ដោយ៖ សុផារី
ភ្នំពេញៈ គម្រោងអភិវឌ្ឍន៍ “ផ្សារទំនើបសិនជូរីផ្លាហ្សា” ដែលស្ថិតនៅបណ្តោយមហាវិថីសហព័ន្ធរុស្ស៊ី បានប្រកាសបើកលក់គម្រោងផ្សារទំនើប និងមជ្ឈមណ្ឌលពាណិជ្ជកម្មចម្រុះ ខណៈគម្រោងគ្រោងនឹងបញ្ចប់ការសាងសង់នៅខែ សីហា ឆ្នាំ២០២២។
គម្រោងអភិវឌ្ឍន៍ផ្សារទំនើបសិនជូរី ផ្លាហ្សា បានបើកការដ្ឋានសាងសង់កាលពីថ្ងៃទី ២៧ ខែវិច្ឆិកា ឆ្នាំ ២០១៩ លើទីតាំងចាស់នៃផ្សារសិនជូរីផ្លាហ្សា ដែលវិនិយោគដោយក្រុមហ៊ុន JLECC និងមានកម្ពស់ ៦ ជាន់។ គម្រោងនេះមានទីតាំងស្ថិតនៅលើផ្លូវ២០០៥ ភូមិម៉ប្រកខាងជើង សង្កាត់កាកាប ខណ្ឌពោធិ៍សែនជ័យ រាជធានីភ្នំពេញ។
ផ្សារនិងមជ្ឈមណ្ឌលចម្រុះ សិន ជូរីផ្លាហ្សា គឺជាផ្សារទេសចរណ៍ ដែរមានរចនាបទជារាងត្រីកោណ មានកម្ពស់សរុប ៧ជាន់ ដែលជាន់ទី១ ដល់ ជាន់ទី៣ ជាតូបផ្សារលក់ទំនិញចម្រុះរាប់ពាន់មុខ និងការរិយាល័យ ចាប់ពីជាន់ទី៤ ដល់ជាន់ទី៧ ជាសណ្ធារគារលំដាប់ផ្កាយ៤ ដែលនៅជាន់ទី៦ ជាស្កាយបារ និងទីធ្លារសួនច្បារ។
នៅក្នុងពិធីប្រកាសបើកលក់គម្រោងផ្សារទំនើប និងមជ្ឈមណ្ឌលពាណិជ្ជកម្មចម្រុះកាលពីថ្ងៃទី០១ ខែឧសភានេះ លោក លឹម រ៉ាវុធ អគ្គនាយកផ្នែកលក់ និងទីផ្សារ របស់ក្រុមហ៊ុន ខេមបូឌាន ហេងស៊ីន រៀលអ៊ីស្ទេត បានលើកឡើងថា ផ្សារទំនើប និងមជ្ឍមណ្ឌលពាណិជ្ជកម្មចម្រុះ សិនជូរី ផ្លាហ្សានេះ គឺជាគម្រោងដែលបានការសហការឡើងរវាងក្រុមហ៊ុន សិនជូរីផ្លាហ្សា គ្រុប និងក្រុមហ៊ុនអភិវឌ្ឍគម្រោង JLECC ដែលមានបទពិសោធន៏ផ្នែកសាងសង និង គ្រប់គ្រងគម្រោង។
អ្នកនាង គឹម គិនកេសា អ្នកគ្រប់គ្រងជាន់ខ្ពស់នៃក្រុមហ៊ុន CBRE Cambodia បានមានប្រសាសន៍នាពេលកន្លងមកថា ផ្សារទំនើបសិនជូរីផ្លាហ្សាស្ថិតនៅទីតាំងមានមនុស្សរស់នៅច្រើន និងជិតព្រលានយន្តហោះអន្តរជាតិភ្នំពេញ ដែលជាកន្លែងមានការធ្វើដំណើរឆ្លងកាត់ច្រើន៕