ដោយ៖ សហការី
ភ្នំពេញ ៖ អគ្គនាយកដ្ឋានគយ និងរដ្ឋករកម្ពុជា នៅថ្ងៃទី២៩ ខែកក្កដា ឆ្នាំ២០២២នេះ បានណែនាំទៅដល់ប្រធាននាយកដា្ឋន សាខា និងការិយាល័យគយ និងរដ្ឋករពាក់ព័ន្ធ ត្រូវចាត់វិធានការបណ្តោះអាសន្ន លើការនាំចូលផលិតផលមីកញ្ចប់ និងការ៉េម សង្ស័យថា មានផ្ទុកសារធាតុ អេមីឡែនអុកស៊ីត (Ethylene Oxide) ដែលអាចបង្កហានិភ័យផ្នែកសុខភាពដល់អ្នកប្រើប្រាស់។
អាជ្ញាធរសុវត្ថិភាពម្ហូបអាហាររបស់ប្រទេសនៅសហគមន៍អឺរ៉ុបមួយចំនួន បានរកឃើញលើផលិតផលមីកញ្ចប់ និងការ៉េមមួយចំនួន មានផ្ទុកសំណល់សារធាតុអេទីឡែនអុកស៊ីត ដែលសហភាពអឺរ៉ុប អាមេរិក និងអង្គការសុខភាពពិភពលោក ចាត់ទុកថាជាសារធាតុបង្កហានិភ័យ ជាជំងឺមហារីក ចំពោះអ្នកប្រើប្រាស់ ។
ក្នុងន័យនេះ ដើម្បីចូលរួមការពារសុខភាពសាធារណៈ សុវត្ថិភាពម្ហូបអាហារ និងការពារសុខុមាលភាពអ្នកប្រើប្រាស់ សូមធ្វើការណែនាំបណ្តោះអាសន្នមួយចំនួន ដូចខាងក្រោម ៖
១. ចាប់ពីថ្ងៃទី១ ខែសីហា ឆ្នាំ២០២២ តទៅ រាល់ការនាំចូលទំនិញជាមីកញ្ចប់ម៉ាក “Lucky Me!” ផលិតនៅប្រទេសថៃ, មីកញ្ចប់ម៉ាក “Háo Háo” ផលិតនៅប្រទេសវៀតណាម និងការ៉េមម៉ាក “Häagen-Dazs”(Vanilla) ផលិតនៅប្រទេសបារាំង ដូចមានបរិយាយលម្អិត ក្នុងបញ្ជីភ្ជាប់មកជាមួយលិខិតនេះ ត្រូវមានអមមកជាមួយនូវវិញ្ញាបនបត្រ បញ្ជាក់ការវិភាគសារធាតុ Ethylene Oxide ពីស្ថាប័នមានសមត្ថកិច្ចតតពិនិត្យសុវត្ថិភាពម្ហូបអាហារ នៃប្រទេសនាំចេញ។
ដោយឡែក ចំពោះទំនិញដែលមកដល់ដែនគយ មុនថ្ងៃទី១ ខែសីហា ឆ្នាំ២០២២ អ្នកនាំចូលត្រូវដកសំណាកទំនិញ ធ្វើការវិភាគសារធាតុ Ethylene Oxide នៅអគ្គនាយកដ្ឋានការពារអ្នកប្រើប្រាស់ កិច្ចការប្រកួតប្រជែង និងបង្ក្រាបការក្លែងបន្លំ នៃក្រសួងពាណិជ្ជកម្ម មុនពេលអនុញ្ញាតឱ្យបញ្ចេញទំនិញពីគយ។
២. នាយកដ្ឋានសវនកម្មគយ ត្រូវធ្វើការតាមដាន និងវាយតម្លៃហានិភ័យលើផលិតផលទាំងនេះ ជាប្រចាំដើម្បីលើកវិធានការអនុវត្តឲ្យបានទាល់ពេល និងមានប្រសិទ្ធភាព ។
៣. មន្ត្រីគយ និងរដ្ឋាករមានសមត្ថកិច្ច ត្រូវយកចិត្តទុកដាក់ផ្ទៀងផ្ទាត់ព័ត៌មាន និងទិន្នន័យដែលប្រកាសក្នុងឯកសារជាមួយនឹងទំនិញជាក់ស្ដែង ដើម្បីជៀសវាងការបន្លំនាំចូលងាយគេចវេសពីវិធានការខាងលើជាយថាហេតុ ។
៤. ត្រូវធ្វើការផ្សព្វផ្សាយដល់ធុរជនពាក់ព័ន្ធ ឲ្យបានទូលំទូលាយនៅតាមភូមិសាស្ត្រ នៃអង្គភាពរៀងៗខ្លួនអំពីវិធានការនេះ៕