ដោយ ហ្សូលី
ភ្នំពេញៈ តំបន់ភាគខាងត្បូងរាជធានីភ្នំពេញ ត្រូវបានអ្នកជំនាញដែលប្រឡូកក្នុងវិស័យអចលនទ្រព្យជាច្រើន បានលើកឡើងពីសក្តានុពលតំបន់ ក៏ដូចជាការព្យាករណ៍ទៅពេលអនាគតលើតំបន់នេះ ដែលថាវិស័យអចលនទ្រព្យ នឹងកាន់តែអភិវឌ្ឍនៅតំបន់នោះ។
លោកស្រីចេវ សុឃុន ប្រធានសមាគមអ្នកជំនាញអចលនទ្រព្យកម្ពុជាបានថ្លែងប្រាប់គេហទំព័រ Property Area Asia នៅថ្ងៃទី ១៨ ខែតុលា ឆ្នាំ២០២០នេះថា វិស័យអចលនទ្រព្យនៅតំបន់ភាគខាងត្បូង នឹងកាន់តែអភិវឌ្ឍ រីកចម្រើនខ្លាំង នៅពេលអនាគត ជាក់ស្តែងដូចជានៅតំបន់ខណ្ឌដង្កោជាដើម។
លោកស្រីសង្កេតឃើញថា ខណ្ឌដង្កោក្នុងពេលបច្ចុប្បន្ននេះ មានគម្រោងធំៗជាច្រើនសម្រុកទៅអភិវឌ្ឍនៅតំបន់នោះ មិនថាជាអគារសហកម្មសិទ្ធដូចជា ខុនដូ ប៉ុន្តែមានដូចជាអគារពាណិជ្ជកម្ម ផ្សារទំនើប បំណ្តុំបុរីលំនៅដ្ឋានជាដើម។
ប្រធានសមាគមរូបនេះបានបន្តថា កត្តាទាំងអស់នេះ ដែលធ្វើឱ្យអ្នកប្រឡូកក្នុងវិស័យអចលនទ្រព្យ ក៏ដូចជា លោកស្រីផ្ទាល់សម្លឹងឃើញពីសក្តានុពល តំបន់ភាគខាងត្បូងមួយនេះ ថានឹងអាចកាន់តែមានវឌ្ឍនភាព លើវិស័យអចលនទ្រព្យពីមួយឆ្នាំទៅមួយឆ្នាំ។
ជាមួយគ្នា នាយិកាក្រុមហ៊ុនអចលនទ្រព្យ AMATAK Property Service លោកស្រី តាំង ហួរ ធ្លាប់បានមានប្រសាសន៍ថា បច្ចុប្បន្ននេះតំបន់ភាគខាងត្បូងរាជធានីភ្នំពេញ នៅតែមានភាពទាក់ទាញ លើការអភិវឌ្ឍន៍គម្រោងសំណង់បុរី និងលំនៅដ្ឋានដ៏មានប្រជាប្រិយភាព។ នៅប៉ែកខាងត្បូងរាជធានីភ្នំពេញ កាន់តែមានភាពទាក់ទាញខ្លាំង ទៅលើគម្រោងអភិវឌ្ឍន៍លំនៅដ្ឋាន ជាពិសេសនៅតំបន់ ដែលកំពុងអភិវឌ្ឍជាមជ្ឈមណ្ឌលពាណិជ្ជកម្មកម្រិតខ្ពស់មហាវិថីសម្ដេចតេជោ (ផ្លូវ៦០ម៉ែត្រ)។
លោកស្រីបានបញ្ជាក់ទៀតថា ក្នុងខណ្ឌដង្កោ តម្លៃលំនៅដ្ឋានក៏មិនក្រោមជាង១០ម៉ឺនដុល្លារនោះដែរ ដោយសព្វថ្ងៃនេះ ក៏មានគម្រោងអភិវឌ្ឍន៍លំនៅដ្ឋានជាច្រើន កំពុងតែបន្តសកម្មភាពសាងសង់ជាបន្តបន្ទាប់។
នៅពេលដ៏ខ្លីខាងមុខនេះ តំបន់ប៉ែកខាងត្បូងនឹងមានកំណើន ប្រជាជនរស់នៅច្រើន ដោយសារតែបណ្តាញហេដ្ឋារចនាសម្ព័ន្ធនានា ត្រូវបានរាជរដ្ឋាភិបាលរៀបចំ និងអភិវឌ្ឍន៍រួចរាល់ ជាពិសេសជាតំបន់ដែលប្រមូលផ្តុំ ទៅដោយមណ្ឌលពាណិជ្ជកម្ម ដែលអនុគ្រោះដល់ការរស់នៅកាន់តែប្រសើរ៕
