ដោយ: លាងហួរ
ភ្នំពេញ: ក្រសួងទេសចរណ៍បានឱ្យដឹងថា ប្រទេសកម្ពុជាទទួលបានភ្ញៀវអន្តរជាតិចម្រុះជាតិសាសន៍ បានចំនួនជាង១,២លាននាក់ ក្នុងរយៈពេល៩ខែដំបូងនៃឆ្នាំ២០២២នេះ កើនឡើង៨៦១ភាគរយ បើធៀបនឹងរយៈពេលដូចគ្នាកាលពីឆ្នាំ២០២១។
របាយការណ៍ដដែលបានបង្ហាញថា ក្នុងអំឡុងខែមករា ដល់ខែកញ្ញាឆ្នាំនេះ ប្រទេសថៃបានឈរលើកំពូលតារាង នៃការមកដល់របស់ភ្ញៀវទេសចរអន្តរជាតិមកកាន់កម្ពុជា បន្ទាប់មកគឺប្រទេសវៀតណាម ចិន សហរដ្ឋអាមេរិក និងឥណ្ឌូនេស៊ី។
រដ្ឋមន្ត្រីក្រសួងទេសចរណ៍ លោក ថោង ខុន បានប្រាប់សារពត៌មានស៊ីនហួរថា ផ្អែកលើតួលេខចុងក្រោយនេះ ប្រទេសកម្ពុជាត្រូវបានគេរំពឹងថានឹងទាក់ទាញភ្ញៀវទេសចរអន្តរជាតិ បានចន្លោះពី១,៥ លាននាក់ទៅ២លាននាក់ក្នុងឆ្នាំ ២០២២។
លោកថោង ខុន បានសន្មតថាការកើនឡើងគួរឱ្យកត់សម្គាល់នេះ ត្រូវបានជំរុញមកពីការបើកព្រំដែនឡើងវិញ ពេញលេញរបស់កម្ពុជាចំពោះអ្នកដំណើរទាំងអស់ យុទ្ធសាស្ត្រអភិវឌ្ឍន៍ទេសចរណ៍ និងអត្រាចាក់វ៉ាក់សាំងខ្ពស់។
រដ្ឋលេខាធិការក្រសួងទេសចរណ៍ លោក តុប សុភ័គ មានប្រសាសន៍ថា ចំនួនភ្ញៀវទេសចរអន្តរជាតិមកកម្ពុជា ត្រូវបានគេរំពឹងថានឹងឈានដល់កម្រិតមុនការរាតត្បាតជំងឺកូវីដ-១៩ នៅឆ្នាំ២០២៦ ឬឆ្នាំ២០២៧។
មុនពេលមានជំងឺរាតត្បាត ប្រទេសកម្ពុជាទទួលបានភ្ញៀវទេសចរអន្តរជាតិចំនួន៦,៦លាននាក់ក្នុងឆ្នាំ២០១៩ ដែលបង្កើតប្រាក់ចំណូលបាន៤,៩២ពាន់លានដុល្លារអាមេរិក។
លោកបានមានប្រសាសន៍បន្តថា វិស័យទេសចរណ៍របស់កម្ពុជាបានងើបឡើងវិញយ៉ាងខ្លាំង ហើយត្រូវបានគេព្យាករណ៍ថា កម្ពុជានឹងទាក់ទាញភ្ញៀវទេសចរអន្តរជាតិ ប្រមាណ៧លាននាក់នៅឆ្នាំ២០២៦ ឬ២០២៧និងរហូតដល់៧,៥លាននាក់នៅឆ្នាំ២០២៨៕