុមហ៊ុនមូលបត្រ៖ ក្រុមហ៊ុនដែលធ្វើអាជីវកម្មទាក់ទងនឹងមូលបត្រ ដូចជា ធានាទិញមូលបត្រ ជួញដូរមូលបត្រសម្រាប់គណនីផ្ទាល់ខ្លួន ជួញដូរមូលបត្រសម្រាប់គណនីអតិថិជន និងផ្តល់ប្រឹក្សាវិនិយោគមូលបត្រ។ទី៤ ភ្នាក់ងារទូទាត់សាច់ប្រាក់ពាក់ព័ន្ធនឹងមូលបត្រ៖ ធនាគារដែលទទួលស្គាល់ដោយគ.ម.ក. ក្នុងការផ្តល់សេវាទូទាត់សាច់ប្រាក់ពាក់ព័ន្ធនឹងមូលបត្រ។
ទី៥ ក្រុមហ៊ុនបោះផ្សាយ/ចុះបញ្ជី៖ ក្រុមហ៊ុនដែលត្រូវការទុនបន្ថែម ហើយបោះផ្សាយនិងចុះបញ្ជីលក់ភាគហ៊ុនរបស់ខ្លួននៅផ.ម.ក. និងទី៦ វិនិយោគិន៖ វិនិយោគិនជារូបវ័ន្តឬជាក្រុមហ៊ុន ដែលទិញ/លក់ភាគហ៊ុននៅផ.ម.ក. តាមរយៈក្រុមហ៊ុនមូលបត្រ៕