ដោយគង់ ម៉ាលីន
ភ្នំពេញ៖ សាលពិព៌ណលំដាប់អន្តរជាតិ ដែលវិនិយោគទឹកប្រាក់ប្រមាណ ១៨លានដុល្លាររបស់ក្រុមហ៊ុនអនិកជនខ្មែរនៅក្រៅប្រទេស (OCIC) បានបញ្ចប់ការសាងសង់រួចហើយ។
អគ្គនាយករងក្រុមហ៊ុន OCIC លោកទូច សំណាង ធ្លាប់បានមានប្រសាសន៍ឲ្យដឹងតាមទូរស័ព្ទថា ការសាងសង់សាលពិព៌ណដែលមានទទឹង ៨០ម៉ែត្រ និងបណ្តោយ ២៤០ម៉ែត្រនេះ បានបញ្ចប់ការសាងសង់រួចហើយ។ សាលពិព៌ណលំដាប់អន្តរជាតិនេះ មានទំហំជាង ៣ម៉ឺនម៉ែត្រការ៉េ ក្នុងនោះ ១ម៉ឺនម៉ែត្រការ៉េស្ថិតនៅក្រោមដី។
តាមផែនការសាលពិព៌ណលំដាប់អន្តរជាតិនេះ នឹងប្រើប្រាស់សម្រាប់រៀបចំកិច្ចប្រជុំកំពូលអាស៊ី អឺរ៉ុបដែលកម្ពុជានឹងធ្វើជាម្ចាស់ផ្ទះនាឆ្នាំ ២០២០ខាងមុខនេះ ប៉ុន្តែកិច្ចប្រជុំដ៏មានកិត្យានុភាពនេះត្រូវបានលើកពេល ដោយសារវិបត្តិនៃជំងឺ Covid-19 ។
លោកទូច សំណាង បានបន្តថា គោលដៅនៃការរៀបចំសាលពិព៌ណដ៏ធំនេះ ធ្វើឡើងសំរាប់ប្រើប្រាស់លើការរៀបចំពិព៌ណ កិច្ចប្រជុំលំដាប់អន្តរជាតិ និងជាកន្លែងសំរាប់រៀបចំអាពាហ៍ពិពាហ៍ផងដែរ ។
ក្រុមហ៊ុន OCIC ក៏មានផែនការរើសាលពិព៌ណ និងសន្និបាតកោះពេជ្រ ទៅកាន់ទីក្រុងរណបជ្រោយចង្វារ ដែលមានផ្ទៃដីសរុបប្រមាណ ១១០ហិកតានាពេលខាងមុខផងដែរ។
លោកបន្តថា ទីក្រុងរណបនេះ នឹងរៀបចំជាទីក្រុងពាណិជ្ជកម្មលំដាប់អន្តរជាតិ មានសភាពស្រដៀងគ្នា នឹងតំបន់ពាណិជ្ជកម្មដូចគ្នានឹងមហាវិថីព្រះមុនីវង្ស។
ទីក្រុងរណបជ្រោយចង្វារ ជាទីក្រុងដែលមានលក្ខណៈអំណោយផលបំផុត ដែលបច្ចុប្បន្នក្រុមហ៊ុន OCIC បាន និងកំពុងសាងសង់ស្ពានយោងដោយខ្សែកាប ប្រវែងប្រមាណ៥០០ម៉ែត្រឆ្លងពីផ្លូវជាតិលេខ៥ទៅកាន់តំបន់នេះ។ ជាមួយគ្នានេះតំបន់នេះមានស្ពានធំៗចំនួន២ និងស្ពានបាឡេកំពុងតភ្ជាប់ទៅតំបន់នេះរួចហើយ។ លក្ខណៈពិសេសរបស់ទីក្រុងនេះ ក៏ផ្តល់បរិយាកាសរស់នៅល្អប្រសើរផងដែរ ព្រោះមានទន្លេព័ទ្ឋជុំវិញ៕
