ដោយៈម៉ាលីនណា
ភ្នំពេញៈ តំបន់ចំនួន៣ ដែលស្ថិតនៅក្នុងខណ្ឌផ្សេងគ្នា ក្នុងរាជធានីភ្នំពេញត្រូវបានអ្នកជំនាញអះអាងថា នឹងក្លាយទៅជាមជ្ឈមណ្ឌលទិញទំនិញ និងកម្សាន្តតាមរយៈការបង្កើតផ្សារទំនើបកម្រិតស្ដង់ដាអន្តរជាតិជាច្រើន នៅលើទីតាំងនៅក្នុងខណ្ឌទាំង៣ខាងលើនេះ។
មន្ត្រីស្រាវជ្រាវផ្នែកអចលនទ្រព្យជាន់ខ្ពស់ ប្រចាំនៅក្រុមហ៊ុនអន្តរជាតិ CBRE Cambodia កញ្ញា គឹម គិនកេសា បានមានប្រសាសន៍ឲ្យដឹងតាមទូរស័ព្ទកាលពីល្ងាចថ្ងៃទី២២ មេសាកន្លងមកថា បើមិនមានអ្វីប្រែប្រួលនោះទេ យ៉ាងយូរនៅត្រឹមរយៈពេល ៣ឆ្នាំខាងមុខនេះ ផ្សារទំនើបលក្ខណៈអន្តរជាតិជាច្រើន នឹងបង្ហាញខ្លួននៅតំបន់ចំនួន សំខាន់ៗ ដែលស្ថិតនៅក្នុងខណ្ឌផ្សេងៗពីគ្នា ដែលក្នុងនោះ រួមមាន ដូចជា ខណ្ឌសែនសុខ ខណ្ឌចំការមន ខ័ណ្ឌទួលគោក និងខ័ណ្ឌមានជ័យ។
ខ័ណ្ឌសែនសុខ
តំបន់ទី១ ស្ថិតនៅក្នុងខណ្ឌសែនសុខ ពិសេសតំបន់ជុំវិញផ្សារទំនើប AEON MALL2 ជាតំបន់បណ្តុំដោយផ្សារទំនើប។ ពិសេសដោយសារកំនើននៃប្រជាសាស្ត្រកើនឡើងកាន់តែច្រើនទៅរស់នៅក្នុងតំបន់នេះ ជាពិសេស មានការកកើននូវសំណង់លំនៅ ដ្ឋានជាច្រើន ជាក់ស្ដែងដូចជាពេលនេះ ខណ្ឌសែនសុខបានក្លាយជាតំបន់ ដែលមានបុរីច្រើនជាងគេ នៅក្នុងចំណោមខណ្ឌនានានៅរាជធានីភ្នំពេញ។
ទាំងនេះគឺជាចំណុចដ៏ទាក់ទាញបំផុត សម្រាប់បណ្តាអ្នកវិនិយោគលើផ្នែកផ្សារទំនើប ខណៈដែលសព្វថ្ងៃនេះមានផ្សារទំនើប AEON2 ផ្សារ Makro និងផ្សារទំនើប Chip Mong SenSok ដែលនឹងលេចចេញជារូបរាងក្នុងពេលដ៏ខ្លី។
តំបន់នេះ នឹងមានផ្សារទំនើបនិងពាក់កណ្តាលទំនើបដទៃទៀត នៅជុំវិញនោះ ដូចជាផ្សារស្ថិតក្នុងបុរីវិមានភ្នំពេញ ផ្សារទំនើប AEON MALL ខ្នាតតូចក្នុងបុរីប៉េង ហួតជាដើម។
ខ័ណ្ឌទួលគោក
ខ័ណ្ឌមួយនេះ បានប្រែក្លាយខ្លួនយ៉ាងលឿនពីតំបន់លំនៅដ្ឋាន មកជាតំបន់មជ្ឈមណ្ឌលពាណិជ្ជកម្ម(CBD) ដែលបាននិងកំពុងទាក់ទាញការវិនិយោគពីអ្នកវិនិយោគជាតិ អន្តរជាតិ ពិសេសតំលៃអចលនទ្រព្យក៏បានកើនឡើងយ៉ាងគំហុកផងដែរ។
មជ្ឈមណ្ឌលភ្នំពេញ (Phnom Penh City Center) ឬតំបន់បឹងកក់ ដែលស្ថិតក្នុងខ័ណ្ឌមួយនេះ កំពុងទាក់ទាញការវិនិយោគផ្សារទំនើបបែបសហគមន៍ ជាក់ស្តែងផ្សារទំនើបបែបសហគមន៍ចំនួនពីរហើយបាន និងកំពុងបើកដំណើរការ ហើយគំរោងផ្សារទំនើបជាច្រើនទៀត ត្រៀមបង្ហាញវត្តមាននាពេលខាងមុខ។
ខ័ណ្ឌចំការមន
ចំណែកនៅក្នុងខណ្ឌចំការមន ក៏ដូចជាគ្នាពិសេសនៅតំបន់កោះពេជ្រ និងជុំវិញកោះពេជ្រ ដែលជាបណ្តុំផ្សារទំនើបដូចជា AEONMall1, The Bridge Commercial, ផ្សារទំនើបលំដាប់អន្តរជាតិក្នុងគំរោង The PeAk និងផ្សារទំនើបស្ថិតក្នុងគំរោង The D.I RIVIERA ស្ថិតនៅលើទីក្រុងរណបកោះពេជ្រ ដែលនឹងបើកដំណើរការនាពេលខាងមុខផងដែរ។
ខ័ណ្ឌមានជ័យ
ស្ថិតនៅលើផ្លូវ ៦០ម៉ែត្រ ដែលមានផ្សារទំនើបធំៗ ក៏នឹងបង្ហាញវត្តមាននៅទីនោះផងដែរ ដែលក្នុងនោះ រួមមាន ផ្សារទំនើប ប៉េងហួត ផ្សារទំនើប AEON 3 រួមជាមួយគម្រោងផ្សារទំនើប Chip Mong មួយទៀតនិងគំរោងផ្សារទំនើប និងមជ្ឈមណ្ឌលពាណិជ្ជកម្មថ្មីមួយ ដែលរួមបញ្ចូលនូវផ្សារទំនើបធំមួយផងដែរ។
អគ្គនាយកក្រុមហ៊ុន Century21 Fortuna Investment លោកវ៉ា វីរៈ បានមានប្រសាសន៍ឱ្យដឹងផងដែរថា ការរីកចម្រើនផ្សារទំនើប គឺជាការឆ្លុះបញ្ចាំងឱ្យឃើញពីកំណើនអំណាចនៃការទិញ ដោយសារការរីកចម្រើនសេដ្ឋកិច្ចសង្គមកម្ពុជា ពិសេសអ្វីដែលយើងមើលឃើញគឺចំនួនផ្សារទំនើប ដែលមានបច្ចុប្បន្ននៅមិនទាន់ច្រើននោះទេ បើធៀបទៅនឹងទំហំផ្សារ និងចំនួនប្រជាពលរដ្ឋរស់នៅទីក្រុងមួយនេះ។
លោកបន្តថា “តំបន់ស្ថិតនៅក្នុងខ័ណ្ឌសែនសុខ មានការរីកចម្រើនលឿន និងមានហេដ្ឋារចនាសម្ព័ន្ឋល្អប្រសើរ ហេតុនេះអ្នកវិនិយោគ ដែលចូលមកវិនិយោគតំបន់នេះពួកគេពិតជាបានសិក្សាទីផ្សាររួចហើយ ទើបពួកគេវិនិយោគ។លោកបន្តថា “អ្នកវិនិយោគមើលឃើញអំណាចនៃការទិញកើនឡើង ទើបពួកគេចូលទៅវិនិយោគតំបន់នេះ ដោយសារលំហូរប្រជាជនចូលទៅរស់នៅតំបន់នេះច្រើន” ។
លោកបន្តថា បើយើងមើលមួយភ្លេតគឺផ្សារហាក់មានចំនួនច្រើន ប៉ុន្តែបើយើងមើលកំណើនប្រជាជន និងការចាប់យកចំណែកទីផ្សារខុសៗគ្នា ពីសំណាក់អ្នកវិនិយោគនៅតំបន់នោះ គឺចំនួនផ្សារទាំងនោះនៅមិនទាន់ច្រើននោះទេ។
ទីប្រឹក្សាសមាគមទីភ្នាក់ងារទេសចរណ៍កម្ពុជា លោក ហូរ វណ្ឌី បានបង្ហាញពីការសាទរចំពោះកំណើនវត្តមាន នៃបណ្តាផ្សារទំនើបបែបកម្សាន្ត នៅក្នុងរាជធានីភ្នំពេញ ដែលវាជាការចូលរួមចំណែក ក្នុងការទាក់ទាញភ្ញៀវទេសចរជាតិ អន្តរជាតិ មកកាន់រាជធានីមួយនេះកាន់តែច្រើន ព្រោះនៅពេលដែលមានទីផ្សារទំនើប ដែលរៀបចំជាមជ្ឈមណ្ឌលកម្សាន្តកាន់តែច្រើន មួយរយភាគរយ គឺពិតជាជួយចូលរួមចំណែកលើកកម្ពស់ដល់ផ្នែកទេសចរណ៍។
លោកបន្តថា ជាក់ស្ដែងដូចជាបច្ចុប្បន្ននេះ ស្ទើរតែរៀងរាល់ថ្ងៃសុក្រ សៅរ៍ និងអាទិត្យ នៅតាមបណ្តាផ្សារទំនើបនានាដូចជា ផ្សារទំនើប AEON1 ដែលស្ថិតនៅក្នុងខណ្ឌចំការមន ផ្សារទំនើប AEON2 ដែលស្ថិតនៅក្នុងខណ្ឌសែនសុខ ផ្សារទំនើបTK ស្ថិតនៅខណ្ឌទួលគោក ក៏ដូចជាផ្សារទំនើបសូរិយា ដែលបច្ចុប្បន្នបានកែប្រែ និងរចនាជាផ្សារទេសចរណ៍នៅជាន់ខាងលើជាដើម គឺសុទ្ធតែទាក់ទាញមហាជនក្នុងស្រុក ក៏ដូចជាជនបរទេសចូលទិញសម្ភារៈ ជាមួយនឹងការកម្សាន្តផងដែរ ប៉ុន្តែទោះជាយ៉ាងណា បណ្តាផ្សារទំនើបទាំងនេះហាក់នៅមានទំហំតូចនៅឡើយ។
លោកបានបន្តទៀតថា “ប្រសិនបើនៅថ្ងៃខាងមុខនេះ មានលេចឡើងនូវវត្តមានផ្សារទំនើបកាន់តែច្រើន ហើយផ្តោតលើកម្រិតទីផ្សារខុសគ្នា ដូចជាប្រភេទទំនិញ និងការចាប់យកវ័យអតិថិជនជាគោលដៅកាន់តែច្រើន គឺកាន់តែផ្តល់ភាពល្អប្រសើរកាន់ប្រសើរ” ៕
