ដោយ: លាងហួរ
ឈុនបុរី: ការិយាល័យដែនសមុទ្រប៉ាតាយ៉ា នៃប្រទេសថៃគ្រោងបន្តផែនការជួសជុលកំពង់ផែ Na Ban លើកោះលែនចំនួន២០០លានបាត (ប្រហែល៥,៥៨លានដុល្លារអាមេរិក) បន្ទាប់ពីបានឆ្លងកាត់ការសិក្សាវាយតម្លៃផលប៉ះពាល់បរិស្ថានរួចរាល់។
បច្ចុប្បន្ននេះ នាយកដ្ឋានសមុទ្រគ្រោងប្រមូលថវិកាសម្រាប់សារពើពន្ធឆ្នាំ២០២៤ ដើម្បីជួសជុលកំពង់ផែ Na Ban ។
លោក Ekkarat Khantharo ប្រធានការិយាល័យដែនសមុទ្រប៉ាតាយ៉ា បានមានប្រសាសន៍ថា នាយកដ្ឋានបានដាក់បញ្ចូលការកែលម្អកំពង់ផែ ទៅក្នុងផែនការសកម្មភាពរបស់ខ្លួន ក្នុងការលើកកម្ពស់វិស័យទេសចរណ៍នៅប៉ាតាយ៉ា និងបម្រើដល់ច្រករបៀងសេដ្ឋកិច្ចភាគខាងកើត (EEC)ផងដែរ។ គម្រោងនេះត្រូវបានគេប៉ាន់ស្មានថា នឹងត្រូវចំណាយថវិកាប្រមាណ២០០លានបាត ដោយការសាងសង់ត្រូវការរយៈពេលចន្លោះពី២ទៅ៣ឆ្នាំ ដោយនឹងចាប់ផ្តើមភ្លាមៗ ក្រោយពីថវិកាត្រូវបានអនុម័ត។
លោកបានបន្តថា ផែនការរចនាកំពង់ផែនេះមានរាងជាអក្សរ T ដែលអាចផ្ទុកទូកដឹកអ្នកដំណើរធំៗដែលមានកៅអីចំនួន៣០០។ ចំណែកទូកតូចៗ និងទូកល្បឿនលឿនក៏អាចចតនៅកំពង់ផែនេះបានផងដែរ៕