ដោយៈ គង់ ម៉ាលីនណា
ភ្នំពេញៈ របាយការណ៍របស់ក្រសួងកសិកម្មបានបង្ហាញថា កម្ពុជារកចំណូលបានជាង៣៤៨លានដុល្លារពីការបញ្ចេញលក់ជ័រ និងឈើកៅស៊ូ ទៅកាន់ទីផ្សារអន្តរជាតិ ក្នុងរយៈពេល៩ខែដើមឆ្នាំ២០២២។
ចំណូលនេះបានធ្លាក់ចុះ៩ភាគរយ បើធៀបរយៈពេលដូចគ្នាឆ្នាំមុន ដោយសារតែការធ្លាក់ចុះ នៃតម្រូវការទីផ្សារពិភពលោក ពិសេសទីផ្សារចិន និងអឺរ៉ុបដែលកំពុងញាំញីដោយបញ្ហាជម្លោះប្រដាប់អាវុធ។
យោងតាមរបាយការណ៍អគ្គនាយកដ្ឋានកៅស៊ូ នៃក្រសួងកសិកម្ម រុក្ខាប្រមាញ់ និងនេសាទបានឲ្យដឹងថា ការបញ្ចេញលក់ជរ័កៅស៊ូ ចាប់ពីដើមឆ្នាំរហូតមកដល់ចុងខែកញ្ញា ឆ្នាំ២០២២ មានបរិមាណសរុប២២៧- ៦០០ តោន កើនឡើង៧២៧តោន ស្មើនឹង០,៣ភាគរយ បើធៀបនឹងរយៈពេលដូចគ្នាឆ្នាំមុន។ ចំណែកបរិមាណបញ្ចេញលក់ឈើកៅស៊ូ ចាប់ពីដើមឆ្នាំរហូតដល់ខែកញ្ញា សម្រេចបាន២១,៨៣២ម៉ែត្រគុប។
របាយការណ៍ដដែលឱ្យដឹងទៀតថា តម្លៃជ័រកៅស៊ូ ជាមធ្យមគិតចាប់ពីដើមឆ្នាំរហូតដល់ខែកញ្ញា ឆ្នាំ២០២២ គឺមានតម្លៃ១៥១៧ ដុល្លារក្នុង១ តោន ថយចុះ១៤៨ ដុល្លារក្នុង១តោនស្មើ ធៀបនឹងរយៈពេលដូចគ្នាឆ្នាំមុន។
ចំណូលពីការនាំចេញជ័រកៅស៊ូ រហូតដល់ខែកញ្ញាមានជាង ៣៤៥ លានដុល្លារ។ ចំណែកចំណូលពីការនាំឈើកៅស៊ូចេញ មានចំនួនជាង៣ លានដុល្លារ។
លោកហ៊ឹម អូន អគ្គនាយកនៃអគ្គនាយកដ្ឋានកៅស៊ូ បានមានប្រសាសន៍ឲ្យដឹងថា ស្ថានភាពការនាំចេញមានកំណើនតិចតួច ដោយសារកត្តាវិបត្តិសេដ្ឋកិច្ចសកល។
លោកបានថ្លែងថា “ការថមថយនេះ ដោយសារកម្ពុជាជាចំណែកមួយក្នុងការនាំចេញផលិតផលកៅស៊ូពិភពលោក។ ការធ្លាក់ថ្លៃដោយសារកត្តាវិបត្តិសេដ្ឋកិច្ចសកល តម្រូវការទាប ការភ័យខ្លាចនៃអតិផរណា ការដំឡើងអត្រាការប្រាក់របស់អាមេរិក ក្នុងការរឹតបន្តឹងចរាចរណ៍ប្រាក់ដុល្លារ ស្ថានភាពងើបឡើងវិញ និងការបន្តបិទខ្ទប់ផ្នែកខ្លះដោយសារកូវីដ១៩ នៅប្រទេសចិន និង សង្គ្រាមរវាងប្រទេសរុស្ស៊ី និងអ៊ុយក្រែន ព្រមទាំងផលប៉ះពាល់រវាងចិននិងអាមេរិកអំពីភូមិសាស្ត្រនយោបាយ”៕
