ដោយ៖ ម៉ាណេត
ភ្នំពេញ៖ អគារការិយាល័យថ្មីមួយទៀត ក្រោមការបោះទុនវិនិយោគ ៣០លានដុល្លារអាមេរិក នឹងបង្ហាញរូបរាងនៅតាមបណ្តោយលេខ៧០ និងមហាវិថី PPCC ស្ថិតនៅក្នុងខណ្ឌដូនពេញ រាជធានីភ្នំពេញ។
អគារការិយាល័យ មានកម្ពស់៣៨ ជាន់ ស្មើនឹង ១៥០ម៉ែត្រនិង និងកំពុងសាងសង់លើផ្ទៃដីសរុប ៤០ ០០០ ម៉ែត្រការ៉េ។
អគារការិយាល័យនេះ ត្រូវបានវិនិយោគដោយក្រុមហ៊ុន Benrich Real Estate Development Co., Ltd ដែលគ្រោងនឹងបញ្ចប់នៅក្នុងឆ្នាំរយៈ ២ ឆ្នាំ និងសាងសង់ដោយក្រុមហ៊ុន ចិន Nantong Daxin Engineering Company Limited។ អគារ Benrich Tower នេះ គឺជាគម្រោងអគារការិយាល័យលំដាប់ A ថ្មីមួយដែលសាងសង់តាមស្តង់ដារអន្តរជាតិ។
លោក Han Ze ប្រធានក្រុមហ៊ុន Benrich Real Estate Development Co., Ltd បានឱ្យដឹងថា ការវិនិយោគអចលនទ្រព្យនៅក្នុងប្រទេសកម្ពុជាគឺជាឧស្សាហកម្មដ៏ធំមួយ ហើយចំនួនគម្រោងដែលបានបញ្ចប់ និងកំពុងសាងសង់នៅតែបន្តកើនឡើងជារៀងរាល់ថ្ងៃ។
លោកបន្តថា ការសាងសង់អគារការិយាល័យ Benrich Tower នេះ ដើម្បីឆ្លើយតបទៅនឹងតម្រូវការទីផ្សារ ស្តង់ដារ គុណភាព និងការត្រឡប់មកវិញនៃការវិនិយោគ ដែលកត្តាទាំងនេះនឹងមានសារៈសំខាន់សម្រាប់សហគ្រាសទាំងអស់អាចឱ្យមានការដំណើរការឡើងវិញបាន នៅក្នុងឧស្សាហកម្មវិស័យអចលនទ្រព្យនេះ។
លោកបន្ថែមថា ទោះជាយ៉ាងណាក៏ដោយគម្រោងរបស់យើងត្រូវបានបង្កើតឡើងសម្រាប់តម្រូវការទីផ្សារហើយមិនត្រឹមតែសម្រាប់សហគ្រាសដែលមានមូលដ្ឋាននៅទីស្នាក់ការកណ្តាលប៉ុណ្ណោះទេ ថែមទាំងសម្រាប់សហគ្រាសធុនតូចផងដែរ។
លោកបញ្ជាក់ទៀតថា លើសពីនេះ ទីក្រុងភ្នំពេញគឺជាទីក្រុងធំរបស់ប្រទេសកម្ពុជាដែលជាទិសដៅសេដ្ឋកិច្ច និងវិនិយោគថ្មីសម្រាប់សហគ្រាសនិមួយៗ ហើយថ្មីៗនេះវាបានក្លាយជាទីក្រុងមួយដែលមានតម្លៃបំផុតនៅលើពិភពលោក។ ក្រៅពីនេះ គោលនយោបាយ និងភាគលាភ ប្រជាសាស្ត្ររបស់ទីក្រុងភ្នំពេញ ត្រូវបានទាក់ទាញដោយវិនិយោគិនបរទេស និងក្រុមហ៊ុនពហុជាតិជាច្រើន៕