ដោយ: លាងហួរ
បាងកក: ក្រសួងពាណិជ្ជកម្មថៃ បានឆ្លើយបដិសេធសេចក្តីសម្រេចចិត្តបឋមរបស់សហរដ្ឋអាមេរិក ដែលថាបន្ទះស្រូបពន្លឺព្រះអាទិត្យ ដែលនាំចូលពីប្រទេសថៃ កំពុងគេចវេសពីវិធានការប្រឆាំង ការលក់បង្ខូចថ្លៃរបស់សហរដ្ឋអាមេរិក។
ក្រុមអាជ្ញាធរអាមេរិក បានចេញផ្សាយការសម្រេចចិត្ត កាលពីថ្ងៃទី៨ ខែធ្នូថា បន្ទះសូឡា និងម៉ូឌុល ដែលនាំចូលពីក្រុមហ៊ុនផលិត ក្នុងប្រទេសថៃ វៀតណាម ម៉ាឡេស៊ី និងកម្ពុជា កំពុងប្រើប្រាស់គ្រឿងបន្លាស់ពីប្រទេសចិន ដោយនេះបង្ហាញពីចេតនា ដើម្បីគេចវេសពីវិធានការប្រឆាំងការលក់បង្ខូចថ្លៃរបស់សហរដ្ឋអាមេរិក។
កាលពីថ្ងៃព្រហស្បតិ៍ ទី១៥ ខែធ្នូកន្លងទៅ ក្រសួងពាណិជ្ជកម្មថៃបានអះអាងថា ខ្លួនបានផ្ញើលិខិតជំទាស់ទៅកាន់ លោកស្រីLisa Wang ជំនួយការរដ្ឋលេខាធិការក្រសួងពាណិជ្ជកម្មអាមេរិក សម្រាប់ការអនុវត្តច្បាប់ និងការអនុលោមតាមច្បាប់ ដើម្បីការពារក្រុមហ៊ុននាំចេញរបស់ប្រទេសថៃ។
ក្នុងការសម្រេចជាបឋមនេះ សហរដ្ឋអាមេរិកបានជ្រើសរើសអ្នកនាំចេញរបស់ប្រទេសថៃតែ២រូបប៉ុណ្ណោះ ដើម្បីចោទសួរអំពីប្រភពដើមនៃសម្ភារៈរបស់ពួកគេ។
លោក Ronnarong Phoolpipat អគ្គនាយកនៃនាយកដ្ឋានពាណិជ្ជកម្មបរទេសបានមានប្រសាសន៍ថា តំណាងរបស់សហរដ្ឋអាមេរិក នឹងធ្វើទស្សនកិច្ចនៅប្រទេសថៃ ដើម្បីស៊ើបអង្កេតអាជីវកម្មបន្ទះ ស្រូបពន្លឺព្រះអាទិត្យ មុននឹងបញ្ចប់ការសម្រេចចុងក្រោយ លើការអនុវត្តការប្រឆាំងការលក់បង្ខូចថ្លៃនៅថ្ងៃទី០១ ខែឧសភា ឆ្នាំ២០២៣។
នៅក្នុងពេលជាមួយគ្នានេះ ក្រុមហ៊ុនផលិតបន្ទះសូឡារបស់ប្រទេសថៃ នៅតែអាចនាំចេញបន្ទះស្រូបពន្លឺព្រះអាទិត្យ ទៅកាន់សហរដ្ឋអាមេរិក ដោយមិនគិតពន្ធ ក្រោមការបញ្ជាទិញរបស់ប្រធានាធិបតីអាមេរិក ដែលលើកលែងពន្ធនាំចូល លើផលិតផលថាមពលពន្លឺព្រះអាទិត្យ ពីប្រទេសទាំង៤រហូតដល់ថ្ងៃទី០៩ ខែមិថុនា ឆ្នាំ២០២៤៕