ដោយ ឧត្តម
ភ្នំពេញៈ ទីផ្សារអចលនទ្រព្យនៅក្នុងប្រទេសកម្ពុជា ដែលរហូតមដល់ត្រីមាសទី៣ នៃឆ្នាំនេះ នៅតែមិនទាន់មានស្ថានភាពល្អប្រសើរនៅឡើយ បើទោះបីប្រទេសមួយចំនួនរកឃើញវាក់សាំងសម្រាប់ព្យាបាលជំងឺកូវីដ-១៩ក៏ដោយ ដែលបញ្ហានេះអាចនឹងពន្យាពេលរហូតដល់បំណាច់ឆ្នាំ២០២១ ខាងមុខនេះ ។
លោកស្រី អាន សុធីតា នាយិកាក្រុមហ៊ុនអន្តរជាតិ CBRE Cambodia បានប្រាប់គេហទំព័រ Propertyare.asia នៅថ្ងៃទី ២៣ ខែកញ្ញា ឆ្នាំ ២០២០កន្លងមកបានឱ្យដឹងថា ទីផ្សារអចលនទ្រព្យ ស្ទើតែគ្រប់ប្រភេទនៅក្នុងប្រទេសកម្ពុជា រហូតមកដល់ពេលនេះ ហាក់មិនទាន់មានដំណើរការល្អប្រសើរនៅឡើយទេ។
លោកស្រីបន្តថា “មានគម្រោងវិនិយោគមួយចំនួន ក៏ត្រូវបានប្រកាសពន្យាពេលសាងសង់ បង្កឡើងដោយជំងឺកូវីដ ១៩ ហើយវាអាចនឹងមានភាពល្អប្រសើរឡើងវិញ នៅឆ្នាំក្រោយៗទៀត” ។ លោកស្រីបន្តថា “បញ្ហានេះមិនមែនកើតឡើង តែនៅក្នុងប្រទេកម្ពុជានោះទេ ពោលវាមានលក្ខណៈជាសកល” ។
លោកស្រីបន្ថែមថា ទីផ្សារអចលនទ្រព្យ ដូចជាតម្លៃធ្លីនៅក្នុងកណ្តាលទីក្រុងភ្នំពេញវិញ ហាក់មិនមានការឡើងនោះទេ ដោយសារតែកង្វះវិនិយោគិនមកអភិវឌ្ឍន និងតម្រូវការ (បើគ្មានអ្នកទិញតម្លៃមិនមានការឡើងនោះទេ) ខណៈតម្លៃនៅតាមជាយក្រុងហាក់មានកើនឡើងបន្តិចបន្តួចប៉ុណ្ណោះ” ។
លោកឧកញ៉ា គឹម ហ៊ាង អគ្គនាយក ក្រុមហ៊ុន KW Cambodia បានឱ្យដឹងដែរថា វិស័យអចលនទ្រព្យកម្ពុជា ក្នុងរយៈពេលជាង១ឆ្នាំនេះ គឺទទួលរងនូវការប៉ះទង្គិចយ៉ាងខ្លាំង ដោយបញ្ហាជំងឺកូវីដ-១៩ ហើយបន្តរហូតដល់ចុងឆ្នាំ ២០២០នេះ ក៏នៅតែស្ថិតនៅក្នុងភាពស្រពិចស្រពិលនៅឡើយ។
លោកឧកញ៉ាបន្តថា “ការប៉ះទង្គិចនៃវិស័យអចលនទ្រព្យកម្ពុជា មានពិតមែន ប៉ុន្តែសម្រាប់ទីផ្សារលំនៅឋាន តម្លៃសមរម្យនៅតែអាចរក្សា បានស្ថានភាពល្អប្រសើរជាងគេ ដោយសារតម្រូវការនៅក្នុងស្រុកនៅមានអត្រាខ្ពស់ ហើយអ្នកអភិវឌ្ឍន៍ភាគច្រើនជាវិនិយោគិននៅក្នុងស្រុកផងដែរ” ៕
