ដោយស៊ីវ ម៉េង
ភ្នំពេញ៖ ផ្សារទំនើបលំដាប់អន្តរជាតិ Phnom Penh Maga Mall គ្រោងនឹងបើកដំ នើរការនៅកំឡុងដើមត្រីមាសទី២ ឆ្នាំ២០២០កន្លងមកបានពន្យាពេលជាថ្មី ខណៈមានព៌តមានច្បាស់ការណ៍ថា ម្ចាស់គំរោងនេះគ្រោងលក់ផ្សារនេះទៅកាន់អ្នកវិនិយោគដទៃទៀត។
ផ្សារដែលគេគេស្គាល់ផ្សារទំនើប Parkson ស្ថិតនៅលើមហាវិថីសហព័ន្ឋរុស្ស៊ីនេះ មានឈ្មោះPhnom Penh Mega Mall ។
នាយកគ្រប់គ្រងទូទៅនៃក្រុមហ៊ុន Hasson (Cambodia) Development Co, Ltd លោក ROFY OTHSMAN ធ្លាប់បានមានប្រសាសន៍ឲ្យដឹងតាមទូរស័ព្ទថា ផ្សារទំនើបកំពស់៩ជាន់នេះ មានទំហំ១៤០,០០០ម៉ែត្រការ៉េ និងមានលក់ទំនិញចម្រុះ ដែលយើងរំពឹងថានឹងទទួលបានជោគជ័យ និងការគាំទ្រពីអតិថិជន។
លោកបន្តថា “ផ្សារទំនើបនេះស្ថិតនៅទីតាំងល្អប្រសើរ ដោយស្ថិតនៅលើផ្លូវធំ ព័ទ្ឋជុំវិញដោយលំនៅដ្ឋាន ខុនដូ ក្រសួងមន្ទីរ និងសាលារៀនជុំវិញ ហេតុនេះយើងរំពឹងថាវានឹងទទួលបានជោគជ័យ” ។ លោកបន្តថា “ទុនវិនិយោគក្នុងគំរោងនេះ មានទំហំទឹកប្រាក់ចន្លោះពី៧០ទៅ៨០លានដុល្លារ ប៉ុន្តែបើរាប់បញ្ចូលតម្លៃដី គឺគំរោងវិនិយោគនេះមានតម្លៃរហូតដល់១០០លានដុល្លារអាមេរិក” ។
លោក ROFY OTHSMAN បានបន្តថា ជាមួយនឹងការគិតគូពីចំណតយានយន្ត ដែលវាជាបញ្ហាប្រឈមមួយនៅទីក្រុងភ្នំពេញ ទើបក្រុមហ៊ុនបានរៀបចំចំណត ដែលអាចចតយានយន្តបានរហូតដល់១៥០០គ្រឿង ដោយមានទាំងចំណតលើ និងខាងក្រោមដី ដើម្បីបំរើសេចក្តីត្រូវការ និងផ្តល់ភាពងាយស្រួលដល់អតិថិជន។
បច្ចុប្បន្នក្រុមហ៊ុនបានផ្តល់សិទ្ឋជួល ផ្តាច់មុខដល់ក្រុមហ៊ុន CBRE Cambodia ដែលមានជំនាញលើការងារនេះ។
លោកស្រីអាន សុធីតានាយិកាប្រចាំប្រទេសនៃក្រុមហ៊ុន CBRE Cambodia មិនអាចសុំការអត្ថាធិប្បាយបានទេ ប៉ុន្តែអ្នកនាងធ្លាប់បានមានប្រសាសន៍ថា ចំនួនផ្សារទំនើបនៅរាជធានីភ្នំពេញ មិនទាន់លើសតម្រូវការនៅឡើយទេ ដោយសារទំហំផ្សារទំនើបធៀបនឹងមនុស្សម្នាក់នៅក្រុងភ្នំពេញ គឺទំហំផ្សារនៅមានកម្រិតនៅឡើយ។ ម្យ៉ាងទៀតដោយសារតែអ្នកវិនិយោគនិមួយៗ បានចាប់យកចំណែកអតិថិជនខុសៗគ្នា ទីតាំងខុសៗគ្នា។
អ្នកនាងបន្តថា “ការវិនិយោគផ្សារទំនើបងាយទទួលបានផលត្រលប់មកវិញ ប៉ុន្តែអ្នកវិនិយោគត្រូវតែធ្វើការកែលំអរ និងរចនាសោភ័ណភាព និងទីតាំងលក់រៀងរាល់៥ឆ្នាំ ម្តង ទើបទទួលបានជោគជ័យ” ៕