ដោយៈ រ៉ាណេត
ភ្នំពេញៈ ប្រធានសមាគមអចលនទ្រព្យ សកល (GRA) លោក សំ សុខនឿនបានធ្វើការចែករំលែកនូវចំណេះដឹងស្ដីពី ភាពជាអ្នកជំនាញក្នុងការលក់ផ្ទះរបស់ភ្នាក់ងារ និងមានឱកាសទទួលបានជោគជ័យ ហើយទទួលមានកម្រៃជើងសារច្រើន។
លោក សំ សុខនឿន បានមានប្រសាសន៍នៅល្ងាចថ្ងៃទី៥ ខែតុលា ឆ្នាំ២០២០កន្លងមកថា អតិថិជនដែលទិញផ្ទះ ត្រូវបានធ្វើឡើងក្នុងគោលបំណង២ផ្សេងគ្នា គឺទី១ទិញសម្រាប់រស់នៅ ដែលក្នុងនាមជាភ្នាក់ងារ ត្រូវចេះមើលពីភាពចូលចិត្តនៃការរស់នៅរបស់ភ្ញៀវ។
លោកបានបញ្ជាក់ថា “អ្នកខ្លះចូលចិត្តរស់នៅតាមដងទន្លេ។ ចំណែកអ្នកខ្លះទៀតចូលចិត្តរស់នៅតាមតំបន់ស៊ីវីល័យ ដូច្នេះក្នុងនាមយើងជាអ្នកលក់ គួរតែណែនាំបង្ហាញពីផលប្រយោជន៍ក្នុងតំបន់ផ្សេងគ្នាទាំងនេះ” ។ លោកបន្ថែមថា “ដូច្នេះក្នុងនាមជាអ្នកជំនាញត្រូវយល់ឱ្យច្បាស់អំពីស្ថានភាព និងតម្រូវការរបស់អតិថិជន ទើបអាចឱ្យដំណើរការនៃការលក់ទទួលបានផលល្អ និងចំណេញថវិកាច្រើន” ។
អ្នកជំនាញវិស័យអចលនទ្រព្យខាងលើ ក៏បានថ្លែងពីសកម្មភាពមួយចំនួននៅក្នុងវិស័យអចលនទ្រព្យផងដែរ ដោយលើកឡើងពីនៅការវាយតម្លៃខុស ពីការពិតដែលផ្ទុយពីវិជ្ជាជីវៈ ហើយទង្វើបែបនេះ អាចកើតមានចំពោះក្រុមមួយចំនួនតូច ដែលបង្កកើតឡើងដោយមិនស្របច្បាប់ ឬមិនបានទទួលបានការបណ្តុះបណ្តាលជំនាញជាអ្នកអាជីព។
លោកសំ សុខនឿន បានសង្កត់ធ្ងន់ថា “ករណីវាយតម្លៃអចលនវត្ថុខ្ពស់ជាងតម្លៃ ទីផ្សារ ដើម្បីទទួលបានប្រយោជន៍ទាំងសងខាងនេះ មិនមែនមានតែក្នុងប្រទេសយើងនោះទេ ពោលគឺនៅតាមបណ្តាប្រទេសនានា លើសកលលោកក៏ធ្លាប់កើតមានដែរ រហូតមានស្ថាប័ន ដែលជាក្រុមហ៊ុនជំនាញក្នុងវិស័យនេះ បានចងក្រងជាក្រមសីលធម៌ និងតម្រូវឱ្យគោរពអនុវត្តទាំងអស់គ្នា” ។
បច្ចុប្បន្ន នៅកម្ពុជា មិនទាន់មានច្បាប់កំណត់ពីកម្រិត នៃការទទួលទោសពីការវាយតម្លៃអចលនទ្រព្យខុសនោះទេ ពោលគឺមានតែការបង្កើតជាច្បាប់វិជ្ជាជីវៈ និងក្រមសីលធម៌ដែលបង្កើតឡើង ដោយសមាគមជំនាញពាក់ព័ន្ធ ក្រោមការរួមគ្នាបង្កើតតែប៉ុ ណ្ណោះ។ ជាដំណោះស្រាយ និងអាចគេចផុតពីករណីទាំងអស់នេះ ទាំងម្ចាស់ក៏ដូចជាស្ថាប័នហិរញ្ញវត្ថុ (ធនាគារម្ចាស់បំណុល) ដែលពាក់ព័ន្ធ គួរតែស្វែងរកក្រុមហ៊ុនជំនាញ ឬភ្នាក់ងារវាយតម្លៃស្របច្បាប់ធ្វើជាដៃគូ ចៀសវាងការខាតបង់ផលប្រយោជន៍៕
