ដោយៈ ម៉ាណេត
ភ្នំពេញៈ ក្រុមហ៊ុន Hyatt ដែលមានមូលដ្ឋាននៅអាមេរិក នឹងបើកសណ្ឋាគារដំបូងរបស់ខ្លួន នៅក្នុងរាជធានីភ្នំពេញនៅឆ្នាំក្រោយ ដែលមានទីតាំងស្ថិតនៅក្នុងខណ្ឌដូនពេញ។
សណ្ឋាគារ Hyatt Regency Phnom Penh បានប្រកាសថា នឹងបើកដំណើរជាផ្លូវការនៅត្រីមាសទី១ ឆ្នាំ ២០២។ នេះបើយោងតាមការគេទំព័រ Business Traveller ចេញផ្សាយនៅថ្ងៃទី១១ ខែតុលា ឆ្នាំ២០២០ ។
សណ្ឋាគារ ដែលមាន ២៤៧បន្ទប់នេះ រួមបញ្ចូលគ្នានូវអគារបែបសម័យអាណានិគមជាមួយនឹងអគារទំនើប ហើយស្ថិតនៅជិតព្រះបរមរាជវាំង និងសារមន្ទីរជាតិ។
អគារនេះ ត្រូវបានរចនាផ្នែកខាងក្នុង ដោយក្រុមហ៊ុនស្ថាបត្យកម្មដ៏ល្បី SCDA Architects ដែលមានមូលដ្ឋានសឹង្ហបុរី ដែលឆ្លុះបញ្ចាំងពីបេតិកភណ្ឌចម្រុះរបស់ប្រទេសកម្ពុជា ស្ថាបត្យកម្មខ្មែរ ឥទ្ធិពលអាណានិគមបារាំង និងស្នាដៃសិល្បៈពិសេសដែលបង្កើតឡើងដោយកូនខ្មែរ។
លក្ខណៈពិសេសរបស់អគារនេះ នឹងរួមបញ្ចូលទាំងភោជនីយដ្ឋាន និងបារលើដំបូល ដែលមានទេសភាពមាត់ទន្លេមេគង្គដ៏ទាក់ទាញ ន្លែងប្រជុំ កន្លែងហាត់ប្រាណ អាងហែលទឹក និងកន្លែងស្ប៉ា។
សណ្ឋាគារនេះ នឹងកា្លយជាអចលនទ្រព្យទី២ បន្ទាប់សណ្ឋាគារ Park Hyatt Siem Reap ដែលអភិវឌ្ឍដោយក្រុមហ៊ុននៅក្នុងប្រទេសកម្ពុជា។ សណ្ឋាគារនេះ ក៏នឹងបម្រើដល់អ្នកជំនួញ ក៏ដូចជាភ្ញៀវទេសចរជាតិ និងអន្តរជាតិដែលមកទស្សនារាជធានីភ្នំពេញ។
ក្នុងរយៈពេល៩ខែ ឆ្នាំ២០២០នេះ រាជធានីភ្នំពេញទទួលបានគម្រោងសាងសង់សំណង់ថ្មីៗជាង១០០០គម្រោង គិតជាទឹកប្រាក់ជាង២,៣ពាន់លានដុល្លារអាមេរិក៕