ដោយៈសុផារី
ភ្នំពេញៈ ការលក់ទំនិញតាមអនឡាញ មានការកើនឡើងយ៉ាងគំហុក ជាហេតុនាំឱ្យការធ្វើទីផ្សារ ដើម្បីទាក់ទាញអតិថិជន ក៏រឹតតែមានភាពប្រកួតប្រជែងកាន់តែខ្ពស់ដែរ។
អ្វីដែលអ្នកលក់អនឡាញភាគច្រើន មានការស្ទាក់ស្ទើរនោះគឺ “តើគួរដាក់តម្លៃទំនិញរបស់ខ្លួន ពេលបង្ហោះលើបណ្ដាញសង្គមឬទេ?” ព្រោះពួកគាត់អាចគិតថា វាអាចឱ្យដៃគូប្រកួតប្រជែងដាក់តម្លៃទាបជាង ដើម្បីប្រមូលអតិថិជន។ ហេតុនេះទើបគេប្រើវិធីសាស្រ្ដមួយទៀត គឺ Inbox for Price ឬសាកសួរព័ត៌មានបន្ថែមតាមរយៈឆាត។
ការដាក់តម្លៃលើទំនិញស្រាប់ ឬដាក់ Inbox for Priceមានទាំងគុណសម្បត្តិនិងគុណវិបត្តិ ៖
ការដាក់តម្លៃលើទំនិញ អាចជួយសន្សំពេលនៃការឆ្លើយតបទៅភ្ញៀវ បើអ្នកមានអតិថិជនច្រើន។ ក្នុងករណីតម្លៃសមល្មម នឹងទាក់ទាញអតិថិជនបានច្រើន ហើយអាចទាញទំនុកចិត្តពីអ្នកទិញ ព្រោះពួកគេបានឃើញស្លាកតម្លៃស្រាប់។ ម្យ៉ាង មានប្រសិទ្ធភាពក្នុងការលក់ ព្រោះកាលដែលបានឃើញតម្លៃហើយឆាតទៅអ្នក នោះមានន័យថាភាគរយខ្ពស់ ដែលពួកគេនឹងទិញទំនិញរបស់អ្នក។
យ៉ាងណាមិញ ការដាក់តម្លៃក៏អាចបាត់ឱកាស និយាយជាមួយភ្ញៀវ បើអ្នកលក់មិនសូវមានអតិថិជន នេះជាការបាត់ឱកាសល្អ ហើយមិនអាចប្ដូរតម្លៃបាននោះទេ។ ជាពិសេសេ ដៃគូប្រកួតប្រជែងងាយបន្ទាបតម្លៃ ដើម្បីទាញយកភ្ញៀវបីយើងបាន។
ចំណែកការមិនឆ្លើយតម្លៃហើយដាក់ Inbox for Price អាចជួយឱ្យអ្នកបាននិយាយជាមួយភ្ញៀវ ថាមិនត្រូវអាចបញ្ចុះបញ្ចូលឱ្យគេទិញបាន។ក្នុងករណីមានការផ្លាស់ប្តូរ អ្នកអាចផ្លាស់ប្ដូរតម្លៃបាន។ បើមានអ្នក Comment សួរតម្លៃច្រើន វានឹងជួយឱ្យការបង្ហោះរបស់អ្នកទទួលបាន Reach ខ្ពស់និងអាចបញ្ចៀសការប្រកួតប្រជែងតម្លៃលក់ ដែលមិនស្មើភាព។
ប៉ុន្តែការធ្វើយ៉ាងនេះ ក៏ធ្វើឱ្យបាត់បង់ពេលផ្ដោតលើអ្វីសំខាន់ បាត់បង់ទំនុកចិត្តពីអតិថិជន ព្រោះពួកគេគិតថាអ្នកអាចប្ដូរតម្លៃបានតាមចិត្ត ព្រមទាំងគ្មានប្រសិទ្ធភាពក្នុងការលក់ ព្រោះពួកគេអាចឆាតសួរតម្លៃ ប៉ុន្ដែមិនទិញ។
ជារួម អ្នកអាចពិចារណាមើលពីគុណសម្បត្តិ និងគុណវិបត្តិ និងប្រភេទអាជីវកម្ម ព្រមទាំងពេលវេលា និងការសមគួរនៅក្នុងការឆ្លើយតបទៅកាន់អតិថិជនរបស់អ្នកបាន៕
