ដោយៈ លក្ខិណា
ភ្នំពេញៈ នាឱកាសថ្ងៃឈប់រយៈពេល៣ថ្ងៃ នៃព្រះរាជពិធីបុណ្យអុំទូក បណ្តែតប្រទីប សំពះព្រះខែ និងអកអំបុក ពីថ្ងៃទី៧ដល់៩ ខែវិច្ឆិកា ឆ្នាំ២០២២ នៅទូទាំងប្រទេសទទួលបានភ្ញៀវសរុប២.៥៧៨.៨៣៨នាក់ ក្នុងនោះភ្ញៀវជាតិ២.៥៤៥.១៦១នាក់ និងភ្ញៀវបរទេសផ្ទៃក្នុង៣៣.៦៧៧នាក់។ នេះបើតាមរបាយការណ៍ស្ថិតិរបស់ក្រសួងទេសចរណ៍ ដែលបានចេញផ្សាយនៅព្រឹកថ្ងៃទី១១ខែវិច្ឆិកា២០២២។
របាយការណ៍ដដែលបានបង្ហាញផងដែរ ពីចំនួនភ្ញៀវទេសចរតាមថ្ងៃនីមួយៗនេះពិធីបុណ្យអុំទូកកក្នុងនោះ ថ្ងៃទី១ទទួលបានភ្ញៀវទេសចរណ៍ជាតិ អន្តរជាតិសរុប៧៥៦.១៩០នាក់ ថ្ងៃទី២ទទួលបានភ្ញៀវសរុប១.០៦៦.១១៣នាក់ ថ្ងៃទី៣ទទួលបានភ្ញៀវសរុប៧៥៦.៥៣៥នាក់ ។
ចំណែកគោលដៅទេសចរណ៍សំខាន់ៗ ក្នុងរយៈពេល៣ថ្ងៃនេះ រួមមាន ខេត្តកំពត ទទួលបានភ្ញៀវសរុប៥៨៨.៥០៦នាក់ ខេត្តព្រះសីហនុទទួលបាន ៤៩៤.៩១៩នាក់ ខេត្តសៀមរាបទទួលបាន ៣០៩.៥០៣នាក់ ខេត្តត្បូងឃ្មុំ២៣.៩៩៥នាក់ ខេត្តកំពង់ស្ពឺ២៣៣.១៥៧នាក់ រាជធានីភ្នំពេញ១៦៦.០៨៦នាក់ ខេត្តបាត់ដំបង៩៨.៦៥៥នាក់ និងខេត្តកែបទទួលបានភ្ញៀវទេសចរសរុបចំនួន៩១.៣០៤នាក់ ។តួលេខខាងលើមានការកើនឡើង១៨៣,៣៤ភាគរយ បើធៀបនឹងរយៈពេល៣ថ្ងៃនៃព្រះរាជពិធីបុណ្យអុំទូកកាលពីឆ្នាំ២០២១។
ក្នុងឱកាសថ្ងៃឈប់សម្រាក ព្រះរាជ្យពិធីបុណ្យអុំទូកនេះ រដ្ឋបាលខេត្តកំពង់ស្ពឺ ខេត្តកំពត និងខេត្តត្បូងឃ្មុំបានរៀបចំពិធីបុណ្យអុំទូក ក្នុងមូលដ្ឋានរបស់ខ្លួន ដែលបានទាក់ទាញភ្ញៀវទេសចរជាច្រើន ខណៈដែលបណ្តាខេត្តមួយចំនួនផ្សេងទៀតបានរៀបចំរួចហើយ កាលពីមុនថ្ងៃបុណ្យអុំទូក ។
ដោយឡែក បណ្តាខេត្តផ្សេងទៀត ដែលមិនមានការរៀបចំពិធីបុណ្យអុំទូក រដ្ឋបាលខេត្តបានរៀបចំជាកម្មវិធីតាំងពិព័រណ៍ ការប្រគុំតន្រ្តី និងកម្មវិធីកម្សាន្តសប្បាយជាច្រើនទៀតផងដែរ។ ចំណែកចរាចរណ៍នៅតាមដងផ្លូវជាតិសំខាន់ៗ រួមទាំងផ្លូវល្បឿនលឿនទៅកាន់ ខេត្តព្រះសីហនុ មានការមមាញឹកខ្លាំង និងមានការកកស្ទះដោយអន្លើៗនៅតាមទីតាំងមួយចំនួន។
បើតាមបណ្តាសណ្ឋាគារ ផ្ទះសំណាក់ និងសេវាស្នាក់នៅនានា ត្រូវបានភ្ញៀវស្នាក់នៅពេញស្ទើរ១០០% ស្របពេលដែលចរន្តភ្ញៀវទេសចរមានសភាពផុសផុល នៅគ្រប់គោលដៅទេសចរណ៍ទូទាំងប្រទេស ៕
