ដោយៈម៉ាណេត
ភ្នំពេញៈ ស្ថានហិរញ្ញវត្ថុចំនួនធំៗ នៅលើពិភពលោកបានព្យាករថា សេដ្ឋកិច្ចកម្ពុជានឹងមានកំណើនៅខ្ពស់នឆ្នាំ២០២១ ខណៈសកម្មអាជីវកម្មក្នុងស្រុក ចាប់ត្រឡប់មកភាពប្រក្រតីជាបណ្តើរ។
ធនាគារអភិវឌ្ឍន៍អាស៊ី (ADB) បានដំឡើងតួលេខ នៃការព្យាករសេដ្ឋកិច្ចកម្ពុជាសម្រាប់ឆ្នាំ ២០២០ ដោយផ្អែកលើភាពប្រសើរជាងមុន នៃផលិតកម្មវិស័យកសិកម្ម និងការកើនឡើង នៃការនាំចេញផលិតផល មិនមែនសំលៀកបំពាក់ ដូចជា កង់ និង គ្រឿងអេឡិចត្រូនិច។
ជាមួយគ្នានេះដែរ សេដ្ឋកិច្ចកម្ពុជា នឹងស្ទុះងើបឡើងវិញដល់៥.៩% នៅក្នុងឆ្នាំ ២០២១ ដោយសារកម្លាំងជំរុញ នៃគោលនយោបាយគាំទ្រ របស់រាជរដ្ឋាភិបាល។ នេះបើយោងតាមការព្យាកររបស់ ADB ចេញផ្សាយនៅថ្ងៃទី២៣ ខែកញ្ញា ឆ្នាំ២០២០នេះ។
តែទោះជាយ៉ាងណាក៍ដោយ បច្ចុប្បន្នភាពនៃទស្សនវិស័យអភិវឌ្ឍន៍អាស៊ី (Asian Development Outlook Update) សម្រាប់ឆ្នាំ២០២០ ដែលរៀបចំឡើងនៅទីស្នាក់ការរបស់ ADB ប្រចាំកម្ពុជា ធនាគារនេះបានព្យាកពីការធ្លាក់ចុះ នៃផលិតផលក្នុងស្រុកសរុប (GDP) របស់កម្ពុជាក្នុងឆ្នាំ២០២០ ក្នុងរង្វង់-៤.០% បើធៀបទៅនឹង-៥.៥% នៃការព្យាករណ៍កាលពីខែមិថុនាកន្លងទៅ។
លោកស្រី Sunniya Durrani-Jamal នាយិកាប្រចាំប្រទេសកម្ពុជា របស់ធនាគារអភិវឌ្ឍន៍អាស៊ី បានថ្លែងថា “ជំងឺរាតត្បាតបណ្ដាលពីវីរុសកូរ៉ូណា ជាបញ្ហាប្រឈមពិភពលោក ដែលមិនធ្លាប់មានពីមុនមក ប៉ុន្តែជាសំណាងល្អ ប្រទេសកម្ពុជាមិនបានមានវិបត្តិផ្នែកសុខាភិបាលនោះទេ” ។ លោកបន្តថា “យើងរំពឹងថាកំណើនសេដ្ឋកិច្ចនឹងស្ទុះងើបឡើងវិញដល់ ៥.៩% នៅក្នុងឆ្នាំ ២០២១ ដោយសារកម្លាំងជំរុញ នៃគោលនយោបាយគាំទ្ររបស់រាជរដ្ឋាភិបាល ដើម្បីជួយដល់ជនក្រីក្រ និងការគាំទ្រផ្នែកហិរញ្ញប្បទានដល់សហគ្រាសធុនតូច និងមធ្យម” ។
មូលនិធិរូបិយវត្ថុអន្តរជាតិ (IMF) បានធ្វើការព្យាករណ៍ថា កម្ពុជានឹងមានកំណើនសេដ្ឋកិច្ច ៦,៨ ភាគរយ ដែលនឹងក្លាយជាប្រទេសមានសេដ្ឋកិច្ច រីកចម្រើនលំដាប់ទី៣ នៅតំបន់អាស៊ាននាឆ្នាំក្រោយ និងជាប្រទេសដែលមានកំណើនសេដ្ឋកិច្ច ខ្ពស់ជាងគេបំផុតនៅក្នុងតំបន់នៅឆ្នាំ២០២៥ ។
យោងតាមការសិក្សារបស់ IMF ដែលត្រូវបានចេញផ្សាយ ក្នុងអំឡុងកិច្ចប្រជុំប្រចាំឆ្នាំរបស់ខ្លួន កាលពីថ្ងៃអង្គារបានឱ្យដឹងថា សេដ្ឋកិច្ចរបស់ប្រទេសកម្ពុជា ត្រូវបានព្យាករណ៍ថានឹងធ្លាក់ចុះ ២,៨ ភាគរយនៅឆ្នាំនេះ។
ប៉ុន្តែ IMF បានព្យាករថា “សេដ្ឋកិច្ចកម្ពុជានឹងកើនឡើងដល់ទៅ ៦,៨ភាគរយនៅក្នុងឆ្នាំ២០២១” ។
ជាមួយគ្នានេះ ធនាគារពិភពលោក ព្យាករទុកថា នៅឆ្នាំ២០២១ កំណើតសេដ្ឋកិច្ចកម្ពុជា នឹងស្ទុះឡើងដល់៤,៣ភាគវិញ និងបន្តស្ទុះឡើង៥,២ភាគរយ នៅឆ្នាំ២០២២ ។ ផ្អែកលើរបាយការណ៍ របស់ធនាគារពិភពលោកដដែលបានឲ្យដឹងថា មុនជំងឺកូវីដ-១៩ ផ្ទុះឡើង កំណើនសេដ្ឋកិច្ចកម្ពុជា ស្ថិតក្នុងរង្វង់៧,១ភាគរយ ក្នុងឆ្នាំ២០១។ នេះ បើតាមរបាយការណ៍ថ្មីមួយទៀត របស់ធនាគារពិភពលោក (World Bank) ដែលចេញផ្សាយនៅថ្ងៃទី២៩ ខែកញ្ញា ឆ្នាំ២០២០ ។
សកម្មភាពសេដ្ឋកិច្ចផ្ទៃក្នុងរបស់កម្ពុជា បានចាប់ផ្តើមកម្រើកបណ្តើរៗឆ្ពោះទៅរកប្រក្រតីភាពឡើងវិញហើយ ក្រោយពីមានការសម្រាលលើវិធានការរក្សា គម្លាតសុវត្ថិភាពសង្គម។
ធនាគារពិភពលោកបានឱ្យដឹងថា តម្រូវការក្នុងស្រុក រួមមាន ការធ្វើដំណើរនិងសកម្មភាពទេសចរណ៍ក្នុងស្រុកផង កំពុងតែងើបឡើងវិញ។ កម្ពុជា និងចិនបានប្រកាសបញ្ចប់ការចរចកិច្ចព្រមព្រៀងពាណិជ្ជកម្មសេរី រវាងប្រទេសទាំងពីរ (CCFTA)រួចហើយៗកិច្ចព្រមព្រៀងនេះទំនងជានឹងចូលជាធរមានក្នុងឆ្នាំ២០២១ ៕
