ដោយៈ គង់ ម៉ាលីនណា
ភ្នំពេញៈ ទីផ្សារប្រទេសចិន បានស្រូបចំណែកអង្ករនាំចេញពីកម្ពុជាប្រមាណ២៩ម៉ឺនតោនក្នុងឆ្នាំ២០២២ ដែលក្លាយជាទីផ្សារស្រូបទាញអង្ករច្រើនជាងគេ នៃបរិមាណនៃការនាំចេញសរុបក្នុងឆ្នាំ២០២២ សម្រេចបានជិត៦៤ម៉ឺនតោន។ នេះបើយោងតាមសហព័ន្ធស្រូវអង្ករកម្ពុជា (CRF)។
ទិន្នន័យបង្ហាញថា ក្នុងឆ្នាំ២០២២ កម្ពុជាមាននាំចេញអង្ករសរុប ៦៣៧ ០០៤តោន កើនឡើង ១៩ ៩៣៥តោន ឬស្មើនឹង ៣,២៣ភាគរយបើធៀបនឹងឆ្នាំ២០២១ ដោយក្នុងនោះការនាំចេញអង្ករក្រអូបប្រណីត មានបរិមាណ ២៧៧ ៧៣៩តោន ស្មើនឹង ៤៤ភាគរយ, អង្ករសែនក្រអូប ១៧៩ ០៧០តោន ស្មើនឹង ២៨ភាគរយ, អង្ករស ១៥៣ ៤២៨តោន ស្មើនឹង ២៤ភាគរយ, អង្ករចំហុយ១៥ ៧៨១តោន ស្មើនឹង ២ភាគរយ, អង្ករសរីរាង្គ ១០ ៩៦៣តោន ស្មើជិត ២ភាគរយ និងអង្ករដំណើប២៣តោន។
សម្រាប់បរិមាណនាំចេញខាងលើ គឺធ្វើឡើងតាមរយៈក្រុមហ៊ុននាំចេញសរុប ៦១ ដោយនាំទៅប្រទេសចំនួន៥៩នៅលើពិភពលោកនេះ គឺរួមមាននៅទៅទីផ្សារប្រទេសចិន (រួមទាំងតំបន់ស្វយ័តហុងកុង ម៉ាកាវ) បានចំនួន២៨៨ ៨៣០តោន ស្មើនឹង៤៥,៣៤ភាគរយ នៃការនាំចេញសរុប, ប្រទេសនៅទ្វីបអឺរ៉ុប(២៥ប្រទេស) ចំនួន ២២១ ៥០៤តោន ស្មើ ៣៥ភាគរយ ប្រទេសសមាជិកអាស៊ាន(៤ ប្រទេស) បាន ៦៤ ៧៣៣តោន ស្មើនឹង ១០ភាគរយ និងបណ្តាគោលដៅផ្សេងៗនៅអាហ្វ្រិក អាមេរិក អូស្ត្រាលី អឺរ៉ុប និងដែនកោះ (ចំនួន ២៧ប្រទេស ) បានបរិមាណសរុប ៦១ ៩៣៧តោន ស្មើនឹង ១០ភាគរយ។
យោងតាម CRF ទឹកប្រាក់ដែលកម្ពុជាទទួលបាន ពីការនាំចេញអង្ករទៅទីផ្សារអន្តរជាតិសរុប ក្នុងឆ្នាំ២០២២ គឺមាន ៤១៤,២៩ លានដុល្លារ។
បើតាម CRF ក្រៅពីនាំចេញអង្ករ កម្ពុជាក៏បាននាំចេញស្រូវទៅលក់នៅប្រទេសវៀតណាមចំនួន ៣ ៤៧៧ ៨៨៦តោន ដែលគិតជាទឹកប្រាក់ចំនួនប្រមាណជា ៨៤១,០៩លានដុល្លារអាមេរិកផងដែរ។
លោកឡាយ ឈុនហួ អគ្គនាយកក្រុមហ៊ុន City Rice Import Export ដែលជាក្រុមហ៊ុននាំអង្ករ«អង្កររំដួល»របស់កម្ពុជាទៅចូលរួមប្រកួតក្នុងវេទិកា ស្រូវ-អង្ករពិភពលោក រហូតទទួលបានពានរង្វាន់លេខ១ជា “អង្ករល្អដាច់គេ” ប្រចាំឆ្នាំ២០២២។
ប្រភព CRF បានប្រាប់ភ្នំពេញប៉ុស្តិ៍ក្នុងថ្ងៃទី៥ ខែមករា ថា ទោះបីការនាំចេញអង្ករកម្ពុជាទៅលក់នៅទីផ្សារអន្តរជាតិ កាលពីឆ្នាំ២០២២ កើនឡើងធៀបនឹងឆ្នាំ២០២១ ប៉ុន្តែសម្រាប់ការនាំចេញអង្ករទៅប្រទេសចិន គឺមិនបានកើនឡើងនោះទេ។
មូលហេតុចម្បងៗមួយចំនួន ដែលធ្វើឱ្យការនាំចេញអង្ករទៅចិនកាលពីឆ្នាំមុនធ្លាក់ចុះ គឺភាពមិនច្បាស់លាស់ នៃកំណើនសេដ្ឋកិច្ចពិភពលោក និងប្រទេសចិន ការដំឡើងអត្រាការប្រាក់ដុល្លារអាមេរិក ដែលជះឥទ្ធិពលដល់ស្ថិរភាពអត្រាប្តូរប្រាក់យន់ (ធ្វើឱ្យតម្លៃអង្ករនាំចូលដាក់លក់លើទីផ្សារប្រទេសចិនកើនឡើង) និងស្តុកអង្ករសល់យ៉ាងច្រើន នៅប្រទេសចិនកាលពីឆ្នាំ២០២១ (ការប្រមូលទិញអង្ករច្រើន ដោយសារក្តីបារម្ភខ្លាំងពីវិបត្តិកូវីដ១៩)។
លោកបានថ្លែងថា ក្រៅពីកត្តាទាំង៣ខាងលើ ការធ្លាក់ចុះយ៉ាងច្រើននៃទិន្នផលអង្ករក្រអូបកម្ពុជា(ប្រភេទអង្ករពេញនិយមនៅប្រទេសចិន) កាលពីអំឡុងខែកក្កដា ដល់ខែកញ្ញា ក៏ជាផ្នែកមួយដែលធ្វើឱ្យការនាំចេញរបស់កម្ពុជាក្នុងឆ្នាំ២០២២ ធ្លាក់ទាបជាងក្នុងឆ្នាំ២០២១ ផងដែរ៕
