ដោយ: លាងហួរ
សិង្ហបុរី: គម្រោងផ្ទះល្វែង ដែលសាងសង់សម្រាប់ការបញ្ជាទិញ (Build-to-Order) ដែលស្ថិតក្នុងតំបន់លំនៅដ្ឋានចាស់នៃទីក្រុងតាមភីណេស (Tampines) ទទួលបានការពេញនិយមបំផុតសម្រាប់អតិថិជននៅក្នុងខែសីហាកន្លងមក។
ការលក់គម្រោងផ្ទះល្វែងប្រភេទនេះចុងក្រោយបំផុត បានបិទនៅម៉ោង១១:៥៩នាទីយប់ នៅថ្ងៃច័ន្ទ ទី៥ ខែកញ្ញា ដោយចំនួនចុងក្រោយបានធ្វើបច្ចុប្បន្នភាព នៅរសៀលថ្ងៃអង្គារ។
គម្រោងចំនួន០៧ត្រូវបានលក់ចេញ នៅក្នុងទីក្រុងមួយចំនួន ដូចជា Tampines Ang Mo Kio Bukit Merah និង Choa Chu Kang Jurong East និង Woodlands។
ផ្ទះល្វែង ដែលមាន៥បន្ទប់ស្ថិតក្នុងតំបន់លំនៅដ្ឋានចាស់ៗនៃទីក្រុងTampinsមានការពេញនិយមបំផុតនៅឆ្នាំនេះ ដោយមានអ្នកដាក់ពាក្យចំនួន៣.០៨២នាក់សម្រាប់ផ្ទះល្វែងចំនួន១១៧។
ផ្ទះល្វែង ដែលមាន៤បន្ទប់នៅទីក្រុង Tampines ស្ថិតក្រោមគម្រោង BTO ខែសីហាក៏បានទាក់ទាញអ្នកទិញជាច្រើនផងដែរ ដោយមានអ្នកដាក់ពាក្យសុំ៣.៣៤៧សម្រាប់ផ្ទះល្វែងចំនួន១៥០។
នៅក្នុងទីក្រុងJurong East ផ្ទះល្វែង៤បន្ទប់នីមួយៗ បានទាក់ទាញអ្នកដាក់ពាក្យ៦,៧នាក់ ហើយមានអ្នកដាក់ពាក្យ៤,១នាក់ក្នុងមួយផ្ទះល្វែងដែលមាន៣បន្ទប់។ មានបេក្ខជនប្រហែល៣៩.០០០នាក់បានមកដាក់ពាក្យទិញ ដែលប្រហែល៤៦ភាគរយច្រើនជាងកម្មវិធីលក់ក្នុងខែឧសភា។
ក្រុមប្រឹក្សាលំនៅឋាន និងអភិវឌ្ឍន៍ (HDB) បានបើកដំណើរការគម្រោងផ្ទះល្វែងBTO ចំនួន៤.៩៩៣នៅក្នុងខែសីហា បើប្រៀបធៀបទៅនឹងចំនួនផ្ទះល្វែង៤.៥៨៣ដែលបានដំណើរការនៅក្នុងខែឧសភា។
លោកស្រី Christine Sun អនុប្រធានជាន់ខ្ពស់ផ្នែកស្រាវជ្រាវ និងវិភាគរបស់ក្រុមហ៊ុន Orang Tee and Tie បាននិយាយថា អ្នកទិញកាន់តែច្រើនប្រហែលជាបានងាកទៅរកទីផ្សារ BTO ដោយសារតែតម្លៃនៃផ្ទះល្វែង BTO មានតម្លៃសមរម្យជាងផ្ទះលក់បន្ត និងខុនដូឯកជនឥឡូវនេះ៕