ដោយគង់ ម៉ាលីនណា
ភ្នំពេញៈ មនុស្សជាច្រើនប្រាថ្នាពាក់អាវធំ មានក្រុមហ៊ុនធំ និងជោគជ័យប៉ុន្តែភាពជាសហគ្រិនមិនមែនជារឿងសាមញ្ញនោះទេ ការពិតពួកគេត្រូវប្រឈមបញ្ហាជាច្រើន និងសំពាធជាច្រើនផងដែរ។
ហេតុនេះដើម្បីក្លាយជាសហគ្រិនជោគជ័យ តើអ្នកចង់ចាប់ផ្តើមជាសហគ្រិនភាពត្រូវគិតនិងរៀនពីអ្វីខ្លះ? ហេតុនេះ Cambodiafinancialtimes.com សូមលើកយកចំនេះដឹងខ្លះៗ យកមកធ្វើជាមូលដ្ឋានសំរាប់ពិចារណា។
បង្កើតគម្រោងអាជីវកម្ម
ជាទូទៅដើម្បីឲ្យអាជីវកម្មមួយ អាចដើរទៅមុខដោយភាពរ៉ឹងមាំ និងជោគជ័យរយៈពេលយូរអង្វែង ចាំបាច់ត្រូវតែគម្រោងអាជីវកម្មមួយ ដែលមានភាពច្បាស់លាស់ និងចក្ខុវិស័យត្រឹមត្រូវ ទោះបីជាអាជីវកម្មនោះចាប់ផ្តើមពីតូចឬធំក៏ដោយ។
សេចក្តីស្រលាញ់និងមានឆន្ទៈ
សហគ្រិនខ្លះ ធ្វើអាជីវកម្មមិនមែនព្រោះតែខ្លួនចូលចិត្ត ឬស្រលាញ់នូវមុខរបរនោះទេ ប៉ុន្តែគេគ្រាន់តែសំលឹងឃើញតែប្រាក់ចំណេញរយៈពេលខ្លីតែប៉ុណ្ណោះ។ ការដែលគ្មានឆន្ទៈ និងសេចក្តីពេញចិត្ត ក្នុងកិច្ចការនោះពិតប្រាកដនេះហើយ ទើបធ្វើឲ្យសហគ្រិនបរាជ័យភាគច្រើន ដោយសារគ្មានកម្លាំងជម្រុញណាមួយ ដែលនាំគេឆ្ពោះទៅរកភាពជោគជ័យ។
ចក្ខុវិស័យនិងជំនាញ
ការធ្វើអាជីវកម្ម ដោយគ្មានជំនាញច្បាស់លាស់ ទៅលើប្រភេទអាជីវកម្ម ដែលខ្លួនធ្វើនោះទេ ដូចជា យល់ដឹងជាលក្ខណៈបច្ចេកទេស ការគ្រប់គ្រង ឬភាពជាអ្នកដឹកនាំជាដើម ជាបញ្ហាដ៏ចម្បងធ្វើឲ្យសហគ្រិនថ្មីថ្មោង មិនអាចគិតបានស៊ីជម្រៅ ទៅលើដំណើរការអាជីវកម្មដែលគេកំពុងតែធ្វើ ហើយក៏ដូចជាបញ្ហាប្រឈម និងដំណោះស្រាយអាជីវកម្ម ដែលគេកំពុងនឹងជួបប្រទះនាពេលបច្ចុប្បន្ននិងពេលអនាគតផងដែរ។
មានជំនាញទំនាក់ទំនងនិងជំនាញលក់
អាជីវកម្មដែលអាចទទួលជោគជ័យទៅបាន ត្រូវការយល់ដឹងឲ្យបានត្រឹមត្រូវពីអ្វីទៅជាអតិថិជនគោលដៅ និងមិនគោលដៅនៃផលិតផល ឬសេវាកម្មរបស់ខ្លួន។ ដោយសារតែការមិនអាចកំណត់បានច្បាស់លាស់នេះហើយ ដែលជាហេតុផលនៃការបរាជ័យមួយ ព្រោះមិនមានជំនាញទំនាក់ទំនង ដែលមានប្រសិទ្ធភាព ក្នុងការរក្សាអតិថិជនរបស់ខ្លួន មិនដឹងពីចំណុចខ្លាំងខ្សោយរបស់ខ្លួនឯងនិងគូប្រជែង។
ភាពតស៊ូនិងការអត់ធ្មត់
សហគ្រិនមួយចំនួនឆាប់រាថយ ខ្វះការតស៊ូណាស់ គ្រាន់តែពួកគេជួបការលំបាកនិងបញ្ហាបន្តិចបន្តួច ក៏បោះបង់ពាក់កណ្តាលផ្លូវបាត់ទៅហើយ។ ពួកគេគ្មានភាពអត់ធ្មត់គ្រប់គ្រាន់ក្នុងការអនុវត្តនូវសកម្មភាពគោលដៅ មួយចំណែកអាចមកពីពួកគេមិនដឹងពីដំណើរការនៃមុខរបរ ជាហេតុនាំឲ្យអាជីវកម្មនោះមិនអាចទទួលបានជោគជ័យនោះឡើយ។
ភាពជាអ្នកដឹកនាំ
ការដែលម្ចាស់អាជីវកម្មមិនបានចែកឲ្យច្បាស់ថា តើមនុស្សណាពូកែប្រើប្រាស់ខួរក្បាល ឬប្រើកម្លាំង។ ប្រភេទមនុស្សដែលឈ្លាសវៃក្នុងការគិត ជាប្រភេទមនុស្សដែលមានការគិតបែបស៊ីជម្រៅ គឺពួកគេនេះហើយ ដែលអាចជួយក្នុងការបង្កើតយុទ្ធសាស្ត្រ ការផ្លាស់ប្តូរឬការបង្កើតថ្មីជាដើម។
ការគ្រប់គ្រងហិរញ្ញវត្ថុនិងលំហូរសាច់ប្រាក់
អាជីវកម្មដែលដួលរលំភាគច្រើន ដោយសារតែការខ្វះចំណេះដឹងចាត់ចែង និងប្រើប្រាស់ហិរញ្ញវត្ថុនេះឯង។
ឧទាហរណ៍ ពួកគេមិនអាចគ្រប់គ្រងហ្មត់ចត់ រវាងលុយដែលដាក់ដើមទុនផ្ទាល់ក្នុងការរកស៊ី និងលុយដែលខ្ចីគេមករកស៊ីជាដើម។ មួយវិញទៀត ទុនបម្រុងដែលត្រូវប្រើឲ្យបានរយៈពេល៦ខែ គេបែរជាចាយពេលតែ២ ទៅ៣ខែក៏អស់ទុនបម្រុងបាត់ទៅហើយ។
ជាងនេះទៅទៀត អ្នកធ្វើអាជីវកម្មជំពូកនេះ មិនមានផែនការហិរញ្ញវត្ថុច្បាស់លាស់ ហើយក៏មិនមានទំនួលខុសត្រូវ ទៅលើលុយដែលខ្ចីគេយកមករកស៊ីនោះដែរ៕