ដោយៈម៉ាណេត
ភ្នំពេញៈ សន្ទស្សន៍ថ្លៃទំនិញសម្រាប់សម្ភារៈសំណង់ស្ទើរគ្រប់ប្រភេទ ដែលកំពុងដាក់លក់នៅតាមទីផ្សារនៅក្នុងខែតុលា ឆ្នាំ២០២០ បានប្រែប្រួលថ្លៃលក់បន្តិចបន្តួច ខណៈប្រភេទទំនិញសម្ភារៈការិយាល័យ គ្រឿងសង្ហារិម និងគ្រឿងអេឡិចត្រូនិកឈរនៅទ្រឹង។
យោងតាមរបាយការណ៍របស់នាយកដ្ឋានស្ថិតិ នៃអគ្គនាយកដ្ឋានគោលនយោបាយ នៃក្រសួងសេដ្ឋកិច្ច និងហិរញ្ញវត្ថុបានឱ្យដឹងថា សន្ទស្សន៍ថ្លៃទំនិញ មានការប្រែប្រួលឡើងចុះនៅដើមខែ តុលា ឆ្នាំ២០២០ ធៀបនឹងខែកញ្ញា។ តម្លៃលក់លើមុខទំនិញខ្លះមានការកើនឡើងឡើង ខណៈមានប្រភេទទំនិញមួយចំនួនទៀត បានធ្លាក់ចុះបន្តិចបន្តូច ជាពិសេសថ្លៃសម្ភារៈសំណង់ ថ្លៃម្ហូបអាហារ និងថ្លៃភេសជ្ជៈផ្សេងៗនៅតាមទីផ្សារ។
ចំពោះថ្លៃលក់សម្ភារៈសំណង់នៅតាមទីផ្សារ នៅក្នុងខែតុលា ឆ្នាំ២០២០ តម្លៃទីផ្សារឥដ្ឋតាន់ចំនួន ១ម៉ឺនដុំ មានតម្លៃ ៤៨០ដុល្លារ បានធ្លាក់ចុះ ១០ដុល្លារ បើធៀបទៅនឹងខែកញ្ញា ឥដ្ឋប្រហោង ១ម៉ឺនដុំ មានតម្លៃ៣៥០ដុល្លារ កើនឡើង២០ដុល្លារ ប្រភេទថ្មមួយម៉ែត្រគីបថ្លៃ២២ដុល្លារ បានកើនឡើង១ដុល្លារ ដែកសរសៃ១០–១៦លី ក្នុងមួយតោន ៥៤៥ ដុល្លារ ធ្លាក់ចុះ៥ដុល្លារ ខណៈតម្លៃស៊ីម៉ង់ ខ្សាច់ ថ្នាំលាប ស្ពេត្រូ និងបំពង់ជ័រនៅឈរទ្រឹង។
តម្លៃសម្ភារៈការិយាល័យ គ្រឿងអេឡិចត្រូនិច គ្រឿងសង្ហារិម គ្រឿងបរិក្ខារអគ្គិសនី ប្រេងម៉ាស៊ីន គ្រឿងបន្លាស់រថយន្ត ថ្លៃកម្លាំងពលកម្ម និងការលក់ សម្ភារៈផ្សេងៗទៀត មិនមានការប្រែប្រួលខ្លាំងនោះឡើយ បើធៀបនិង ខែ កញ្ញា ឆ្នាំ២០២០ កន្លងមក៕
