ដោយគង់ ម៉ាលីន
ភ្នំពេញៈ អ្នកជំនាញហិរញ្ញវត្ថុអន្តរជាតិបានអះអាងថា វិស័យមីក្រូហិរញ្ញវត្ថុកម្ពុជា ស្ថិតក្នុងចំណោមប្រព័ន្ឋមីក្រូហិរញ្ញវត្ថុល្អបំផុត នៅក្នុងចំណោមស្ថាប័នហិរញ្ញបវត្ថុនៅតាមបណ្តាប្រទេសជាច្រើនក្នុងពិភពលោក។
លោករ៉ុន បេវ៉ាកក្វាស្ថាបនិកនិងនាយកគ្រប់គ្រងរបស់ក្រុមហ៊ុន Access Advisory ដើម្បីធ្វើការសិក្សាស្រាវជ្រាវ និងចងក្រងសៀវភៅ “ការកសាងវិស័យហិរញ្ញវត្ថុប្រកបដោយបរិយាបន្ន” និងប្រកាន់លើគោលគំនិតនិងមតិយោបល់ឯករាជ្យរបស់អ្នកនិពន្ធបានថ្លែងថា មីក្រូហិរញ្ញវត្ថុកម្ពុជា គួរត្រូវបានយកចិត្តទុកដាក់ និងទទួលបាននូវការគោរព។
លោកបានបន្តថា “វិស័យមីក្រូហិរញ្ញវត្ថុ ត្រូវការធ្វើការសម្រេចចិត្តឱ្យបានត្រឹមត្រូវក្នុងការផ្តល់សេវាហិរញ្ញវត្ថុ ប្រកួតប្រជែងដោយស្មើភាព ផ្តល់សេវាហិរញ្ញវត្ថុជូនអតិថិជនតាមតម្រូវការ ដាក់ចេញបទប្បញ្ញត្តិ និងមានការចុះត្រួតពិនិត្យសំដៅធានាការអនុលោមតាមបទប្បញ្ញត្តិ ព្រមទាំងតម្រូវឱ្យមានការសហការគ្នា រវាងភាគីពាក់ព័ន្ធ ដើម្បីធានាឱ្យបានសុចរិតភាព នៃទីផ្សារទោះបីជាមានការប្រកួតប្រជែងគ្នាក្នុងទីផ្សារក៏ដោយ” ។
ជាមួយគ្នានេះ លោកជា ចាន់តូ អគ្គទេសាភិបាលធនាគារជាតិនៃកម្ពុជាបានបញ្ជាក់ថា កាលពីបួនទសវត្សរ៍កន្លងមក ប្រវត្តិសាស្ត្រកម្ពុជាបានចារឹកយ៉ាងច្បាស់ ពីដំណើរងើបឡើងវិញរបស់ប្រទេសកម្ពុជា ពីស្ថានភាពមួយដែលខ្ទេចខ្ទាំដល់ឬសគល់ ជាពិសេសវិស័យហិរញ្ញវត្ថុ ដែលត្រូវបានលុបបំបាត់ទាំងស្រុង និងធ្វើឱ្យប្រជាជនកម្ពុជាលែងមានជំនឿមកលើវិស័យហិរញ្ញវត្ថុកម្ពុជា។
លោកបន្តថា ក្រោមការខិតខំប្រឹងប្រែង និងការងើបឡើងវិញយ៉ាងត្រដាបត្រដួសដោយខ្លួនឯង រាជរដ្ឋាភិបាលកម្ពុជាបានសម្រេចចិត្ត ខាងនយោបាយដ៏ត្រឹមត្រូវ និងប្រកបដោយទស្សនៈវែងឆ្ងាយ ដោយបានអនុញ្ញាតឱ្យវិស័យធនាគារ និងវិស័យមីក្រូហិរញ្ញវត្ថុអនុវត្តតាមយន្តការទីផ្សារ ដែលជាលទ្ធផលបានធ្វើឱ្យសកម្មភាពមីក្រូហិរញ្ញវត្ថុ អភិវឌ្ឍយ៉ាងឆាប់រហ័ស៕